പോപ്പുലര്‍ ഫ്രണ്ട് പരിപാടിയില്‍ പങ്കെടുത്തത് പരിപാടി എന്താണെന്ന് അറിയാതെയാണെന്ന വിശദീകരണവുമായി മുന്‍ ഉപരാഷ്ട്രപതി ഹമീദ് അന്‍സാരി രംഗത്ത്. പോപ്പുലര്‍ ഫ്രണ്ട് പ്രവര്‍ത്തകര്‍ സംഘടിപ്പിച്ച പരിപാടിയായിരുന്നെന്ന് അറിയില്ലായിരുന്നെന്നും പൊലീസ് പോലും തന്നോട് പറഞ്ഞില്ലായിരുന്നെന്നും ഹമീദ് അന്‍സാരി വിശദീകരിച്ചു.

ഡല്‍ഹിയിലെ ഒരു ബുദ്ധിജീവിയാണ് തന്നെ പരിപാടിക്കായി ക്ഷണിച്ചതെന്നും ഡല്‍ഹിയിലുള്ള അയാള്‍ക്ക് പോപ്പുലര്‍ ഫ്രണ്ടുമായുള്ള ബന്ധത്തെക്കുറിച്ചോ തനിക്ക് അറിയില്ലായിരുന്നു. ഡല്‍ഹിയില്‍ തിരിച്ചെത്തിയതിനുശേഷം പിറ്റേദിവസത്തെ പത്രങ്ങളിലൂടെയാണ് പങ്കെടുത്ത പരിപാടിയുമായി ബന്ധപ്പെട്ട കൂടുതല്‍ കാര്യങ്ങള്‍ മനസിലായതെന്നും അദ്ദേഹം പറഞ്ഞു

എന്തെങ്കിലും വ്യക്തത വരുത്തേണ്ട കാര്യമുണ്ടെങ്കില്‍ സംസ്ഥാന സര്‍ക്കാര്‍ വ്യക്താമാകും. ഇക്കാര്യത്തിൽ സര്‍ക്കാര്‍ ഒന്നും പറഞ്ഞിട്ടില്ലെന്നും അദ്ദേഹം കുറ്റപ്പെടുത്തി. ഒരു ദേശീയ മാധ്യമത്തിന് നല്‍കിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.

2017 സെപ്റ്റംബറില്‍ പോപ്പുലര്‍ ഫ്രണ്ടിന്റെ വനിതാ വിഭാഗം കോഴിക്കോട് സംഘടിപ്പിച്ച സെമിനാറിലാണ് ഹമീദ് അന്‍സാരി പങ്കെടുത്തത്. ഇന്‍സ്റ്റിറ്റ്യൂട്ട് ഓഫ് ഒബ്ജക്ടീവ് സ്റ്റഡീസും പോപ്പുലര്‍ ഫ്രണ്ടിന്റെ വനിതാ വിഭാഗമായ വുമണ്‍സ് ഫ്രണ്ടും സംഘടിപ്പിച്ച പരിപാടിയുടെ ഉദ്ഘാടകനായായിരുന്നു അദ്ദേഹമെത്തിയത്. ഇത് ഏറെ വിവാദങ്ങൾക്ക് വഴിവച്ചിരുന്നു.