കഴിഞ്ഞ രണ്ടാഴ്ച്ചത്തോളമായി ലിബിയയില്‍ നടക്കുന്ന അക്രമ സംഭവങ്ങളുടെ പശ്ചാത്തലത്തില്‍ ലിബിയന്‍ തലസ്ഥാനമായ ട്രിപ്പോളിയില്‍ നിന്നും ഇന്ത്യക്കാര്‍ എത്രയും പെട്ടെന്ന് ഒഴിയണമെന്ന് വിദേശകാര്യ മന്ത്രി സുഷമാ സ്വരാജ്.

ഏകദേശം 500-ഓളം ഇന്ത്യക്കാര്‍ നിലവില്‍ ട്രിപ്പോളിയിലുണ്ട്.എത്രയും പെട്ടെന്ന് സ്ഥലത്ത് നിന്ന് മാറിയില്ലെങ്കില്‍ പിന്നീട് ഒരുപക്ഷേ രക്ഷപ്പെടുത്താന്‍ കഴിയാതെ വരുമെന്നും സുഷമാ സ്വരാജ് പറഞ്ഞു.ലിബിയയില്‍ ആഭ്യന്തര കലഹം രൂക്ഷമായതിനെ തുടര്‍ന്നാണ് മുന്നറിയിപ്പ്.

കഴിഞ്ഞ രണ്ടാഴ്ച്ചത്തോളമായി ലിബിയയുടെ തലസ്ഥാന നഗരമായ ട്രിപ്പോളിയുടെ നിയന്ത്രണം പിടിച്ചെടുക്കാന്‍ വിമത ഗ്രൂപ്പുകള്‍ ശ്രമിച്ചുകൊണ്ടിരിക്കുകയാണ്. ക്രമസമാധാന നില പൂര്‍ണ്ണമായി തകര്‍ന്ന ലിബിയയില്‍ ഇതുവരെ 200-ലധികം പേര്‍ കൊല്ലപ്പെട്ടതായും 900-ല്‍പ്പരം ആളുകള്‍ക്ക് പരിക്കേറ്റതായും റിപ്പോര്‍ട്ടുകളുണ്ട്.

ആക്രമണം നടക്കുന്ന സ്ഥലത്തിന്റെ അടുത്തായി 3000-ലധികം ആളുകളാണ് കുടുങ്ങിക്കിടക്കുന്നത്. എന്നാല്‍ ആക്രമണം ആരംഭിച്ചപ്പോള്‍ മുതല്‍ ഇന്ത്യക്കാരെ തിരികെയെത്തിക്കാനുള്ള ശ്രമങ്ങള്‍ ഊര്‍ജ്ജിതമായി നടന്ന് വരികയാണെന്ന് വിദേശകാര്യ മന്ത്രാലയം അറിയിച്ചു.
മടങ്ങി വരാന്‍ സാധിക്കില്ലാത്തതിനാല്‍ ആത്മഹത്യയല്ലാതെ വേറെ വഴിയില്ലെന്ന് പറഞ്ഞ പ്രവാസിയായ ഇന്ത്യക്കാരന് സഹായഹസ്തവുമായി കേന്ദ്ര വിദേശകാര്യമന്ത്രി സുഷമാ സ്വരാജ്.

സൗദിയില്‍നിന്ന് ഇന്ത്യയിലേക്കു മടങ്ങാന്‍ കഴിയാതെ വലയുന്ന അലി എന്നയാളാണ് സുഷമയോട് ട്വിറ്ററിലൂടെ സഹായം അഭ്യര്‍ത്ഥിച്ചത്. ''എന്നെ സഹായിക്കാന്‍ താങ്കള്‍ക്കു കഴിയുമോ, അതോ ഞാന്‍ ജീവനൊടുക്കണോ? കഴിഞ്ഞ 12 മാസമായി ഞാന്‍ എംബസിയുടെ സഹായം അഭ്യര്‍ഥിക്കുകയാണ്. എന്നെ ഇന്ത്യയിലേക്ക് അയച്ചാല്‍ അതു വലിയ സഹായകമാകും. എനിക്ക് നാല് മക്കളുണ്ട്'' ഇങ്ങനെയാണ് അലി ട്വീറ്റ് ചെയ്തത്.

ഇതു ശ്രദ്ധയില്‍പെട്ട സുഷമാ സ്വരാജ് ഉടന്‍ തന്നെ മറുപടി നല്‍കി. ഒപ്പം ഞങ്ങളുണ്ട്, ആത്മഹത്യയെക്കുറിച്ച് ചിന്തിക്കരുത്' എംബസി താങ്കള്‍ക്ക് എല്ലാവിധ സഹായവും ചെയ്തുതരും' - സുഷമ ട്വിറ്ററില്‍ കുറിച്ചു. കൂടാതെ റിയാദിലെ ഇന്ത്യന്‍ എംബസിയോട് അലിയുടെ പരാതിയില്‍ എത്രയും വേഗം റിപ്പോര്‍ട്ട് നല്‍കാനും സുഷമാ ആവശ്യപ്പെട്ടു.