കുടുംബം പോറ്റാന്‍ സ്വന്തമായി ബിസിനസ് തുടങ്ങുന്നതിനായി ദേശസാല്‍കൃത ബാങ്ക് വായ്പ നിഷേധിച്ചതിനെത്തുടര്‍ന്ന് സ്വന്തം വൃക്ക വില്‍ക്കാനൊരുങ്ങുകയാണ് യുവകര്‍ഷകന്‍. ഉത്തര്‍പ്രദേശിലെ സഹാറന്‍പൂര്‍ സ്വദേശിയായ 30കാരനായ രാംകുമാറാണ് വൃക്ക വില്‍ക്കാനൊരുങ്ങുന്നത്. വൃക്ക ആവശ്യമുള്ള ഉപഭോക്താക്കളെ തേടി നഗരത്തിലെ ചുവരുകളിലും സാമൂഹികമാധ്യമങ്ങളിലും പരസ്യം പ്രസിദ്ധീകരിച്ചിരിക്കുകയാണ്് രാംകുമാര്‍. ഗോതമ്പ് കൃഷി ചെയ്താണ് രാംകുമാര്‍ ഉപജീവനം നടത്തിയിരുന്നത്. പ്രതിമാസം 3,000 രൂപ മാത്രമാണ് കൃഷി ചെയ്താല്‍ ലഭിക്കുക.

ഭാര്യയും നാല് മക്കളുമടങ്ങുന്ന കുടുംബത്തെ പോറ്റാന്‍ ഈ തുക അപര്യാപ്തമാണ്. ഈ സാഹചര്യത്തിലാണ് കുടുംബത്തെ പോറ്റുന്നതിന് മറ്റുവഴികള്‍ തേടാന്‍ രാംകുമാര്‍ തീരുമാനിച്ചത്. ബാങ്കില്‍നിന്ന് വായ്പയെടുത്ത് ബിസിനസ് ചെയ്താല്‍ ജീവിതനിലവാരം മെച്ചപ്പെടുമെന്ന ചിന്ത അങ്ങനെയുണ്ടായതാണ്. 2007 ല്‍ ഹരിയാനയിലെ അംബാലയിലെ സര്‍ക്കാര്‍ പന്നിവളര്‍ത്തല്‍ ഫാമില്‍ ഒരുമാസത്തെ പരിശീലനകോഴ്‌സ്, 2016 ല്‍ പഞ്ചാബ് നാഷനല്‍ ബാങ്ക് റൂറല്‍ സെല്‍ഫ് എംപ്ലോയ്‌മെന്റ് ട്രെയ്‌നിങ് ഇന്‍സ്റ്റിറ്റിയൂട്ടിന് കീഴില്‍ പാല്‍ വളര്‍ത്തലില്‍ ഒരാഴ്ച നീണ്ടുനിന്ന പരിശീലനം എന്നിവ രാംകുമാര്‍ പൂര്‍ത്തിയാക്കിയിരുന്നു.
ബാങ്ക് വായ്പ ലഭിക്കുന്നതിന് കൂടുതല്‍ പ്രയോജനം ലഭിക്കുമെന്ന വിവരം ലഭിച്ചതിന്റെ അടിസ്ഥാനത്തിലാണ് 2018ല്‍ പ്രധാമന്ത്രി കൗശല്‍ വികാസ് യോജന (പിഎംകെവിവൈ) പദ്ധതിയുടെ ഭാഗമായുള്ള സര്‍ട്ടിഫിക്കറ്റ് കോഴ്‌സ് രാംകുമാര്‍ പൂര്‍ത്തിയാക്കുന്നത്. എന്നാല്‍, മൂന്ന് സര്‍ട്ടിഫിക്കറ്റ് കോഴ്‌സുകള്‍ കൈവശമുണ്ടായിട്ടും ബാങ്ക് അധികൃതര്‍ രാംകുമാറിന് വായ്പ നിരസിക്കുകയായിരുന്നു. മറ്റൊരു വരുമാനമാര്‍ഗവുമില്ലാത്തതിനാലാണ് വൃക്ക വില്‍ക്കാന്‍ തീരുമാനിച്ചതെന്നും അതിന് താന്‍ ബാധ്യസ്ഥനാണെന്നും രാംകുമാര്‍ പറയുന്നു.