മുന്‍മേയറായ ഭാര്യയെ തല്ലിയ ബി ജെ പി നേതാവിനെ പാര്‍ട്ടി പുറത്താക്കി
പാര്‍ട്ടി ഓഫിസില്‍ വച്ച് മുന്‍ മേയറായ ഭാര്യയെ മര്‍ദ്ദിച്ച ബിജെപി നേതാവിനെ പാര്‍ട്ടി പുറത്താക്കി. ഡല്‍ഹിയില്‍ മുതിര്‍ന്ന ബിജെപി നേതാവും കേന്ദ്രമന്ത്രിയുമായ പ്രകാശ് ജാവഡേക്കര്‍ പങ്കെടുത്ത യോഗത്തിനു പിന്നാലെയാണ് സംഭവം.
മെഹ്രോളി ബിജെപി ജില്ലാ അധ്യക്ഷന്‍ ആസാദ് സിങ്ങിനെതിരെയാണ് പാര്‍ട്ടി നടപടി. പ്രകാശ് ജാവഡേക്കര്‍ വിളിച്ചു ചേര്‍ത്ത യോഗത്തിനു പിന്നാലെ പുറത്തിറങ്ങിയ ആസാദ് സിങ്ങും ഭാര്യയും പരസ്പരം വഴക്കിടുകയായിരുന്നു. പാര്‍ട്ടി പ്രവര്‍ത്തകരുടെ കണ്‍മുന്നില്‍ ആസാദ് സിങ് സൗത്ത് ഡല്‍ഹിയിലെ മുന്‍ മേയര്‍ കൂടിയായ ഭാര്യ സരിത ചൗധരിയെ മര്‍ദ്ദിക്കുകയായിരുന്നു.
വര്‍ഷങ്ങളായി ഇരുവരും തമ്മില്‍ പ്രശ്‌നങ്ങളുണ്ടെന്നും പരസ്യമായി വഴക്കിടുമെന്നു കരുതിയില്ലെന്നും നേതാക്കള്‍ പറയുന്നു. ഭാര്യയില്‍ നിന്ന് വിവാഹമോചനം ആവശ്യപ്പെട്ട് ആസാദ് സിങ് അടുത്തിടെ ഹര്‍ജി നല്‍കിയിരുന്നു.
ആദ്യം വഴക്കുണ്ടാക്കിയതും ആക്രമിച്ചതും ഭാര്യയാണെന്നും സ്വയം പ്രതിരോധിക്കാനാണ് അടിച്ചത് എന്നുമായിരുന്നു ആസാദ് സിങ്ങിന്റെ പ്രതികരണം. സംഭവത്തോട് പ്രതികരിക്കാന്‍ സരിത തയാറായില്ല. ദൃശ്യങ്ങള്‍ സമൂഹമാധ്യമങ്ങളില്‍ വൈറലായതോടെ ആനന്ദ് സിങ്ങിനെ പാര്‍ട്ടിയില്‍ നിന്നു പുറത്താക്കിയതായി ബിജെപി ഡല്‍ഹി അധ്യക്ഷന്‍ മനോജ് തിവാരി വ്യക്തമാക്കി. ആസാദ് സിങ്ങിനെ പുറത്താക്കിയതിന് പിന്നാലെ വികാസ് തന്‍വാറിന് വര്‍ക്കിങ് പ്രസിഡന്റിന്റെ ചുമതല നല്‍കി.
https://www.facebook.com/Malayalivartha
