ജീവന്‍ നഷ്ടമാകുന്നതിന് മുമ്പ് സ്വന്തം കൈവെള്ളയില്‍ കുറ്റവാളികളെ പിടികൂടാനുള്ള സൂചന; പൊലീസുകാര്‍ കൊല്ലപ്പെട്ട സംഭവത്തില്‍ ആറ് പ്രതികളില്‍ അഞ്ച് പേര്‍ അറസ്റ്റില്‍
നിര്‍ത്തിയിട്ട കാറില്‍ പ്രതികള്‍ മദ്യപിച്ചുകൊണ്ടിരുന്നത് ചോദ്യം ചെയ്തതിനെ തുടര്‍ന്ന് നടന്ന ആക്രമണത്തില്‍ രണ്ട് പൊലീസുകാര്‍ കൊല്ലപ്പെട്ട സംഭവത്തില്‍ ആറ് പ്രതികളില്‍ അഞ്ച് പേര്‍ അറസ്റ്റിലായി. ഹരിയാനയിലെ സോണിപത് ജില്ലയില്‍ കഴിഞ്ഞയാഴ്ചയായിരുന്നു സംഭവം നടന്നത്. ഒരാള്‍ പൊലീസുമായുണ്ടായ ഏറ്റുമുട്ടലില്‍ കൊല്ലപ്പെട്ടിരുന്നു. പൊലീസുകാരില്‍ ഒരാളായ രവീന്ദര്‍ സിംഗ് (28) കൊല്ലപ്പെടുന്നതിനു മുന്‍പ് കൈവെള്ളയില്‍ എഴുതിയ വാഹന രജിസ്റ്റര്‍ നമ്പറാണ് പ്രതികളെ കണ്ടെത്താന്‍ സഹായിച്ചത്. കൊലയാളികളെ കണ്ടെത്താന്‍ ബുദ്ധിമുട്ടന്നതിനിടെയാണ് രവീന്ദര്‍ സിംഗിന്റെ കൈയില്‍ എഴുതിയിരിക്കുന്ന നമ്പര്‍ പോസ്റ്റ്‌മോര്‍ട്ടത്തിനിടെ ശ്രദ്ധയില്‍പ്പെട്ടത്. ഇത് പ്രതികളെ കണ്ടെത്താന്‍ നിര്‍ണായകമാവുകയായിരുന്നു.
ജീവന്‍ നഷ്ടമാകുന്നതിന് മുമ്പ് ധീരനായ രവീന്ദര്‍ സിങ് പ്രകടിപ്പിച്ചത് പൊലീസ് വൈദഗ്ധ്യമാണെന്നും മരണാനന്തര പൊലീസ് മെഡലിന് രവീന്ദര്‍ സിങ്ങിനെ ശിപാര്‍ശ ചെയ്യുമെന്നും ഹരിയാന പൊലീസ് മേധാവി മനോജ് യാദവ പറഞ്ഞു. കഴിഞ്ഞ ചൊവ്വാഴ്ചയാണ് ജോലിക്കിടെ പൊലീസുകാരായ രവീന്ദര്‍ സിങ്ങും കാപ്താന്‍ സിങ്ങും കൊല്ലപ്പെട്ടത്. രക്തത്തില്‍ മുങ്ങിയ നിലയില്‍ നാട്ടുകാരാണ് പൊലീസ് ഉദ്യോഗസ്ഥരുടെ മൃതദേഹങ്ങള്‍ കണ്ടെത്തിയത്. ബുടാന പൊലീസ് സ്‌റ്റേഷന് സമീപമുള്ള സോണിപത് റോഡില്‍ നിര്‍ത്തിയിട്ട കാറില്‍ പ്രതികള്‍ മദ്യപിച്ചുകൊണ്ടിരുന്നത് ചോദ്യം ചെയ്തതിനെ തുടര്‍ന്ന് തര്‍ക്കമുണ്ടായി. തുടര്‍ന്ന് പ്രതികള്‍ ആയുധങ്ങളുപയോഗിച്ച് കൊലപ്പെടുത്തുകയും ശേഷം കാറില്‍ രക്ഷപ്പെടുകയുമായിരുന്നു.
https://www.facebook.com/Malayalivartha
