വിവരാവകാശ പ്രവര്‍ത്തകന്‍ വിനായക് ബാളിഗ 2016-ല്‍ കൊല്ലപ്പെട്ട കേസിലെ മുഖ്യപ്രതി നരേഷ് ഷേണായിയുടെ ഉടമസ്ഥതയിലുള്ള വിവേക് ട്രേഡേഴ്‌സില്‍ ജീവനക്കാരനും കേസിലെ സാക്ഷിയുമായിരുന്ന യുവാവ് പൊലീസ് ചോദ്യം ചെയ്യാനിരിക്കവേ ജീവനൊടുക്കിയ സംഭവം വിവാദമാകുന്നു. മംഗളൂരു വി.ടി.റോഡ് ധന്വന്തരി നഗറിലെ വിഗ്‌നേഷ് നായക്(29) ആണ് കഴിഞ്ഞ ദിവസം വീടിനകത്ത് തൂങ്ങി മരിച്ച നിലയില്‍ കണ്ടെത്തിയത്. വിഗ്‌നേഷിന്റെ വിവാഹം അടുത്ത മാസം നടക്കാനിരിക്കെയാണ് ആത്മഹത്യ.

തന്റെ പേരില്‍ കാര്‍ വാങ്ങിയത് നരേഷ് ഷേണായി ആണെന്നും കേസില്‍ പ്രതികളായ നരേഷ് ഷേണായി അടക്കമുള്ളവര്‍ തന്റെ പേരിലുള്ള കാര്‍ ഉപയോഗിച്ചിരുന്നതായും 164-ാം വകുപ്പ് പ്രകാരം കോടതിയില്‍ നല്‍കിയ രഹസ്യ മൊഴിയില്‍ വിഗ്‌നേഷ് വ്യക്തമാക്കിയിരുന്നു. ഈ കാറിലാണ് കൊലയാളികള്‍ സഞ്ചരിച്ചത് എന്നാണു കേസ്.

വിനായക് വധത്തെ തുടര്‍ന്ന് പ്രതികള്‍ ഒളിവില്‍ പോയ സമയത്ത് സാക്ഷിയായ വിഗ്‌നേഷും ഒളിവിലായിരുന്നു. വിഗ്‌നേഷിന്റെ മരണത്തില്‍ ദുരൂഹത ഉണ്ടെന്നും വിശദമായ അന്വേഷണം നടത്തണമെന്നും വിവരാവകാശ പ്രവര്‍ത്തകനും മനുഷ്യാവകാശ പ്രവര്‍ത്തകനുമായ ഡോ. നരേന്ദ്ര നായക് ആവശ്യപ്പെട്ടു.

വിനായക് വധവുമായി ബന്ധപ്പെട്ട് കൂടുതല്‍ കാര്യങ്ങള്‍ അറിയുന്നയാളാണു വിഗ്‌നേഷ്. ഈ സാഹചര്യത്തില്‍ ഇയാളുടെ മരണത്തില്‍ ദുരൂഹതയുണ്ട്. വിശദമായ അന്വേഷണം നടത്തണം- നരേന്ദ്ര നായക് ആവശ്യപ്പെട്ടു. വിഗ്‌നേഷിന്റെ മരണം സംബന്ധിച്ച് വിശദമായ അന്വേഷണം നടത്തണമെന്ന് കൊല്ലപ്പെട്ട വിനായക് ബളിഗയുടെ ബന്ധുക്കളും ആവശ്യപ്പെട്ടു.