മഹാരാഷ്ട്രയില് ടിക്ടോക് താരം പൂജാ ചവാന്റെ മരണവുമായി ബന്ധപ്പെട്ട് ആരോപണവിധേയനായ വനംമന്ത്രി സഞ്ജയ് റാഥോഡ് രാജിവെച്ചു
മഹാരാഷ്ട്രയില് ടിക്ടോക് താരം പൂജാ ചവാന്റെ (23) മരണവുമായി ബന്ധപ്പെട്ട് ആരോപണവിധേയനായ വനംമന്ത്രി സഞ്ജയ് റാഥോഡ് രാജിവെച്ചു. ഉദ്ധവ് താക്കറേ മന്ത്രിസഭയില്നിന്ന് പുറത്തുപോകുന്ന ആദ്യത്തെ മന്ത്രിയാണ് ശിവസേനക്കാരനായ റാഥോഡ്.
ഭാര്യാസമേതനായി മുഖ്യമന്ത്രിയുടെ ഔദ്യോഗികവസതിയായ വര്ഷയിലെത്തിയായിരുന്നു മന്ത്രി രാജിക്കത്ത് നല്കിയത്. മന്ത്രി രാജി വെക്കുമെന്ന് ശിവസേന വക്താവ് സഞ്ജയ് റാവുത്ത് അറിയിച്ചിരുന്നു.
തിങ്കളാഴ്ച ആരംഭിക്കുന്ന നിയമസഭാ ബജറ്റ് സമ്മേളനത്തില് മന്ത്രി രാജിവെക്കണമെന്ന് ശക്തമായി ആവശ്യപ്പെടുമെന്ന് ബി.ജെ.പി. വ്യക്തമാക്കിയതിനു പിന്നാലെയായിരുന്നു രാജി. മന്ത്രി തുടരുന്നത് സര്ക്കാരിന്റെ പ്രതിച്ഛായക്ക് മങ്ങല് ഏല്പ്പിക്കുമെന്ന് കോണ്ഗ്രസ്, എന്.സി.പി. നേതാക്കളും മുഖ്യമന്ത്രിയെ ധരിപ്പിച്ചിരുന്നു. പൂജയുടെ മരണത്തെത്തുടര്ന്ന് വ്യാപകമായി പ്രചരിച്ച ഓഡിയോ ക്ലിപ്പുകള് അടിസ്ഥാനമാക്കിയാണ് മന്ത്രിയുടെ രാജിക്കായി പ്രതിപക്ഷം രംഗത്തുവന്നത്.
പൂജയ്ക്ക് മന്ത്രിയുമായി അടുപ്പം ഉണ്ടായിരുന്നെന്നുള്ള ആരോപണമാണ് ഉയര്ന്നിട്ടുള്ളത്. സംഭവത്തില് മന്ത്രിയുടെ പങ്കിനെക്കുറിച്ച് അന്വേഷിക്കണമെന്നാവശ്യപ്പെട്ട് പ്രതിപക്ഷ നേതാവ് ദേവേന്ദ്ര ഫഡ്നവിസ് ഡി.ജി.പി.ക്ക് നിവേദനം നല്കിയതിനുപിന്നാലെ അന്വേഷണം സംബന്ധിച്ച് ദേശീയ മനുഷ്യാവകാശ കമ്മിഷന് മഹാരാഷ്ട്ര ഡി.ജി.പി.യോട് റിപ്പോര്ട്ട് തേടിയിരുന്നു.
പൂജ വീണു മരിച്ചതെന്നാണ് പോസ്റ്റ്മോര്ട്ടം റിപ്പോര്ട്ടെന്നും ആത്മഹത്യാക്കുറിപ്പ് കണ്ടെടുത്തിട്ടില്ലെന്നും പോലീസ് പറയുന്നു.
ബീഡ് സ്വദേശിനിയായ പൂജ സ്പോക്കണ് ഇംഗ്ലീഷ് കോഴ്സ് പഠിക്കുന്നതിനുവേണ്ടിയാണ് പുണെയില് എത്തിയത്. ഫെബ്രുവരി എട്ടിനായിരുന്നു ഹഡാപ്സറിലെ ഒരു കെട്ടിടത്തില്നിന്ന് പൂജ വീണത്. ആശുപത്രിയിലെത്തിച്ചെങ്കിലും രക്ഷിക്കാനായില്ല.
പൂജ മഹാരാഷ്ട്രയിലെ പ്രബല പിന്നാക്ക വിഭാഗമായ വഞ്ചാര സമുദായത്തില്പ്പെട്ടവരാണ്. ഈ സമുദായത്തിലെ പ്രമുഖ നേതാവാണ് റാഥോഡ്. തുടര്ച്ചയായി മൂന്നുതവണ എം.എല്.എ.യായി തിരഞ്ഞെടുക്കപ്പെട്ടിട്ടുള്ള റാഥോഡ് 2014- ല് ഫഡ്നവിസ് മന്ത്രിസഭയില് റവന്യൂ സഹമന്ത്രിയായിരുന്നു.
" f
https://www.facebook.com/Malayalivartha