യൂത്ത് കോണ്ഗ്രസ് ദേശീയ അധ്യക്ഷന് ബി.വി. ശ്രീനിവാസിനെ ചോദ്യംചെയ്ത് ഡല്ഹി പോലീസ് ; ദുരിതാശ്വസ പ്രവര്ത്തനത്തിനുള്ള പണത്തിന്റെ ഉറവിടം വ്യക്തമാക്കണമെന്ന് പൊലീസ്; കൊവിഡ് പ്രതിരോധ പ്രവര്ത്തനങ്ങളില്നിന്ന് മാറിനില്ക്കില്ലെന്ന് ശ്രീനിവാസ്
കൊവിഡ് ദുരിതാശ്വാസ പ്രവര്ത്തനങ്ങളുടെ പേരില് സാമൂഹ്യ മാധ്യമങ്ങളില് അടക്കം അഭിനന്ദനങ്ങള് ഏറ്റുവാങ്ങിയ യൂത്ത് കോണ്ഗ്രസ് ദേശീയ അധ്യക്ഷന് ബി.വി. ശ്രീനിവാസിനെ ചോദ്യംചെയ്ത് ഡല്ഹി പോലീസ്. കൊവിഡ് ദുരിതാശ്വാസ പ്രവര്ത്തനവുമായി ബന്ധപ്പെട്ട് ആരോപണങ്ങളുടെ പേരിലാണ് ചോദ്യംചെയ്യല്. എന്നാല് ഇത്തരം പൊലീസ് നടപടികളെത്തുടര്ന്ന് കൊവിഡ് പ്രതിരോധ പ്രവര്ത്തനങ്ങളില്നിന്ന് മാറിനില്ക്കില്ലെന്ന് ശ്രീനിവാസ് പറഞ്ഞു.
കൊവിഡ് ചികിത്സയ്ക്ക് ഉപയോഗിക്കുന്ന മരുന്നുകള് അനധികൃതമായി വിതരണം ചെയ്തതായും ദുരിതാശ്വസ പ്രവര്ത്തനത്തിനുള്ള പണത്തിന്റെ ഉറവിടം വ്യക്തമാക്കണമെന്നും ആവശ്യപ്പെട്ടാണ് ശ്രീനിവാസിന്റെ നേതൃത്വത്തിലുള്ള കോവിഡ് ദുരിതാശ്വാസ സംഘത്തിനെതിരേ പരാതി ഉണ്ടായത്.
എന്നാല് രാഷ്ട്രീയമായ പകപോക്കലാണ് കോവിഡ് ദുരിതാശ്വാസ പ്രവര്ത്തനത്തിനിടെ കേന്ദ്രസര്ക്കാരില് നിന്ന് ഉണ്ടാകുന്നതെന്ന് കോണ്ഗ്രസ് ആരോപിച്ചു. ജനങ്ങളെ സഹായിക്കുന്നതിനെ ഒരു കുറ്റകൃത്യമായാണ് മോദി സര്ക്കാര് കാണുന്നതെന്ന് കോണ്ഗ്രസ് വക്താവ് രണ്ദീപ് സുര്ജേവാല ട്വീറ്റില് പറഞ്ഞു.
ഡല്ഹിയിലെ കൊവിഡ് രോഗികള്ക്ക് ഓക്സിജനും മരുന്നും മറ്റു സൗകര്യങ്ങളും എത്തിച്ചുനല്കുന്നതിന്റെ പേരില് ബി.വി.ശ്രീനിവാസിനും സംഘത്തിനും വലിയ അഭിനന്ദനങ്ങളാണ് ലഭിച്ചിരുന്നത്. ഡല്ഹിയിലെ എല്ലാ ജില്ലകളിലും ശ്രീനിവാസിന്റെ നേതൃത്വത്തിലുള്ള സന്നദ്ധപ്രവര്ത്തകരുണ്ട്.
ആശുപത്രികളിലെ ഓക്സിജന്, ബെഡ് വിവരങ്ങള് ശേഖരിക്കുകയും ഐ.സി.യു. കിടക്കകള്, ഓക്സിജന് കിടക്കകള്, സിലിണ്ടറുകള്, അവശ്യമരുന്നുകള്, ഡോക്ടര്മാരുമായുള്ള കൂടിക്കാഴ്ച, ശവസംസ്കാരത്തിനുള്ള സഹായം തുടങ്ങിയവയെല്ലാം വളണ്ടിയര്മാര് മുഖേന എത്തിക്കുകയാണ് ഇവര് ചെയ്യുന്നത്.
ന്യൂസിലന്ഡ്, ഫിലിപ്പീന്സ് തുടങ്ങിയ രാജ്യങ്ങളുടെ എംബസികളിലെ കൊവിഡ് രോഗികള്ക്ക് ഓക്സിജന് എത്തിച്ചുനല്കിയത് വാര്ത്തയായിരുന്നു. ഇതിന്റെ വീഡിയോ യൂത്ത് കോണ്ഗ്രസ് ട്വീറ്റ് ചെയ്യുകയും ന്യൂസിലന്ഡ് ഹൈക്കമ്മീഷണര് സഹായത്തിന് നന്ദിയറിയിക്കുകയും ചെയ്തിരുന്നു. ഇത് കേന്ദ്രസര്ക്കാരിനെ പ്രകോപിപ്പിച്ചിരുന്നു. ഇതിന്റെ പേരില് വിദേശകാര്യ മന്ത്രി എസ്. ജയ്ശങ്കറും കോണ്ഗ്രസ് നേതാവ് ജയ്റാം രമേശും തമ്മില് സോഷ്യല് മീഡിയയില് ഏറ്റുമുട്ടലും നടന്നിരുന്നു. പിന്നീട് ന്യൂസിലന്ഡ് എംബസി തങ്ങളുടെ ട്വീറ്റുകള് ഡിലീറ്റ് ചെയ്യുകയും ക്ഷമാപണം നടത്തുകയും ചെയ്തു.
https://www.facebook.com/Malayalivartha