മൊത്തം 10 ജോയിന്റ് സെക്രട്ടറി സ്ഥാനങ്ങളിലേക്കാണ് ഐ എ എസ് ഉദ്യോഗസ്ഥരല്ലാത്തവരില്‍ നിന്ന് കേന്ദ്ര സര്‍ക്കാര്‍ അപേക്ഷ ക്ഷണിച്ചിരിക്കുന്നത്. സ്വകാര്യ, പൊതുമേഖലാ സ്ഥാപനങ്ങളില്‍ നിന്നുള്ളവര്‍ക്കും ജോലിക്കായി അപേക്ഷിക്കാം.

റവന്യു, ഫിനാന്‍ഷ്യല്‍ സര്‍വീസ്, സാമ്പത്തിക കാര്യം, കൃഷി, റോഡ് ഗതാഗതം, ഷിപ്പിംഗ്, പരിസ്ഥിതിവനം, സിവില്‍ ഏവിയേഷന്‍, വാണിജ്യം തുടങ്ങിയ മന്ത്രാലയങ്ങളിലേക്കാണ് ജോയിന്റ് സെക്രട്ടറിമാരെ പുറത്തു നിന്ന് നിയമിക്കുന്നത്. അപേക്ഷകര്‍ ജൂലൈ ഒന്നിന് 40 വയസ് തികഞ്ഞവരായിരിക്കണം. അംഗീകൃത സര്‍വകലാശാലയില്‍ നിന്ന് നേടിയ ബിരുദമാണ് അടിസ്ഥാന യോഗ്യത. മൂന്നുവര്‍ഷത്തേക്ക് കരാര്‍ അടിസ്ഥാനത്തിലായിരിക്കും നിയമനം. ഇത് പിന്നീട് അഞ്ച് വര്‍ഷത്തേക്ക് നീട്ടിയേക്കും.

1.44 ലക്ഷം മുതല്‍ 2.18 ലക്ഷം വരെയാണ് പ്രതിമാസ ശമ്പളം. ഇതിനു പുറമെ മറ്റ് കേന്ദ്ര സര്‍ക്കാരുദ്യോഗസ്ഥര്‍ക്ക് ലഭിക്കുന്ന അലവന്‍സുകളും സൗകര്യങ്ങളും ഉണ്ടാകും. ഉദ്യോഗാര്‍ഥികള്‍ക്ക് കുറഞ്ഞത് 15 വര്‍ഷത്തെ പ്രവര്‍ത്തന പരിചയം വേണം. നിലവില്‍ സമാനമായ മേഖലകളില്‍ ജോലിചെയ്യുന്ന സ്വകാര്യ, പൊതുമേഖലാ സ്ഥാപനങ്ങളില്‍ നിന്നുള്ളവര്‍ക്ക് ജോലിക്കായി അപേക്ഷിക്കാം. അപേക്ഷകള്‍ ഓണ്‍ലൈനായി ജൂലൈ 30നു മുന്‍പ് സമര്‍പ്പിക്കണം.