2020 ജനുവരി ഒന്നിന് മുമ്പ് ഇഖാമ കാലാവധി കഴിഞ്ഞവര്‍ക്ക് പുതുക്കാന്‍ കഴിയില്ല. ഇവര്‍ രാജ്യം വിടേണ്ടിവരും. പിടിക്കപ്പെട്ടാല്‍ ഇവരെ നാടുകടത്തുമെന്ന് ആഭ്യന്തര മന്ത്രാലയത്തിന് കീഴിലുള്ള താമസകാര്യ വകുപ്പ് അറിയിച്ചു. ജനുവരി രണ്ടിനും ഫെബ്രുവരി 29നും ഇടയില്‍ ഇഖാമ കാലാവധി കഴിഞ്ഞവര്‍ക്ക് ആഗസ്റ്റ് 31 വരെ പിഴയില്ലാതെ പുതുക്കിനല്‍കും.

ആര്‍ട്ടിക്കിള്‍ 17, 20, 22, 23, 24 വിസ വിഭാഗത്തിലുള്ളവര്‍ക്ക് താമസാനുമതി ഒരു വര്‍ഷത്തേക്ക് നീട്ടിനല്‍കിയാല്‍ മതിയെന്നും അധികൃതര്‍ തീരുമാനിച്ചു. എന്നാല്‍, ആര്‍ട്ടിക്കിള്‍ 18 കമ്പനി വിസയിലുള്ളവര്‍ക്ക് വര്‍ക്ക് പെര്‍മിറ്റിന് അനുസരിച്ച് പുതുക്കിനല്‍കും.
അതേസമയം കുവൈത്തില്‍ 90,000 സിവില്‍ െഎ.ഡി കാര്‍ഡുകള്‍ വിതരണത്തിന് തയാറായതായി പബ്ലിക് അതോറിറ്റി ഫോര്‍ സിവില്‍ ഇന്‍ഫര്‍മേഷന്‍ അറിയിച്ചു. പ്രതിദിനം 2000 കാര്‍ഡുകള്‍ എന്ന തോതില്‍ വിതരണം ചെയ്യും. സിവില്‍ െഎ.ഡിയുമായി ബന്ധപ്പെട്ട 500 ഇടപാടുകളും ഒരു ദിവസം അനുവദിക്കും. കോവിഡ് കാലമായതിനാല്‍ നിയന്ത്രിതമായി മാത്രമേ സന്ദര്‍ശകരെ അനുവദിക്കുന്നുള്ളൂ.
പബ്ലിക് അതോറിറ്റി ഫോര്‍ സിവില്‍ ഇന്‍ഫര്‍മേഷന്‍ (പാസി) ഓഫിസ് ഞായറാഴ്ച മുതല്‍ തുറന്ന് പ്രവര്‍ത്തിക്കും. രാവിലെ ഒമ്പത് മുതല്‍ ഉച്ചക്ക് ഒന്നു വരെ ഇടപാടുകള്‍ നടത്താം. എന്നാല്‍, സിവില്‍ െഎ.ഡി വിതരണം വൈകീട്ട് അഞ്ചു വരെ ഉണ്ടാവും.

അതോറിറ്റിയുടെ വെബ്‌സൈറ്റ് വഴി അപ്പോയിന്റ്‌മെന്റ് എടുത്തവര്‍ക്ക് മാത്രമാണ് പ്രവേശനം. നേരിട്ടുള്ള സന്ദര്‍ശനം അനുവദിക്കില്ല. ശനിയാഴ്ച മുതല്‍ അപ്പോയിന്റ്‌മെന്റ് എടുക്കാം.