യുഎഇയില് കോവിഡ് നിയമം ലംഘിക്കല്ലേ ... ധനനഷ്ടവും മാനഹാനിയും നിയമങ്ങള് കടുപ്പിച്ചു...കോവിഡ് നിയന്ത്രണങ്ങള് ലംഘിക്കുന്നവര്ക്കെതിരെ ര്ശന നടപടിയുമായി യു.എ.ഇ പബ്ലിക് പ്രോസിക്യൂഷന് രംഗത്ത്
യു.എ.ഇയില് കോവിഡ് നിയന്ത്രണങ്ങള് ലംഘിച്ചാല് കനത്തപിഴ മാത്രമല്ല, നിയമലംഘകരുടെ ഫോട്ടോയും പ്രസിദ്ധീകരിക്കും. യു.എ.ഇ പബ്ലിക് പ്രോസിക്യൂഷനാണ് നിയലംഘകരുടെ ചിത്രങ്ങള് വെളിപ്പെടുത്തുന്ന നടപടിക്ക് തുടക്കം കുറിച്ചിരിക്കുന്നത്.
യു.എ.ഇയില് മാസ്ക് ധരിക്കാതെ പുറത്തിറങ്ങിയാല് പിഴയടച്ച് പോക്കറ്റ് കാലിയാവും എന്ന് മാത്രം പേടിച്ചാല് പോര. നിയമലംഘകരുടെ കൂട്ടത്തില് സ്വന്തം ചിത്രവും കണ്ട് നാണം കെടേണ്ടി വരും. കോവിഡ് നിയന്ത്രണങ്ങള് ലംഘിക്കുന്നവര്ക്കെതിരെ നടപടി കര്ശനമാക്കുന്നതിന്റെ ഭാഗമായാണ് യു.എ.ഇ പബ്ലിക് പ്രോസിക്യൂഷന് ഈ കടുത്ത നടപടിയുമായി രംഗത്തുവന്നിരിക്കുന്നത്.
പൊതുസ്ഥലത്ത് മാസ്ക് ധരിക്കാത്തതിന് പിടിയിലായി മൂവായിരം ദിര്ഹം പിഴയടച്ചവരുടെയും നിയന്ത്രണം ലംഘിച്ച് ഒത്തുചേരല് സംഘടിപ്പിക്കുകയും അതില് പങ്കെടുക്കുകയും ചെയ്തതിന് പതിനായിരം ദിര്ഹം മുതല് അയ്യായിരം ദിര്ഹം വരെ പിഴ അടച്ചവരുടെയും ചിത്രങ്ങള് പ്രസിദ്ധീകരിച്ചിട്ടുണ്ട്.
. 2000 ദിര്ഹം മുതല് 10,000 ദിര്ഹം വരെയാണ് ഈടാക്കിയിരിക്കുന്നത്. 13 പേരുടെ വിവരങ്ങളാണ് യു.എ.ഇ പബ്ലിക് പ്രോസിക്യൂഷന് ട്വിറ്റര് പേജില് പ്രസിദ്ധീകരിച്ചത്. മാസ്ക് ധരിക്കാതിരിക്കല്, കര്ഫ്യൂ നിയമലംഘനം, കൂട്ടംചേരല്, പാര്ട്ടി സംഘടിപ്പിക്കല് എന്നീ കുറ്റങ്ങളാണ് കണ്ടെത്തിയത്. ഇതില് ഏഴുപേര് ഏഷ്യന് സ്വദേശികളാണ്. നാല് അറബ് പൗരന്മാരും രണ്ട് മാറാത്തികളും ഇതില് ഉള്പ്പെടുന്നു.
കര്ഫ്യൂ സമയത്ത് യാത്രചെയ്ത മൂന്നു പേരില്നിന്ന് 3000 ദിര്ഹം വീതം പിഴയീടാക്കി. വാഹനത്തിനുള്ളില് മാസ്ക് ഉപയോഗിക്കാതിരുന്ന മൂന്ന് പേര്ക്കും 3000 ദിര്ഹമാണ് പിഴയിട്ടിരിക്കുന്നത്. കൂട്ടംചേര്ന്നതിനും പാര്ട്ടികള് സംഘടിപ്പിച്ചതിനും അഞ്ച് പേര്ക്ക് പിഴയിട്ടു. കൂട്ടംചേര്ന്നവര്ക്ക് 5000 ദിര്ഹം വീതവും പാര്ട്ടി സംഘടിപ്പിച്ച അറബ് വനിതക്ക് 10,000 ദിര്ഹമുമാണ് പിഴയടക്കേണ്ടത്. വിവിധ എമിറേറ്റുകള് പുറപ്പെടുവിച്ച നിര്ദേശങ്ങള് പാലിക്കാതിരുന്ന രണ്ട് പേര്ക്ക് 2000 ദിര്ഹം വീതവും പിഴയിട്ടതായി പ്രോസിക്യൂഷന് അറിയിച്ചു. രാജ്യത്തെ ജനങ്ങളുടെ ആരോഗ്യ സുരക്ഷ മുന്നിര്ത്തിയാണ് ചിത്രങ്ങള് പുറത്തുവിട്ടതെന്നും നടപടിയെന്നും അധികൃതര് അറിയിച്ചു.
യാത്രവിലക്ക് ലംഘിച്ച് ഒരു എമിറേറ്റില് നിന്ന് മറ്റൊരു എമിറേറ്റിലേക്ക് യാത്ര ചെയ്ത് രണ്ടായിരം ദിര്ഹം പിഴ ലഭിച്ചവരെയും കൂട്ടത്തില് കാണാം.
അതുകൊണ്ട് സൂക്ഷിച്ചാല് ദുഃഖിക്കേണ്ട. നിയമങ്ങള് പാലിച്ചാല് യു.എ.ഇയില് ധനനഷ്ടം ഒഴിവാക്കാം. ഒപ്പം മാനഹാനിയും.
https://www.facebook.com/Malayalivartha
