കോവിഡ് എന്ന മഹാമാരി ലോകത്തെ മുറുകെ പിടിച്ചപ്പോൾ ഏറ്റവും അധികം ദുരിതത്തിലായത് പ്രവാസികൾ തന്നെയാണ്. ജീവനും തൊഴിലിനും കോവിഡ് മൂലം വന്ന പ്രതിസന്ധി വളരെ വലുതാണ്.  ശരിക്കും പ്രതിസന്ധിയിലായിരിക്കുകയാണ് അമേരിക്കയിലുള‌ള ഇന്ത്യന്‍ പൗരന്മാര്‍.

എച്ച്‌ 1-ബി വിസയും മറ്റ് ഉന്നത നൈപുണ്യമുള‌ള ജോലികള്‍ക്കുമുള‌ള വിസകളും വിലക്കിയിരിക്കുകയാണ് അമേരിക്കന്‍ പ്രസിഡന്റ് ഡൊണാൾഡ് ട്രംപ് . മറ്റ് രാജ്യങ്ങളില്‍ നിന്നുള‌ള ഉന്നത ജോലി നൈപുണ്യമുള‌ളവര്‍ക്ക് അമേരിക്കയില്‍ ജോലി ചെയ്യാന്‍ ആവശ്യമുള‌ളതാണ് എച്ച്‌-1 ബി വിസ. ഈ കോവിഡ് കാലത്തിനിടയിലും ഇവര്‍ക്ക് ജോലി സംരക്ഷിക്കപ്പെടും എന്നാണ് ജൂണ്‍ 22ന് ഉത്തരവിറക്കി ട്രംപ് അറിയിച്ചത്. എന്നാല്‍ ആ വാഗ്ധാനങ്ങൾ എല്ലാം പൊള്ളയായിരിക്കുകയാണ്.

ആയിരക്കണക്കിന് ആളുകളാണ് അമേരിക്കയില്‍ വിസ കാലാവധി കഴിഞ്ഞ് പ്രതിസന്ധിയിലൂടെ കടന്നുപോകുന്നത്. പുതുക്കിയ വിസ ലഭിക്കാതെ ജോലി തുടരാനാകില്ല. വര്‍ഷങ്ങളായി കുടുംബത്തോടൊപ്പം അമേരിക്കയില്‍ കഴിയുന്നവര്‍ക്ക് ഇതുമൂലം നേരിടേണ്ടി വരുന്ന പ്രതിസന്ധി വളരെ വലുതാണ്.. ഏച്ച്‌-1 ബി വിസ പ്രതിവര്‍ഷം അപേക്ഷിക്കുന്നവരില്‍ ഏകദേശം 75 ശതമാനവും ഇന്ത്യക്കാരാണ്. പ്രതിവര്‍ഷം 85000 പേര്‍ക്കാണ് വിസ ലഭിക്കാറ്. ഏറിയ പങ്കും ഐടി കമ്ബനികളില്‍ ജോലി ചെയ്യുന്നവരാണ് അപേക്ഷകര്‍.

പത്ത് വര്‍ഷത്തോളം എച്ച്‌1-ബി വിസയില്‍ കുടുംബത്തോടൊപ്പം അമേരിക്കയില്‍ കഴിഞ്ഞവര്‍ പോലും ഇപ്പോള്‍ വിസ കാലാവധി കഴിഞ്ഞതോടെ പ്രതിസന്ധിയിലായിട്ടുണ്ട്. വ്യാപാര സംഘടനയായ നാസ്‌കോം നല്‍കുന്ന വിവരമനുസരിച്ച്‌ ട്രംപ് പുറപ്പെടുവിച്ച ഈ ഉത്തരവ് വഴി തെറ്റിക്കുന്നതും അമേരിക്കന്‍ വിപണിയില്‍ ദൂരവ്യാപക പ്രത്യാഘാതം സൃഷ്ടിക്കുന്നതുമാണ്.ഐടി തൊഴിലാളികളെയും ആശുപത്രിയില്‍ തൊഴില്‍ ചെയ്യുന്നവരെയും ഇന്ത്യന്‍ കമ്ബനികള്‍ ധാരാളമായി അമേരിക്കയിലേക്ക് തൊഴിലിനയക്കുന്നുണ്ട്. ഇത്തരം പ്രശ്നങ്ങള്‍ മൂര്‍ച്ഛിച്ചാല്‍ അവരെ കാനഡയിലേക്കോ മെക്‌സിക്കയിലേക്കോ അയക്കാന്‍ കമ്ബനികള്‍ നിര്‍ബന്ധിതരാകും. ട്രംപ് പുറപ്പെടുവിച്ച ഈ ഉത്തരവിന്റെ പ്രത്യാഘാതം നിരീക്ഷിക്കുകയാണെന്ന് വിദേശകാര്യ മന്ത്രാലയ വക്താവ് അനുരാഗ് ശ്രീവാസ്തവ പറഞ്ഞു.