യുഎഇ കോണ്‍സുലേറ്റിന്റെ മറവിലെ സ്വര്‍ണക്കടത്ത് കേസിന്റെ മുഖ്യ ആസൂത്രകന്‍ ഫൈസല്‍ ഫരീദിനെ യുഎഇ പോലീസ് കസ്റ്റഡിയിലെടുത്തു. ഫൈസലിന്റെ പാസ്പോര്‍ട്ട് റദ്ദാക്കിയതിനെ തുടര്‍ന്ന് ഇയാള്‍ക്ക് രാജ്യം വിടാന്‍ സാധിച്ചിരുന്നില്ല. ഫൈസലിനെതിരേ ലുക്ക്ഔട്ട് നോട്ടീസും പുറപ്പെടുവിച്ചിരുന്നു. കോവിഡ് പരിശോധനകളുടെ ഭാഗമായുള്ള നിരീക്ഷണം ശക്തമായതിനാല്‍ ദുബായില്‍ നിന്ന് മറ്റ് എമിറേറ്റ്സുകളിലേക്ക് മാറാനും ഫൈസലിനു സാധിച്ചില്ല. തുടര്‍ന്ന് മൊബൈല്‍ നമ്പര്‍ പിന്തുടര്‍ന്നാണ് ഇയാള്‍ കഴിയുന്ന കേന്ദ്രം വ്യക്തമായി കണ്ടെത്തുകയായിരുന്നു. ഇയാളെ ഉടന്‍ ഇന്ത്യയിലെത്തിക്കുമെന്നാണ് റിപ്പോര്‍ട്ട്.

കേസിലെ മൂന്നാം പ്രതിയായി യുഎഇയില്‍ താമസിക്കുന്ന ഫൈസല്‍ ഫരീദിനെ എന്‍ഐഎ പ്രതിചേര്‍ത്തത്. ഇതിന് പിന്നാലെ ഫൈസല്‍ ഫരീദിന്റെ ചിത്രങ്ങളും പുറത്തുവന്നിരുന്നു. എന്നാല്‍ എന്‍ഐഎ അന്വേഷിക്കുന്ന ഫൈസല്‍ ഫരീദ് താനല്ലെന്നും സ്വര്‍ണക്കടത്തുമായി തനിക്ക് ബന്ധമില്ലെന്നും ഫൈസല്‍ ഫരീദ് മാധ്യമങ്ങളോട് പറഞ്ഞു. പക്ഷേ, ഫൈസല്‍ ഫരീദിന്റെ വാദം തെറ്റാണെന്നും മാധ്യമങ്ങള്‍ക്ക് മുന്നില്‍ വന്ന വ്യക്തി തന്നെയാണ് എന്‍ഐഎ തേടുന്ന ഫൈസല്‍ ഫരീദെന്ന് അധികൃതര്‍ ഉറപ്പിച്ച് പറഞ്ഞു. കസ്റ്റംസും ഇക്കാര്യം ശരിവക്കുകയായിരുന്നു.

നാട്ടില്‍ ഇടയ്ക്കിടെ വന്നുപോകുന്ന ഫൈസല്‍ ഫരീദിന് അടുത്ത സുഹൃത്തുക്കളായി ചിലരുണ്ടെങ്കിലും കള്ളക്കടത്ത് ബന്ധം ഇവര്‍ക്കൊന്നും അറിയില്ലെന്നാണ് പറയുന്നത്. സ്വര്‍ണക്കടത്ത് കേസ് ചര്‍ച്ചയായ ശേഷവും ഫൈസല്‍ ഫരീദിനോട് ബന്ധപ്പെട്ട സുഹൃത്തുക്കളോടു പോലും അസ്വാഭാവികത ഒട്ടുമില്ലാതെയാണ് ഇയാള്‍ സംസാരിച്ചതും. കൊടുങ്ങല്ലൂരില്‍ നിന്ന് പതിനഞ്ച് കിലോമീറ്റര്‍ അകലെ മൂന്നുപീടിക എം.ഐ.സി. ഓര്‍ഫനേജിന് സമീപത്തെ വീട്ടിലേക്ക് ഫൈസല്‍ അധികം വരാറില്ല.

ഗള്‍ഫില്‍ ആഡംബര ജീവിതം നയിക്കുമ്പോഴും നാട്ടിലെത്തിയാല്‍ ലളിത ജീവിതമാണ് പ്രിയം. കടബാധ്യതയുണ്ടെന്ന് നാട്ടുകാരെ ബോധ്യപ്പെടുത്താനുള്ള നീക്കങ്ങളും ഫൈസല്‍ ഫരീദിന്റെ ഭാഗത്തുനിന്ന് ഉണ്ടാവാറുണ്ട്. ഇയാളുടെ പേരിലുള്ള സ്ഥലം വില്‍പന നടത്തിയും ബാങ്ക് ലോണ്‍ തിരിച്ചടയ്ക്കാതെയും കടബാധ്യത ബോധപൂര്‍വം പ്രദര്‍ശിപ്പിക്കാനുള്ള നീക്കവും നടത്തി. വര്‍ഷങ്ങള്‍ക്കു മുന്നേ മൂന്നുപീടികയിലെ വീട് ഈടുനല്‍കി ലക്ഷങ്ങള്‍ വായ്പയെടുത്തിരുന്നു. ഈ തുക തിരച്ചടയ്ക്കാത്തതിനാല്‍ ജപ്തി നേരിടുകയാണ്. മൂന്നുപീടികയിലെ വീട് അടച്ചിട്ടാണ് ഭാര്യക്കും കുടുംബത്തോടൊപ്പം ദുബായില്‍ കഴിയുന്നത്. നാട്ടിലെ വീടിന്റെ പണി പൂര്‍ത്തിയാക്കാന്‍ ശ്രമിച്ചതുമില്ല. ധനകാര്യ സ്ഥാപനങ്ങളില്‍ നിന്ന് വായ്പയെടുത്ത് തന്റെ വരുമാന സ്രോതസും കള്ളക്കടത്ത് ബന്ധവും മറച്ചുവയ്ക്കാനും ഫൈസല്‍ ഫരീദ് ശ്രമിച്ചതായാണ് ആരോപണം.

ഗള്‍ഫില്‍ തന്നെ കഴിഞ്ഞിരുന്ന പിതാവ് നാട്ടിലെത്തി സമീപത്തെ പള്ളിയില്‍ മുക്രിയായി ജോലി നോക്കുന്നതിനിടെയാണ് കാന്‍സര്‍ ബാധിതനായത്. പിതാവിനെയും മാതാവിനെയും ദുബായിലേക്ക് കൊണ്ടുപോകാനാണ് ഫൈസല്‍ ഫരീദ് അവസാനമായി നാട്ടിലെത്തിയത്. സഹോദരങ്ങള്‍ എല്ലാവരും ഗള്‍ഫിലാണ്. ഫൈസലിന്റെ ബാപ്പ തേപ്പറമ്പില്‍ പരീദ് (67) മാര്‍ച്ച് 31ന് കൊവിഡ് ബാധിച്ച് ദുബായില്‍ മരിച്ചിരുന്നു. അഞ്ചു വര്‍ഷം മുമ്പാണ് ഫൈസലിന്റെ വിവാഹം നടന്നത്. നിശ്ചയ ചടങ്ങുകള്‍ ഗള്‍ഫിലും വിവാഹം നാട്ടിലുമായാണ് നടത്തിയത്. പ്രമുഖരുടെ സാന്നിധ്യം ചടങ്ങിനുണ്ടായിരുന്നു. എറണാകുളം സ്വദേശിയായ ഭാര്യ പ്രവാസി കുടുംബത്തില്‍ നിന്നു തന്നെയാണ്. ചെറുപ്രായത്തിലെ ഗള്‍ഫിലേക്ക് ജോലി അന്വേഷിച്ച് പോയതാണ് ഫൈസല്‍ ഫരീദ്. നാട്ടിലെത്തിയാലും മറ്റുള്ളവരുമായി അകലം പാലിക്കാനാണ് ഇയാള്‍ ശ്രമിക്കാറ്. അതുകൊണ്ടുതന്നെ നാട്ടുകാര്‍ക്കും ഇയാളെ കുറിച്ച് കൂടുതല്‍ അറിവില്ല. എന്നാല്‍ ലളിതജീവിതം നയിക്കുന്ന ഫൈസല്‍ ഫരീദിന് കള്ളക്കടത്തുക്കാരനെന്ന മറ്റൊരു മുഖംകൂടിയുണ്ടെന്ന ആരോപണം ഞെട്ടലോടെയാണ് നാട്ടുകാര്‍ കേട്ടത്.