ഹജ്ജ് കര്മങ്ങള്ക്ക് നാളെ തുടക്കമാകും... കോവിഡ് പശ്ചാത്തലത്തില് കര്ശന ആരോഗ്യ മുന്കരുതലുകള് പാലിച്ചാണ് ഹജ്ജ് കര്മങ്ങള് നടത്തുക
ഈ വര്ഷത്തെ വിശുദ്ധ ഹജ്ജ് കര്മങ്ങള്ക്ക് നാളെ തുടക്കമാകും. കോവിഡ് പശ്ചാത്തലത്തില്, സൗദി അറേബ്യയില് താമസിക്കുന്ന സ്വദേശികളും വിദേശികളുമായ പരിമിത എണ്ണം തീര്ഥാടകരെമാത്രം പങ്കെടുപ്പിച്ച്, കര്ശന ആരോഗ്യ മുന്കരുതലുകള് പാലിച്ചാണ് ഹജ്ജ് കര്മങ്ങള് നടത്തുക. തെരഞ്ഞെടുക്കപ്പെട്ടവരില് 70 ശതമാനം രാജ്യത്തുള്ള വിദേശികളും 30 ശതമാനം സ്വദേശികളുമാണ്.
തീര്ഥാടകര് ബുധനാഴ്ച മിനയില് സംഗമിക്കുന്നതോടെ ഹജ്ജ് കര്മങ്ങള്ക്ക് തുടക്കമാകും. 20 പേര് വീതമുള്ള സംഘങ്ങളാക്കിയാണ് തീര്ഥാടകരെ മിനയിലെത്തിക്കുക. ഓരോ സംഘത്തിനും നേതാവും ആരോഗ്യപ്രവര്ത്തകരും ഉണ്ടാകും. സാമൂഹിക അകലം ഉറപ്പാക്കിയ താമസസൗകര്യങ്ങളാണ് മിനയില് ഒരുക്കിയത്. ബുധനാഴ്ച പകലും രാത്രിയും മിനയില് കഴിഞ്ഞുകൂടുന്ന തീര്ഥാടകര് പിറ്റേന്ന്, സുപ്രധാന ചടങ്ങായ അറഫ സംഗമത്തിനായി പുറപ്പെടും. അറഫയില് പകല് കഴിഞ്ഞ് സൂര്യാസ്തമനത്തിന് ശേഷം മുസ്ദലിഫയിലെത്തും. അവിടെ രാപ്പാര്ത്ത ശേഷം വീണ്ടും മിനയിലെത്തും.വിദേശ നയതന്ത്ര ഉദ്യോഗസ്ഥര്ക്കോ രാഷ്ട്ര പ്രതിനിധികള്ക്കോ ഇത്തവണ അവസരമില്ല.
സര്ക്കാര് ഉദ്യോഗസ്ഥരോ സേവനത്തിലേര്പ്പെട്ടവരോ ഇത്തവണ ഹജ്ജ് നിര്വഹിക്കില്ലെന്ന് ഹജ്ജ് മന്ത്രി വ്യക്തമാക്കിയിട്ടുണ്ട്. താമസകേന്ദ്രങ്ങളിലും തീര്ഥാടകരെത്തുന്ന എല്ലാ സ്ഥലങ്ങളിലും സാമൂഹിക അകലം ഉറപ്പാക്കും. ഇവ നിരീക്ഷിക്കുന്നതിനായി പ്രത്യേക സംഘം രംഗത്തുണ്ട്.
"
https://www.facebook.com/Malayalivartha
