പുതിയ പ്ലാനുമായി ഇത്തിഹാദ് വിമാനക്കമ്പനി. എയർവേയ്സിലൂടെ യാത്ര ചെയ്യുന്നവർക്ക് ടിക്കറ്റ് ചാർജ് ഘട്ടം ഘട്ടമായി അടച്ചു തീർക്കുന്നതാണ് പുതിയ പദ്ധതി. എന്നാൽ വിമാനക്കമ്പനിയുടെ വെബ്സൈറ്റിൽ നിന്നും നേരിട്ട് ബുക്ക് ചെയ്യുന്ന ടിക്കറ്റുകൾക്ക് മാത്രമേ ഈ ഒാഫർ ലഭിക്കുകയുള്ളൂ.

ഗൾഫ് മേഖലയിൽ പൂർണമായും ഒാട്ടോമേറ്റഡ് ഒാൺലൈൻ ഇന്‍സ്റ്റാൾമെന്റ് സംവിധാനം നൽകുന്ന ആദ്യത്തെ വിമാന കമ്പനിയാണ് ഇത്തിഹാദ്. ബാങ്കിന്റെയും തിരഞ്ഞെടുക്കുന്ന യാത്രാ സ്ഥലത്തിന്റെയും അടിസ്ഥാനത്തിലാണ് പണം തിരികെ അടയ്ക്കേണ്ട രീതി തീരുമാനിച്ചിരിക്കുന്നത്. ഗൾഫ് മേഖലയിലെ തിരഞ്ഞെടുത്ത 17 ബാങ്കുകളിൽ നിന്നും മൂന്നു മാസം മുതൽ 6 മാസം വരെയുള്ള കാലയളവിൽ പണം തിരികെ അടയ്ക്കാൻ അവസരമുണ്ട്.

എന്നാൽ വിമാനയാത്രാ നിരക്ക് കൂടുതലായ ഈ അവസരത്തിൽ പദ്ധതി കുടുംബമായി യാത്ര ചെയ്യുന്നവർക്ക് വലിയ സഹായമാണ്. കുടുംബമായി യാത്ര ചെയ്യുന്നവർക്ക് ഒരുമിച്ച് ടിക്കറ്റ് ചാർജ് നൽകേണ്ടിവരുമെന്ന ആശങ്ക വേണ്ട. വലിയ തുകയാണെങ്കിലും ഘട്ടം ഘട്ടമായി അടച്ചുതീർത്താൽ മതി യാത്രക്കാർക്ക് കൂടുതൽ അവസരങ്ങൾ നൽകുന്നതാണ് പുതിയ പദ്ധതിയെന്ന് ഇത്തിഹാദ് എയർവേയ്സ് വൈസ് പ്രസിഡന്റ് പറഞ്ഞു.