മലയാളം പഠിപ്പിക്കാന്‍ മന്ത്രി എ.കെ. ബാലനും സംഘവും യുകെയിൽ
വിദേശരാജ്യങ്ങളില്‍ ജോലി ചെയ്യുന്ന പ്രവാസി മലയാളികളുടെ മക്കള്‍ക്കു മലയാളഭാഷയില്‍ പ്രാവീണ്യം ഉണ്ടാക്കാൻ കഴിഞ്ഞ യു.ഡി.എഫ്‌. സര്‍ക്കാരിന്റെ കാലത്ത്‌ മലയാളം മിഷനുമായി ആരംഭിച്ച പദ്ധതിയുടെ ഭാഗമായി മന്ത്രി എ.കെ. ബാലന്റെ നേതൃത്വത്തില്‍ പത്തംഗ എം.എല്‍.എമാരുടെ സംഘം ലണ്ടനില്‍. മലയാളി സംഘടനകളെയും സ്‌കൂളുകളെയും ബന്ധപ്പെടുത്തി ഭാഷാപരിശീലനം നടത്തുക എന്നതാണ് ലക്ഷ്യം.
എന്നാല്‍ ലണ്ടൻ യാത്രയുടെ ചിത്രങ്ങള്‍ സമൂഹമാധ്യമങ്ങള്‍ വഴി എം.എല്‍.എ.മാര്‍ പങ്കുവെച്ചതോടെയാണ്‌ വിവാദങ്ങൾക്ക് തുടക്കം വീണത്. പദ്ധതിയുടെ പേരില്‍ മന്ത്രിയടക്കമുള്ളവര്‍ ലണ്ടനില്‍ ചുറ്റിയടിക്കുകയാണെന്നാണ്‌ ആരോപണം. അതേസമയം നിയമസഭാംഗങ്ങള്‍ ലണ്ടനിലേക്ക്‌ തിരിച്ചത് ജനപ്രതിനിധികളുടെ പരസ്‌പര ബന്ധപ്പെടല്‍ പരിപാടിയുടെ ഭാഗമായാണെന്നാണ്‌ ഔദ്യോഗിക വിശദീകരണം. കെ.ബി.ഗണേഷ്‌ കുമാര്‍, എ. പ്രദീപ്‌ കുമാര്‍, ചിറ്റയം ഗോപകുമാര്‍, വി.പി. സജീന്ദ്രന്‍, സണ്ണി ജോസഫ്‌, വീണാ ജോര്‍ജ്‌, കെ. കൃഷ്‌ണന്‍, എം. ഉമ്മര്‍ എന്നിവരാണ്‌ മന്ത്രി ബാലനൊപ്പമുള്ളത്‌. 19ന് ലണ്ടനിലേക്കു തിരിച്ച സംഘം 25-ന് മടങ്ങിയെത്തും.
ഇടതുപക്ഷ സാംസ്‌കാരിക സംഘടന ലണ്ടനില്‍ നടത്തുന്ന പരിപാടികളിലും ഇടതുപക്ഷ എം.എല്‍.എ.മാര്‍ പങ്കെടുക്കുന്നുണ്ട്‌. എന്നാല്‍ നിയമസഭാ സെക്രട്ടേറിയറ്റിന്‌ കീഴിലുള്ള ഇന്‍സ്‌റ്റിറ്റ്യൂട്ട്‌ ഓഫ്‌ പാര്‍ലമെന്ററി അഫയേഴ്‌സിന്റെ നേതൃത്വത്തിലുള്ള പരിപാടി പ്രകാരമാണു യാത്ര എന്ന്‌ പാര്‍ലമെന്ററി അഫയേഴ്‌സ്‌ സെക്രട്ടറി ടി.ഒ. സൂരജ്‌ മംഗള ത്തോട്‌ പറഞ്ഞു. വിവിധ രാജ്യങ്ങളിലെ പാര്‍ലമെന്ററി പ്രവര്‍ത്തനങ്ങളെക്കുറിച്ചുള്ള പഠനാര്‍ത്ഥം ഇത്തരം യാത്രകള്‍ നടത്താറുണ്ട്‌. മുമ്പ്‌ കെ.സി. വേണുഗോപാലിന്റെ നേതൃത്വത്തില്‍ ഒരു സംഘം ഇതേ പരിപാടിയുടെ ഭാഗമായി ചൈന സന്ദര്‍ശിച്ചിരുന്നു.
https://www.facebook.com/Malayalivartha
