സാമൂഹ്യമാധ്യമമായ ഫേസ്ബുക്കിലൂടെയാണ് ബ്രസീലിയൻ സുന്ദരിയും ഇന്ത്യൻ യുവാവും പ്രണയത്തിലാകുന്നത്‌. ഒരു വര്‍ഷം മുമ്പാണ് യുവതിയും ഹരിയാനായിലെ യമുനനഗറിലുള്ള ആനന്ദും പരിചയപ്പെടുന്നത്. രണ്ടുപേർക്കും ഭാഷ അറിയില്ല എന്നതാണ് ഈ പ്രണയത്തിന്റെ പ്രത്യേകത. പ്രണയിക്കാനും ഭാഷ വേണ്ട എന്ന് ഈ കമിതാക്കൾ തെളിയിച്ചു. ആനന്ദായിരുന്നു യുവതിക്ക് ആദ്യം ഫ്രണ്ട് റിക്വസ്റ്റ് അയച്ചത്. തുടര്‍ന്നു ഫേസ്ബുക്കിലൂടെ പ്രണയം തളിർക്കുകയായിരുന്നു. ഒടുവിൽ യുവതിക്ക് ആനന്ദിനെ കാണാതെ ജീവിക്കാന്‍ കഴിയില്ല എന്നു തോന്നിയപ്പോള്‍ കാമുകനെത്തേടി മാര്‍ത്ത എന്ന ബ്രസീലിയന്‍ സുന്ദരി രണ്ടു കുട്ടികളെയും ഭര്‍ത്താവിനെയും ഉപേക്ഷിച്ച് ഇന്ത്യയില്‍ എത്തി. ടൂറിസ്റ്റ് വിസയില്‍ ഇന്ത്യയിലേയ്ക്ക് ടിക്കറ്റ് എടുക്കുകയായിരുന്നു.

ഭാഷയറിത്ത ഇവർ ആംഗ്യങ്ങളിലൂടെയും ചിഹ്നങ്ങളിലൂടെയുമായിരുന്നു പ്രണയിച്ചിരുന്നത്. ഇന്ത്യയില്‍ എത്തിയ മാര്‍ത്തയെ വരവേല്‍ക്കാന്‍ ആനന്ദ് വിമാനത്താവളത്തില്‍ കാത്തു നിന്നിരുന്നു. എന്നാല്‍ ഭാര്യയെ കാണാതായതോടെ ഭര്‍ത്താവ് പോലീസില്‍ പരാതി നല്‍കി. പോലീസ് നടത്തിയ അന്വേഷണത്തിലാണു മാര്‍ത്ത ടൂറിസ്റ്റ് വിസയില്‍ ഇന്ത്യയില്‍ എത്തിയ വിവരം ഭര്‍ത്താവ് അറിയുന്നത്. തുടര്‍ന്നു യുവതിയുടെ ഭര്‍ത്താവ് ഇന്ത്യയിലെ ബ്രസീല്‍ എംബസി വഴി ആനന്ദിന്റെ വീടിനടുത്തുള്ള പോലീസ് സ്‌റ്റേഷനില്‍ പരാതി രജിസ്റ്റര്‍ ചെയ്തു. ഇതോടെ പോലീസും ബ്രസീല്‍ എംബസിയിലെ അധികാരികളും ചേര്‍ന്ന് മാര്‍ത്തയെ അവിടെ നിന്നു കൂട്ടി കൊണ്ടു പോരുകയായിരുന്നു. തന്റെ സ്വന്തം ഇഷ്ടപ്രകാരമാണു വന്നത് എന്നും അതു കൊണ്ടു തിരിച്ചു പോകാന്‍ താല്‍പ്പര്യം ഇല്ല എന്നും ഇവര്‍ പറഞ്ഞു. എങ്കിലും അവസാനം ഇവരുടെ നിര്‍ബന്ധത്തിന് വഴങ്ങി യുവതി ബ്രസീലിലേക്ക് പറന്നു.