ഗള്‍ഫിലെ ശക്തമായ ഭൂചലനത്തില്‍ 130 മരണം; രക്ഷാപ്രവര്‍ത്തനം തുടരുന്നു; മലയാളികള്‍ ഏറെയുള്ള ഗള്‍ഫ് മേഖലയിലെ ഈ ചലനത്തിന്റെ പ്രകമ്പം കേരളത്തിലും 

ഗള്‍ഫ് മേഖലയില്‍ ഇന്നലെയുണ്ടായ ഭൂകമ്പത്തില്‍ ശരിക്കും ഞെട്ടി വിറച്ചത് മലയാളികളായിരുന്നു. രാത്രിയേറെയും നിലയാക്കാത്ത ഫോണ്‍വികളായിരുന്നു, ഗള്‍ഫിലോട്ടും ഇങ്ങോട്ടും. ഒരടുത്ത ബന്ധുവെങ്കിലും ഗള്‍ഫിലില്ലാത്ത മലയാളികളില്ല എന്നതാണ് സത്യം. ആ നിലയ്ക്ക് തങ്ങളുടെ പ്രിയപ്പെട്ടവന് ഒന്നും പറ്റിയിട്ടില്ലെന്ന് ഉറപ്പ് വരുത്താനാണ് എല്ലാവരും വിളിച്ചത്. അതേസമയം തനിക്കൊന്നും പറ്റിയിട്ടില്ലും ഇവിടെ വലിയ പ്രശ്‌നമില്ലെന്നും അവരും വിളിച്ചു പറഞ്ഞു കൊണ്ടിരുന്നു. എന്നാല്‍ എല്ലാവരും ഒരുമിച്ച് വിളിച്ചപ്പോള്‍ പല കോളുകളും ജാമായി. അപ്പോള്‍ പലര്‍ക്കും ആകാംക്ഷയായി. ഗല്‍ഫിലുള്ള മറ്റ് ബന്ധുക്കളേയും സുഹൃത്തുക്കളേയും വിളിച്ച് കാര്യമന്വേഷിച്ച് ഉറപ്പ് വരുത്തുന്നതുവരെ പലര്‍ക്കും ഉറക്കം വന്നില്ല. പലരും ഇപ്പോഴും ബന്ധുക്കളെ അന്വേഷിക്കുകയാണ്. ആകാക്ഷ ഇനിയും അവസാനിച്ചിട്ടില്ല. അപകടത്തില്‍ മലയാളികള്‍ ഉള്‍പ്പെട്ടിട്ടുണ്ടോ എന്നും അറിവായിട്ടില്ല.

ഇറാഖ് അതിര്‍ത്തിയിലുണ്ടായ ശക്തമായ ഭൂചലനത്തില്‍ മരണസംഖ്യ 130ആയി. പ്രാദേശിക സമയം രാത്രി 9.20ന് ഇറാഖി കുര്‍ദിസ്ഥാനിലെ ഹലാബ്ജയുടെ തെക്കു പടിഞ്ഞാറ് 30 കിലോമീറ്റര്‍ മാറിയാണ് റിക്ടര്‍ സ്‌കെയിലില്‍ 7.3 രേഖപ്പെടുത്തിയ ഭൂചലനത്തിന്റെ പ്രഭവകേന്ദ്രം. ഇറാഖിലുണ്ടായ ശക്തമായ ഭൂചലനം മധ്യപൂര്‍വേഷ്യയെയും വിറപ്പിച്ചു. കുവൈത്ത്, യുഎഇ, ഇറാന്‍, തുര്‍ക്കി തുടങ്ങിയ രാജ്യങ്ങളിലും ഭൂചലനം അനുഭവപ്പെട്ടു. മരണസംഖ്യ ഇനിയും കൂടാനിടയുണ്ട്. രക്ഷാപ്രവര്‍ത്തനം തുടരുകയാണ്.

ഹലാബ്ജയിലുണ്ടായ ഭൂചലനത്തിന്റെ തുടര്‍ ചലനങ്ങള്‍ കേരളത്തില്‍ ഇടുക്കി ജില്ലയില്‍ ചെറുതോണിയിലും ചെറു ചലനം രൂപപ്പെട്ടു. യുഎഇ, കുവൈറ്റ് ഉള്‍പ്പെടെ പലയിടങ്ങളിലും ശക്തമായ ഭൂചലനം അനുഭവപ്പെട്ടു. ഗള്‍ഫ് മേഖലയില്‍ അതിശക്തമായ ഭൂചലനം ഉണ്ടായതിനു പിന്നാലെ ജപ്പാനിലും ഭൂചലനമുണ്ടായി. ജപ്പാനില്‍ റിക്ടര്‍ സ്‌കെയിലില്‍ 5.8 തീവ്രത രേഖപ്പെടുത്തിയ ഭൂചലനത്തില്‍ ആളപായം ഉണ്ടായതായി കാര്യം വ്യക്തമായിട്ടില്ല. 

കേരളത്തില്‍ ഇടുക്കി ജില്ലയലും ചെറുചലനം അനുഭവപ്പെട്ടു. ചെറുതോണിയിലും സമീപപ്രദേശങ്ങളിലുമായി നേരിയ ഭൂചലനം ഉണ്ടായി. അഞ്ചു മുതല്‍ ഏഴു സെക്കന്‍ഡ് വരെ പ്രകമ്പനം പുലര്‍ച്ചെ 4.52 നാണ് ഉണ്ടായത്. റിക്ടര്‍ സ്‌കെയിലില്‍ 2.4 തീവ്രത രേഖപ്പെടുത്തി.

ഇറാഖ് അതിര്‍ത്തിയില്‍നിന്ന് 15 കിലോമീറ്റര്‍ മാറിയുള്ള സര്‍പോളെ സഹാബ് നഗരത്തിലാണ് ഏറ്റവും കൂടുതല്‍ മരണം ഉണ്ടായിട്ടുള്ളതെന്ന് ഇറാന്റെ എമര്‍ജന്‍സി സര്‍വീസസ് മേധാവി പിര്‍ ഹുസൈന്‍ കൂലിവന്‍ഡ് അറിയിച്ചു. കുറഞ്ഞത് എട്ടു ഗ്രാമങ്ങളില്‍ നാശനഷ്ടങ്ങള്‍ റിപ്പോര്‍ട്ട് ചെയ്തിട്ടുണ്ടെന്ന് ഇറാനിലെ റെഡ് ക്രസെന്റ് സംഘടനയുടെ മേധാവി മോര്‍ടെസ്സ സലിം ഔദ്യോഗിക ടെലിവിഷനായ ഐആര്‍ഐഎന്‍എന്നിനോട് അറിയിച്ചു. ചില ഗ്രാമങ്ങളില്‍ വൈദ്യുതി വിതരണവും ടെലികമ്യൂണിക്കേഷന്‍ സംവിധാനവും തകര്‍ന്നിട്ടുമുണ്ട്. 

മണ്ണിടിച്ചില്‍ ഉണ്ടായി റോഡുകള്‍ തകര്‍ന്നതിനാല്‍ രക്ഷാപ്രവര്‍ത്തക സംഘത്തിനു ദുരന്തബാധിത പ്രദേശങ്ങളിലെത്താന്‍ താമസം നേരിട്ടിരുന്നു. റെഡ് ക്രസന്റിന്റെ 30 സംഘങ്ങളാണു ഭൂകമ്പ ബാധിത പ്രദേശത്തു രക്ഷാപ്രവര്‍ത്തനം നടത്തുന്നത്. ഇറാഖിലെ സുലൈമാനിയ പ്രവിശ്യയില്‍ വീടുകള്‍ തകര്‍ന്നതിനെത്തുടര്‍ന്നു പരിഭ്രാന്തരായ ജനങ്ങള്‍ നഗരത്തിലേക്ക് ഇറങ്ങിയോടുന്നതു കണ്ടതായി രാജ്യാന്ത വാര്‍ത്താ ഏജന്‍സിയായ എഎഫ്പി റിപ്പോര്‍ട്ട് ചെയ്തു. 

പ്രാദേശിക സമയം രാത്രി ഒന്‍പതരയോടെയാണു കുവൈത്തിന്റെ പലഭാഗങ്ങളില്‍ ഭൂചലനം അനുഭവപ്പെട്ടത്. ചിലയിടങ്ങളില്‍ കെട്ടിടങ്ങളിലെ ജനല്‍ ചില്ലകള്‍ തകര്‍ന്നു വീണു. താമസക്കാര്‍ കെട്ടിടങ്ങളില്‍നിന്ന് ഇറങ്ങിയോടി. മംഗഫ്, അഹമ്മദി, ഫിന്‍താസ് തുടങ്ങിയ ഇടങ്ങളിലാണു കൂടുതല്‍ തീവ്രത അനുഭവപ്പെട്ടത്. ഷാര്‍ജയിലും ദുബായിലും ഇതിന്റെ പ്രകമ്പനമുണ്ടായി. 

2003ല്‍ ഇറാനിലെ ബാമിലുണ്ടായ ഭൂകമ്പത്തില്‍ 31,000 പേരാണു കൊല്ലപ്പെട്ടത്. പിന്നീട് 2005ല്‍ 600 പേരും 2012ല്‍ 300 പേരും ഭൂകമ്പത്തില്‍ കൊല്ലപ്പെട്ടു.