വിദേശത്തുവെച്ച് ജീവന്‍പൊലിഞ്ഞ മലയാളികളായ തൊഴിലാളികള്‍ക്ക് കാരുണ്യവുമായി ദോഹയിലെ അലി ഇന്റര്‍നാഷനല്‍ ട്രേഡിങ് കമ്പനി. തൊഴിലാളികളായ ഇവരുടെ കുടുംബത്തിന് ശമ്പളം തുടര്‍ന്നും ലഭിക്കുമെന്ന് കമ്പനിവൃത്തങ്ങള്‍ അറിയിച്ചു. കഴിഞ്ഞ നവംബര്‍ 16ന് രാത്രി ദോഹയിലെ ഇന്‍ഡസ്ട്രിയല്‍ ഏരിയ റോഡ് മുറിച്ചുകടക്കുന്നതിനിടെ വാഹനമിടിച്ച് മരിച്ച മലപ്പുറം തിരൂര്‍ തെക്കന്‍കൂറ്റൂര്‍ പറമ്പത്ത് വീട്ടില്‍ മുഹമ്മദലിയുടെയും (42) കോഴിക്കോട് ഒളവണ്ണ കുളങ്ങരപറമ്പ് വടക്കഞ്ചേരി പ്രവീണ്‍കുമാറിന്റെയും (52) കുടുംബങ്ങളിലേക്കാണ് അറബ് കമ്പനിയുടെ കാരുണ്യമൊഴുകുന്നത്. രണ്ടു പേരും അലി ഇന്റര്‍നാഷനല്‍ ട്രേഡിങ് കമ്പനിയിലെ ജീവനക്കാരായിരുന്നു.

മുഹമ്മദലി മൂന്നു വര്‍ഷവും പ്രവീണ്‍കുമാര്‍ ഒന്നരവര്‍ഷവുമായി കമ്പനിയില്‍ ജോലിക്ക് ചേര്‍ന്നിട്ട്. ഇരുവര്‍ക്കും സ്വന്തമായി വീടില്ല. അടച്ചുറപ്പുള്ള വീട്ടില്‍ കുടുംബത്തെ അന്തിയുറക്കണമെന്ന ആഗ്രഹം ബാക്കിവെച്ചാണ് മറുനാട്ടില്‍വെച്ച് പൊടുന്നനെ അവരുടെ ജീവന്‍ നഷ്ടമാവുന്നത്. നഷ്ടപ്പെട്ടത് തിരിച്ചുകൊടുക്കാന്‍ ആര്‍ക്കുമാകില്ലെങ്കിലും കമ്പനിയുടെ ജനറല്‍ മാനേജറും മലപ്പുറം സ്വദേശിയുമായ മുഹമ്മദ് ഈസ ഒരു കാര്യം ഉറപ്പിച്ചു പറഞ്ഞു, അവര്‍ മരിച്ചാലും അവരുടെ ശമ്പളം കമ്പനി ഉള്ള കാലത്തോളം മുടങ്ങാതെ വീട്ടിലെത്തിക്കുമെന്ന്.

ഈ മാസം മുതല്‍ തന്നെ ശമ്പളം വീടുകളില്‍ എത്തിക്കാനുള്ള നടപടിയെടുക്കുമെന്ന് കമ്പനിവൃത്തങ്ങള്‍ പറഞ്ഞു. 23 ശാഖകളിലായി 210ഓളം ജീവനക്കാരാണ് കമ്പനിയിലുള്ളത്. ഇരുവരുടെയും മൃതദേഹങ്ങള്‍ നാട്ടിലെത്തിച്ചതും കമ്പനിയാണ്. കോഴിക്കോട്ടേക്കുള്ള വിമാനത്തില്‍ രണ്ട് മൃതദേഹങ്ങളും ഒരേ ദിവസം കൊണ്ടുപോകാന്‍ സാധിച്ചില്ല. രണ്ടു ദിവസങ്ങളിലായി കൊണ്ടുപോകേണ്ടി വരുന്നത് കുടുംബങ്ങള്‍ക്ക് പ്രയാസമുണ്ടാക്കുമെന്നതിനാല്‍ കൊച്ചി അന്താരാഷ്ട്ര വിമാനത്താവളം വഴി ഒന്നിച്ചു മറ്റൊരു വിമാനത്തിലാണ് മൃതദേഹങ്ങള്‍ നാട്ടിലെത്തിച്ചത്. കഴിഞ്ഞ ദിവസം നാട്ടില്‍ നടന്ന സംസ്‌കാരച്ചടങ്ങുകളില്‍ നിരവധി പേരാണ് പങ്കെടുത്തത്.