ദുബായില്‍ ഇന്ത്യയുടെ അഭിമാനമായി ഇന്ത്യന്‍ ശുചീകരണ തൊഴിലാളിയായ വെങ്കിട്ടരാമണ മോട്ടോബട്ടോലാല്‍. തുഛമായ ശമ്പളത്തിന് ജോലി ചെയ്യുന്ന വെങ്കിട്ടരാമണ കഴിഞ്ഞ ദിവസം അല്‍ ഖിസീന്റെ തെരുവോരത്ത് കൂടി നടക്കുമ്പോള്‍ ഒരു ബാഗ് ലഭിച്ചു. തുറന്ന് നോക്കിയപ്പോള്‍ നിറയെ വജ്രം പതിച്ച ആഭരണങ്ങള്‍. വെങ്കിട്ടരാമണ നേരെ ഖിസീസ് പൊലീസ് സ്‌റ്റേഷനിലേക്ക് കയറി ചെന്ന് ബാഗ് പൊലീസുകാര്‍ക്ക് കൈമാറി വിവരം പറഞ്ഞു. ബാഗ് തുറന്ന് നോക്കിയ പൊലീസുകാര്‍ അക്ഷരാര്‍ത്ഥത്തില്‍ ഞെട്ടി. 

ബാഗിലുണ്ടായിരുന്നത് ഏതാണ്ട് മൂന്നര കോടി രൂപ വില വരുന്ന ആഭരണങ്ങളായിരുന്നു. ഇത്രയും വിലപിടിപ്പുള്ള ആഭരണങ്ങള്‍ തിരികെ ഏല്‍പ്പിച്ച വെങ്കിട്ടരാമണന്റെ സത്യസന്ധത തിരിച്ചറിഞ്ഞ ദുബായ് പൊലീസ് അദ്ദേഹത്തെ പൊലീസ് സ്‌റ്റേഷനിലേക്ക് വിളിച്ചു വരുത്തി ആദരിച്ചു. അല്‍ ഖിസീസ് പൊലീസ് സ്‌റ്റേഷന്‍ ഡയറക്ടര്‍ ബ്രിഗേഡിയര്‍ യൂസഫ് അബ്ദുള്ള സലീം അല്‍ ഉബൈദിയുടെ സാന്നിധ്യത്തിലായിരുന്നു ചടങ്ങ്. കൈനിറയെ സമ്മാനങ്ങളും സര്‍ട്ടിഫിക്കേറ്റും നല്‍കിയാണ് വെങ്കിട്ടരാമണനെ പൊലീസ് സ്‌റ്റേഷനില്‍ നിന്നും യാത്രയാക്കിയത്.