കഴിഞ്ഞ സംസ്ഥാന ബജറ്റില്‍ ധനകാര്യ മന്ത്രി തോമസ് ഐസക് പ്രഖ്യാപിച്ച പ്രവാസി ചിട്ടികള്‍ മാര്‍ച്ച് ഒന്ന് മുതല്‍ നിലവില്‍ വരുന്നു. ഡിസംബറില്‍ തുടങ്ങുമെന്നാണ് ആദ്യം അറിയിച്ചിരുന്നത്. എന്നാൽ സോഫ്റ്റ്‍വെയര്‍ തയ്യാറാക്കുന്നതിലെ കാലതാമസം കൊണ്ടാണ് മാര്‍ച്ച് വരെ നീണ്ടത്. ചിട്ടിയുടെ നടപടിക്രമങ്ങള്‍ പൂര്‍ണ്ണമായും ഓണ്‍ലൈനായിട്ടായിരിക്കും സംസ്ഥാനത്തിന്റെ വികസന പദ്ധതികളിലേക്ക് മൂന്ന് വര്‍ഷം കൊണ്ട് 10,000 കോടി രൂപ സമാഹരിക്കാന്‍ ലക്ഷ്യമിട്ടാണ് കെ.എസ്.എഫ്.ഇ വഴി ചിട്ടികള്‍ തുടങ്ങുന്നത്.

സമാഹരിക്കുന്ന തുക പ്രയോജനപ്പെടുത്തുന്നത് കിഫ്ബി വഴിയാണ്. ഗള്‍ഫ് രാജ്യങ്ങളിൽ മാത്രമല്ല അമേരിക്ക, യൂറോപ്പ് തുടങ്ങിയ സ്ഥലങ്ങളിലും ചിട്ടി തുടങ്ങുന്നതാണ്. ഇതിലേക്ക് പരമാവധി വരിക്കാരെ ചേര്‍ക്കാന്‍ വിദേശത്ത് വിവിധ മാര്‍ഗ്ഗങ്ങളിലൂടെ വ്യാപക പ്രചാരണം നടത്തും. നിലവില്‍ 10 ലക്ഷം രൂപ വരെയുള്ള ചിട്ടികള്‍ക്കാണ് അനുമതി കിട്ടിയിരിക്കുന്നത്. ഒരു ലക്ഷം പേരെ ഒരു വര്‍ഷത്തിനുള്ളില്‍ ചേര്‍ക്കുകയാണ് ലക്ഷ്യം.