പൊതുമാപ്പ് അവസാനിക്കാന് ഇനി ഒരു മാസം മാത്രം, കുവൈറ്റ് ആഭ്യന്തരമന്ത്രാലയം പരിശോധന ശക്തമാക്കി
പൊതുമാപ്പ് കാലം അവസാനിക്കാന് ഒരുമാസത്തില് താഴെ മാത്രം അവശേഷിക്കെ, കുവൈറ്റ് ആഭ്യന്തരമന്ത്രാലയം അനധികൃത താമസക്കാര്ക്കായി പരിശോധന കര്ശനമാക്കി. മൊത്തം അനധികൃത താമസക്കാരില് മൂന്നില് രണ്ടുപേരും പൊതുമാപ്പിനോട് പുറംതിരിഞ്ഞുനില്ക്കുന്ന സാഹചര്യത്തിലാണ് അധികൃതര് പരിശോധന ആരംഭിച്ചത്. കഴിഞ്ഞ ദിവസങ്ങളില് രാജ്യത്തിന്റെ വിവിധ ഭാഗങ്ങളില് നടത്തിയ പരിശോധനകളില് നിരവധി പേരെ പിടികൂടി.
ആഭ്യന്തരമന്ത്രാലയത്തിന്റെ കണക്കനുസരിച്ച് 1,54,000 അനധികൃതര് താമസക്കാരാണ് രാജ്യത്തുള്ളത്. 50,000ത്തില് താഴെ മാത്രമാണ് പൊതുമാപ്പ് പ്രയോജനപ്പെടുത്തിയത്. 28,000ത്തോളം പേര് നാടുവിട്ടപ്പോള് 20,000ത്തിന് മുകളില് ആളുകള് പിഴയടച്ച് താമസം നിയമവിധേയമാക്കി.ഏപ്രില് 22വരെയാണ് പൊതുമാപ്പ് കാലാവധി. ഏഴുവര്ഷത്തെ ഇടവേളക്കു ശേഷം ജനുവരി 29 മുതലാണ് കുവൈത്ത് താമസനിയമ ലംഘകര്ക്ക് പൊതുമാപ്പ് അനുവദിച്ചത്. അനധികൃത താമസക്കാര്ക്ക് പിഴയോ ശിക്ഷയോ ഇല്ലാതെ രാജ്യംവിടാനും പിഴയടച്ച് രേഖകള് ശരിയാക്കാനും 25 ദിവസമാണ് ആദ്യം അനുവദിച്ചിരുന്നത്. വിവിധ എംബസികളുടെ അഭ്യര്ഥനയെ തുടര്ന്ന് ഇത് പിന്നീട് രണ്ടുമാസം കൂടി നീട്ടി നല്കി.
ആദ്യ ദിവസങ്ങളിലെ ആവേശം പൊതുമാപ്പ് പ്രയോജനപ്പെടുത്തുന്നതില് ഇപ്പോള് കാണുന്നില്ല. എംബസികളിലും താമസകാര്യ ഓഫിസുകളിലും ഇപ്പോള് തിരക്ക് ഇല്ല. ഇന്ത്യക്കാരായ അനധികൃത താമസക്കാരില് പകുതിയിലേറെ പേര് തിരിച്ചുപോവാന് താല്പര്യം കാണിക്കുന്നില്ല.27,000 ഇന്ത്യക്കാര് അനധികൃത താമസക്കാരായി രാജ്യത്തുകഴിയുന്നുണ്ടെന്നാണ് കണക്ക്.
2011ലാണ് രാജ്യത്ത് അവസാനമായി പൊതുമാപ്പ് പ്രഖ്യാപിച്ചത്. മൂന്നു മാസത്തേക്ക് അനുവദിച്ച അന്നത്തെ പൊതുമാപ്പില് അനധികൃത താമസക്കാരില് 25 ശതമാനം പേര് മാത്രമാണ് ഇളവു പ്രയോജനപ്പെടുത്തിയത്. ഇത്തവണ വര്ധനയുണ്ടെങ്കിലും 40 ശതമാനം പോലും എത്തില്ലെന്നാണ് ഇതുവരെയുള്ള കണക്ക് അനുസരിച്ചുള്ള നിഗമനം. പൊതുമാപ്പ് കാലം കഴിഞ്ഞാല് അനധികൃത താമസക്കാരെയും നിയമലംഘകരെയും പിടികൂടാന് ആഭ്യന്തര മന്ത്രാലയം വ്യാപക പരിശോധന നടത്തും. റെയ്ഡില് പിടിക്കപ്പെട്ട് നാടുകടത്തപ്പെടുമ്പോള് ഒരിക്കലും തിരിച്ചുവരാന് കഴിയാത്ത വിധം ഫിംഗര് പ്രിന്റ് എടുത്താണ് വിടുക. കുവൈത്തിലേക്ക് മാത്രമല്ല, ഒരു ജി.സി.സി രാജ്യത്തേക്കും ഇത്തരക്കാര്ക്ക് പിന്നീട് പ്രവേശനമുണ്ടാവില്ല.
പൊതുമാപ്പ് ഉപയോഗപ്പെടുത്തി നാട്ടിലേക്ക് പോകുന്നവരെ കരിമ്പട്ടികയില് ഉള്പ്പെടുത്തില്ലെന്ന് കുവൈത്ത് ആഭ്യന്തര മന്ത്രാലയം വ്യക്തമാക്കിയിട്ടുണ്ട്.ഏപ്രില് 22 കഴിഞ്ഞാല് രാജ്യത്തിന്റെ മുക്കുമൂലകളില് പഴുതടച്ചുള്ള പരിശോധനയുണ്ടാവുമെന്നും എവിടെയും ഒളിച്ചുകഴിയാന് അനുവദിക്കില്ലെന്നും ആഭ്യന്തര മന്ത്രാലയം കഴിഞ്ഞ ദിവസം വ്യക്തമാക്കിയിരുന്നു.ഒരുകാരണവശാലും ഇനി പൊതുമാപ്പ് കാലം നീട്ടിനല്കില്ലെന്നും അധികൃതര് അസന്ദിഗ്ധമായി അറിയിച്ചു.
https://www.facebook.com/Malayalivartha