കുവൈത്തില്‍ പൊതുമാപ്പ് നാളെ അവസാനിക്കും. രാജ്യത്തു താമസരേഖകള്‍ ഇല്ലാതെ കഴിയുന്ന മുഴുവന്‍ വിദേശികളും ആനുകൂല്യം പ്രയോജനപ്പെടുത്തണമെന്ന് താമസകാര്യ വകുപ്പ് അവസാന വട്ടവും അഭ്യര്‍ഥിച്ചു. നാളെ മുതല്‍ അനധികൃത താമസക്കാര്‍ക്കായി പരിശോധന ശക്തമാക്കും. പൊതുമാപ്പ് പ്രയോജനപ്പെടുത്താന്‍ എത്തുന്നവര്‍ക്കായി താമസകാര്യ വകുപ്പ് ആസ്ഥാനത്ത് എല്ലാവിധ സൗകര്യങ്ങളും ഒരുക്കിയിട്ടുണ്ട്. അവധിദിനങ്ങളിലും സേവനം ലഭ്യമായിരിക്കും. നിയമലംഘകര്‍ക്കു പിഴയടച്ച് താമസം നിയമാനുസൃതമാക്കുകയോ അല്ലെങ്കില്‍ പിഴ കൂടാതെ നാട്ടിലേക്ക് തിരിച്ചുപോകുകയോ ചെയ്യാം.

ഇളവുകാലം അവസാനിക്കുന്ന നാളെ മുതല്‍ രാജ്യവ്യാപകമായി പരിശോധന ശക്തമാക്കുമെന്നും അധികൃതര്‍ സൂചന നല്‍കി. താമസകാര്യ വകുപ്പ് പുറത്തുവിട്ട കണക്കുപ്രകാരം 1,54,000 അനധികൃത താമസക്കാരാണ് പൊതുമാപ്പ് പ്രഖ്യാപിക്കുമ്പോള്‍ രാജ്യത്തുണ്ടായിരുന്നത്. അമ്പതിനായിരത്തില്‍പരം ആളുകളാണ് പൊതുമാപ്പിന്റെ ആനുകൂല്യം പ്രയോജനപ്പെടുത്തിയത്.

ഏഴുവര്‍ഷത്തെ ഇടവേളക്കുശേഷം ജനുവരി 29 മുതലാണ് കുവൈത്ത് താമസ നിയമ ലംഘകര്‍ക്ക് പൊതുമാപ്പ് അനുവദിച്ചത്. പൊതുമാപ്പ് ഉപയോഗപ്പെടുത്തി നാട്ടിലേക്ക് പോകുന്നവരെ കരിമ്പട്ടികയില്‍ ഉള്‍പ്പെടുത്തില്ലെന്നും പരിശോധനയില്‍ പിടിക്കപ്പെടുന്നവരെ തിരിച്ചുവരാന്‍ കഴിയാത്ത വിധം ഫിംഗര്‍ പ്രിന്റ് എടുത്തു നാടുകടത്തുമെന്നും അധികൃതര്‍ വ്യക്തമാക്കി. 

എംബസികളുടെയും താമസകാര്യ വകുപ്പിന്റെയും മുന്നറിയിപ്പ് അവഗണിച്ച് ഇവിടെത്തന്നെ തുടരുകയായിരുന്നു താമസനിയമലംഘകരില്‍ മൂന്നില്‍ രണ്ടു ഭാഗവും. 27,000 ഇന്ത്യക്കാര്‍ അനധികൃത താമസക്കാരായി രാജ്യത്തുകഴിയുന്നുണ്ടെന്നാണ് കണക്ക്. ഇവരില്‍ പകുതി മാത്രമേ ഇളവ് ഉപയോഗിച്ചുള്ളൂ.അടുത്തൊന്നും ഇനി പൊതുമാപ്പ് ഉണ്ടാവാനിടയില്ല. 

രാജ്യത്തിന്റെ മുക്കുമൂലകളില്‍ വ്യാപക പരിശോധന നടത്തി മുഴുവന്‍ അനധികൃത താമസക്കാരെയും പിടികൂടി കയറ്റിയയക്കുകയാണ് അധികൃതര്‍ ചെയ്യുക. പൊതുമാപ്പ് പ്രഖ്യാപിച്ചതിനുശേഷം നിര്‍ത്തിവെച്ച പരിശോധന കഴിഞ്ഞദിവസങ്ങളില്‍ ചെറിയ തോതില്‍ പുനരാരംഭിച്ചിട്ടുണ്ട്. അടുത്ത ആഴ്ചയോടെ ഇത് ശക്തിപ്പെടുത്തും. താമസ നിയമലംഘകരായ ഒരാളെയും രാജ്യത്ത് തുടരാന്‍ അനുവദിക്കില്ലെന്നാണ് ആഭ്യന്തര വകുപ്പ് അസന്ദിഗ്ധമായി വ്യക്തമാക്കിയിട്ടുള്ളത്.