പൊതുയിടങ്ങളിൽ നാം പാലിക്കേണ്ട ചില മര്യാദകളുണ്ട്. എന്നാൽ ചിലർ വിമാനത്തിൽ പോലും ഇത് ലംഘിച്ച് പെരുമാറുന്ന ഒട്ടനവധി സംഭവങ്ങളാണ് അടുത്തിടെയായി പുറത്തുവരുന്നത്. ഇപ്പോൾ യാത്രക്കാരിൽ ആരോ ഭക്ഷണാവശിഷ്ടം വിമാനത്തിൽ വിതറിയതിനെ തുടർന്ന് ടേക്ക് ഓഫ് ചെയ്യാന്‍ അനുവദിക്കില്ലെന്ന് എയര്‍ഹോസ്റ്റസ് വാശിപിടിച്ച സംഭവമാണ് പുറത്തുവരുന്നത്. എയര്‍ഹോസ്റ്റസ് ഉറച്ച് നിലപാടിൽ നിന്നതോടെ മണിക്കൂറുകളോളമാണ് വിമാനം വൈകിയത്.

ശനിയാഴ്ച്ച അറ്റ്ലാന്‍റയില്‍ നിന്ന് ടെക്സാസിലേക്ക് പുറപ്പെട്ട സൗത്ത് വെസ്റ്റ് വിമാനത്തിലാണ് വിചിത്രമായ സംഭവങ്ങള്‍ നടന്നത്. അരി കൊണ്ടുള്ള ഒരു വിഭവം ഏകദേശം ഒരു പ്ലേറ്റോളമാണ് വിമാനത്തിലെ പാസേജില്‍ വീണ് കിടന്നത്. ഇത് ശ്രദ്ധയില്‍പ്പെട്ട എയര്‍ ഹോസ്റ്റസുമാരിലൊരാള്‍ ക്ഷുഭിതയാവുകയായിരുന്നു. ഭക്ഷണം നിലത്ത് വീഴ്ത്തിയ ആള്‍ തന്നെ ഇത് വൃത്തിയാക്കണമെന്ന് നിര്‍ബന്ധം പിടിക്കുകയായിരുന്നു. ഇതോടെ വിമാനം ടേക്ക് ഓഫ് ചെയ്യാനാവാത്ത സാഹചര്യം ഉടലെടുക്കുകയായിരുന്നു.

വിമാനത്തില്‍ നടക്കുന്ന സംഭവങ്ങള്‍ യാത്രക്കാര്‍ സമൂഹമാധ്യമങ്ങളിലൂടെ പങ്ക് വച്ചതോടെയാണ് സംഭവം പുറത്തറിയുന്നത്. യാത്രക്കാരിലാരെങ്കിലും മുന്നോട്ട് വന്ന് ഇത് വാരിക്കളയുമെന്ന് കരുതി ചുലുമായി ഇവര്‍ നിന്നുവെന്നുമാണ് സമൂഹമാധ്യമങ്ങളിലെ ചിത്രങ്ങളും പ്രതികരണങ്ങളും വിശദമാക്കുന്നത്. എന്നാല്‍ യാത്രക്കാരില്‍ ആരും തന്നെ ഈ പ്രവര്‍ത്തി ചെയ്തതാരെന്ന് വ്യക്തമാക്കാനോ വൃത്തിയാക്കാനോ മുന്നോട്ട് വരാതിരുന്നതിന് പിന്നാലെ മണിക്കൂറുകള്‍ വൈകി ജീവനക്കാരി തന്നെ വൃത്തിയാക്കുകയായിരുന്നു.

യാത്രക്കാര്‍ക്കെതിരെ ആക്രോശിച്ചുകൊണ്ടായിരുന്നു വൃത്തിയാക്കലെന്നാണ് പ്രാദേശിക മാധ്യമങ്ങള്‍ സംഭവത്തേക്കുറിച്ച് വിശദമാക്കുന്നത്. എന്നാൽ വിമാനത്തിലേക്ക് കയറുമ്പോള്‍ തന്നെ തറയില്‍ മാലിന്യം കിടന്നിരുന്നത് ശ്രദ്ധിച്ചുവെന്നാണ് പല യാത്രക്കാരും പറയുന്നത്. വിമാന ജീവനക്കാരും മനുഷ്യരാണെന്നും ക്ഷീണവും ബുദ്ധിമുട്ടുമെല്ലാം അവര്‍ക്കുമുണ്ടെന്നാണ് സമൂഹമാധ്യമങ്ങളിലെ പ്രതികരണങ്ങളില്‍ ഏറിയ പങ്കും വിശദമാക്കുന്നത്.