ഓസ്ട്രിയയിലെ ആദ്യ മലയാളി അസോസിയേഷനായ വിയന്ന മലയാളി അസോസിയേഷന്‍ (വി എം എ) സംഘടിപ്പിച്ച കായികമേള കുട്ടികള്‍ക്കും മുതിര്‍ന്നവര്‍ക്കും ആവേശമായി. വിയന്നയിലെ മൂന്നാമത്തെ ജില്ലയില്‍ നടന്ന മത്സരങ്ങള്‍ സംഘടനയുടെ പ്രസിഡന്റ് മാത്യൂസ് കിഴക്കെകര ഉദ്ഘാടനം ചെയ്തു. 

കുരുന്നുകളുടെ മിഠായി പെറുക്കല്‍ മത്സരങ്ങളോട് കൂടി മത്സരങ്ങള്‍ ആരംഭിച്ചു. തുടര്‍ന്ന് യുവജനങ്ങള്‍ക്കും, സ്ത്രീകള്‍ക്കും, 50 വയസിനു മുകളില്‍ പ്രായമുള്ളവര്‍ക്കും വിവിധങ്ങളായ ഇനങ്ങള്‍ സംഘടിപ്പിച്ചു. സ്ത്രീകള്‍ക്കും പുരുഷന്മാര്‍ക്കും പ്രത്യേകമായി സംഘടിപ്പിച്ച വടംവലി മത്സരം വളരെ ശ്രദ്ധേയമായി. ആദ്യന്തം ആവേശം വിതറിയ ഫുട്‌ബോള്‍ മത്സരവും അംഗങ്ങള്‍ ഏറെ ആസ്വദിച്ചു.