യു.എ.ഇ.-ഖത്തർ വിമാനസർവീസ് സർവീസിൽ പ്രവാസികൾക്ക് ആശ്വാസകരമായ തീരുമാനമെടുത്തിരിക്കുകയാണ്. ഈ മാസം 18 മുതൽ യു.എ.ഇ.യിൽനിന്ന് ഖത്തറിലേക്ക് വിമാനസർവീസ് തുടങ്ങും എന്ന സന്തോഷകരമായ വാർത്തയാണ് ഇപ്പോൾ പുറത്തു വരുന്നത്... ഷാർജയിൽനിന്ന് ദോഹയിലേക്കാണ് സർവീസുകളുണ്ടാവുക. എയർ അറേബ്യയുടെ ആദ്യ യാത്രാവിമാനം തിങ്കളാഴ്ച പുറപ്പെടും. ദിവസവും സർവീസ് ഉണ്ടാകും. കൂടുതൽ വിവരങ്ങൾ എയർ അറേബ്യ വെബ്‌സൈറ്റിൽ ലഭ്യമാണ്.

ഖത്തർ-ഈജിപ്ത്-ഖത്തർ സർവീസുകളും 18-ന് തുടങ്ങുവാൻ ഇരിക്കുകയാണ് . ഒരാഴ്ചയ്ക്കുള്ളിൽത്തന്നെ ഖത്തറുമായുള്ള വ്യാപാരം, ഗതാഗതം എന്നിവ പുനരാരംഭിക്കുമെന്ന് യു.എ.ഇ. വിദേശകാര്യ സഹമന്ത്രി ഡോ. അൻവർ ഗർഗാഷ് നേരത്തെ അറിയിച്ചിരുന്നു. യു.എ.ഇ.ക്കെതിരേ ഖത്തർ നൽകിയ കേസുകൾ പിൻവലിച്ചതായും വെർച്വൽ വാർത്താസമ്മേളനത്തിൽ മന്ത്രി വ്യക്തമാക്കിയിരുന്നു. നയതന്ത്രകാര്യാലയങ്ങൾ തുറക്കുന്നത് അടക്കമുള്ള കാര്യങ്ങളിൽ ഗൾഫ് രാജ്യങ്ങൾ അതിവേഗ നടപടികളാണ് ഇപ്പോൾ സ്വീകരിച്ചുവരുന്നത്. അൽഉല കരാർ യാഥാർഥ്യമാക്കുന്നതിന് പരിപൂർണ പിന്തുണയും സഹകരണ മനോഭാവമാണ് യു.എ.ഇ.ക്കുണ്ടായിരുന്നത്.