പ്രവാസികൾക്കുള്ള നിയന്ത്രണങ്ങള് ഒഴിവാക്കി, വാക്സിന് എടുക്കാത്തത് ഇനി ഒരു വിഷയമേ...അല്ല, ധൈര്യമായി ഇനി ഒമാനിലേക്ക് പറക്കാം....!
കോവിഡ് നിയന്ത്രണങ്ങള് നീക്കിയതോടെ വാക്സിന് സ്വീകരിക്കാത്തവര്ക്കും ഇനി മുതല് ഒമാനിലേക്ക് പ്രവേശിക്കാം.ആരോഗ്യമന്ത്രാലയ ഉദ്യോഗസ്ഥനെ ഉദ്ധരിച്ചാണ് മാദ്ധ്യമങ്ങള് ഇക്കാര്യം റിപ്പോര്ട്ട് ചെയ്തിട്ടുള്ളത്. കോവിഡ് വ്യാപനം കുറഞ്ഞ സാഹചര്യത്തിലാണ് രാജ്യത്ത് ഏര്പ്പെടുത്തിയിട്ടുള്ള നിയന്ത്രണങ്ങള് ഒഴിവാക്കാന് ഒമാന് സുപ്രീം കമ്മിറ്റി തീരുമാനിച്ചത്.
സിവില് ഏവിയേഷന് അതോറിറ്റിയും കോവിഡ് നിയന്ത്രണങ്ങള് ഒഴിവാക്കിയതായി പ്രഖ്യാപിച്ചിരുന്നു. വാക്സിനേഷന് സര്ട്ടിഫിക്കറ്റ്, പിസിആര് നെഗറ്റീവ് സര്ട്ടിഫിക്കറ്റ്, ഇ മുഷ്രിഫ് രജിസ്ട്രേഷന് സര്ട്ടിഫിക്കറ്റ്, മെഡിക്കല് ഇന്ഷുറന്സ് എന്നീ രേഖകളൊന്നും ഇനി ഒമാനിലേക്കുള്ള യാത്രയ്ക്ക് ആവശ്യമില്ലെന്നാണ് അധികൃതര് അറിയിച്ചിട്ടുള്ളത്.
രാജ്യത്തെ കോവിഡ് വ്യാപന സാഹചര്യം വിലയിരുത്തുന്നതിനായി മെയ് 22ന് ചേര്ന്ന സുപ്രീം കമ്മിറ്റി യോഗം കോവിഡ് മഹാമാരിയുമായി ബന്ധപ്പെട്ട് രാജ്യത്ത് ഏര്പ്പെടുത്തിയ എല്ലാ നിയന്ത്രണങ്ങളും എടുത്തുകളയാന് തീരുമാനം കൈക്കൊണ്ടിരുന്നു.
രാജ്യത്ത് പ്രതിദിന കൊവിഡ് കേസുകളില് വലിയ തോതില് കുറവുണ്ടായ സാഹചര്യത്തില് പ്രതിരോധത്തിനായി രൂപീകൃതമായ സുപ്രീം കമ്മിറ്റിയുടെ പ്രവര്ത്തനങ്ങള് അവസാനിപ്പിച്ചു. 2020 ഫെബ്രുവരിയിലായിരുന്നു കമ്മിറ്റിയുടെ രൂപീകരണം.
വിവിധ മേഖലകളില് ഏര്പ്പെടുത്തിയ നിയന്ത്രണങ്ങള് ഒന്നൊന്നായി നിര്ത്തലാക്കുകയും രാജ്യത്ത് ജനജീവിതം സാധാരണ നിലയിലേക്ക് തിരികെ എത്തുകയും ചെയ്ത സാഹചര്യത്തിലാണ് സുപ്രീം കമ്മിറ്റിയുടെ പ്രവര്ത്തനങ്ങള് അവസാനിപ്പിക്കാന് കഴിഞ്ഞ ദിവസം ചേര്ന്ന മന്ത്രിസഭ യോഗത്തില് സുല്ത്താന് ഹൈത്തം ബിന് താരിഖ് നിര്ദ്ദേശം നല്കിയത്.
https://www.facebook.com/Malayalivartha
