അന്തരീക്ഷ താപനില വലിയ തോതില് വര്ധിച്ചു, ദുബായ് സഫാരി പാര്ക്ക് അടച്ചു, പുതിയ സീസൺ സെപ്റ്റംബര് 27 മുതല്, സന്ദര്ശകര്ക്കായി മനം നിറയെ കാണാൻ പുതിയ തരം ജീവികൾ ഉൾപ്പെടെ നിരവധി കാഴ്ച്ചകൾ...!
സഞ്ചാരികളുടെ മനം കവരുന്ന ദുബായ് സഫാരി പാര്ക്ക് വേനല് അവധി പരിഗണിച്ച് അടച്ചു. അന്തരീക്ഷ താപനില വലിയ തോതില് വര്ധിച്ച സാഹചര്യത്തില് ദുബായ് സഫാരി പാര്ക്ക് മൂന്ന് മാസത്തേക്ക് അടച്ചതായി ദുബായ് മുനിസിപ്പാലിറ്റി അറിയിച്ചു.
ശക്തമായ വേനല് ചൂടില് നിന്ന് പാര്ക്കിലെ മൃഗങ്ങളെ സംരക്ഷിക്കുകയും അവയുടെ ആരോഗ്യ സംരക്ഷണം ഉറപ്പുവരുത്തുകയും ചെയ്യുന്നതിനായാണ് പാര്ക്ക് അടച്ചത്. 2021 സെപ്റ്റംബറില് ആരംഭിച്ച സീസണാണ് ഈ മാസം അവസാനിച്ചത്.
116 ഹെക്ടറില് പരന്നുകിടക്കുന്ന സഫാരി പാര്ക്കില് സസ്തനികള്, പക്ഷികള്, ഉഭയജീവികള് തുടങ്ങി മൂവായിരത്തോളം ജീവജാലങ്ങളുണ്ടെന്നാണ് കണക്ക്. ലോകമെമ്പാടുമുള്ള ജീവജാലങ്ങളെ അവയ്ക്കിണങ്ങിയ കാലാവസ്ഥയും അന്തരീക്ഷവും ഒരുക്കിയാണ് ഇവിടെ പരിപാലിക്കുന്നത്.
ഓരോ വര്ഷവും വേനല്ക്കാലത്ത് സഫാരി പാര്ക്കിലേക്ക് സന്ദര്ശകര്ക്ക് പ്രവേശനം അനുവദിക്കുന്നതല്ല.ദുബായ് സഫാരി പാര്ക്കിൽ സെപ്റ്റംബര് 27 മുതല് ആരംഭിക്കുന്ന പുതിയ സീസണില് പാര്ക്കിലെത്തുന്ന സന്ദര്ശകര്ക്ക് പുതിയ തരം ജീവികളെ കാണാവുന്നതാണ്.
സ്ക്വീറല് മങ്കി, മോന മങ്കി, അറേബ്യന് വുള്ഫ്, നോര്ത്തേണ് വൈറ്റ് ചീക്ഡ് ഗിബ്ബണ് തുടങ്ങിയ ജീവികളെയാണ് കാണാൻ സാധിക്കുന്നത്.എല്ലാ പ്രായത്തിലുള്ള സന്ദര്ശകര്ക്കും ആസ്വദിക്കാവുന്ന വിനോദവും, വിജ്ഞാനവും കോര്ത്തിണക്കിയ നിരവധി കാഴ്ചകളാണ് സഫാരി പാര്ക്കില് ഉള്പ്പെടുത്തിയിട്ടുള്ളത്.
2018-ല് നവീകരണ പ്രവര്ത്തനങ്ങള്ക്കായി രണ്ട് വര്ഷത്തേക്ക് അടച്ചിരുന്നു. സമഗ്രമായ നവീകരണ പ്രവര്ത്തനങ്ങള്ക്കും, നിര്മ്മാണ പ്രവര്ത്തനങ്ങള്ക്കും ശേഷം 2020 ഒക്ടോബര് 5 മുതല് ദുബായ് സഫാരി പാര്ക്ക് സന്ദര്ശകര്ക്കായി തുറന്നുകൊടുത്തിരുന്നു. 2017 ഡിസംബറിലാണ് ദുബായ് സഫാരി പാര്ക്കിന്റെ പ്രവര്ത്തനം ആരംഭിച്ചത്.
https://www.facebook.com/Malayalivartha
