അവധി ആഘോഷിക്കാൻ നാട്ടിലേക്ക് മടങ്ങുന്ന പ്രവാസികൾക്ക് ഒരു പ്രത്യേക മുന്നറിയിപ്പാണ് പങ്കുവയ്ക്കാനുള്ളത്. സൗദി അറേബ്യയിൽ നിന്ന് അവധിക്ക് നാട്ടിൽ പോയി മടങ്ങാത്തവർക്ക് പ്രവേശന വിലക്ക് ഏർപ്പെടുത്താനുള്ള നടപടി സ്വീകരിക്കാനാണ് അധികൃതരുടെ തീരുമാനം. ഒന്നും രണ്ടുമല്ല, മൂന്ന് വർഷത്തേക്കാണ് പ്രവേശന വിലക്ക് ഏർപ്പെടുത്താൻ തീരുമാനിച്ചിരിക്കുന്നത്.

എക്സിറ്റ് റീഎൻട്രി വിസയിൽ നാട്ടിൽ പോയിട്ട് കാലാവധി കഴിഞ്ഞിട്ടും മടങ്ങിവരാത്തവർക്കാണ് മൂന്നുവർഷത്തേക്ക് പ്രവേശനവിലക്ക് ഏർപ്പെടുത്തിയിരിക്കുന്നത്. പഴയ സ്പോൺസറുടെ പുതുക്കിയ വിസയിൽ തിരിച്ചുവരാൻ അവസരമുണ്ടാവും. ഇക്കാര്യം പ്രവാസികൾ പ്രത്യേകം ശ്രദ്ധിക്കണം.

സൗദി പാസ്പോർട്ട് അധികൃതരാണ് ഇത് സംബന്ധിച്ച വിശദാംശങ്ങൾ പങ്കുവയ്ച്ചത്.ഇത്തരക്കാർക്ക് മൂന്നുവർഷത്തേക്ക് രാജ്യത്തേക്ക് തിരിച്ചുവരാനാവില്ലെന്ന് വ്യക്തമാക്കിയിരിക്കുകയാണ്.എന്നാൽ ഫാമിലി വിസയുള്ളവർക്ക് ഈ നിയമം ബാധകമല്ല. അത്തരം വിസയിലുള്ളവർ റീഎൻട്രി വിസയിൽ നാട്ടിൽ പോയി നിശ്ചിത കാലാവധിക്കുള്ളിൽ മടങ്ങിയില്ലെങ്കിലും പുനപ്രവേശന വിലക്കുണ്ടാവില്ലെന്ന് അധികൃതർ വ്യക്തമാക്കി.റീഎൻട്രി വിസയുടെ കാലാവധി തീരുന്ന തീയതി മുതലാണ് മൂന്നുവർഷ കാലയളവ് കണക്കാക്കുന്നത്.

അതുപോലെ തന്നെ സൗദിയിൽ സന്ദര്‍ശക വിസയിൽ എത്തുന്നവര്‍ക്ക് നാല് വിമാനത്താവളങ്ങളില്‍ സൗദി അറേബ്യ പ്രവേശനം വിലക്കിയിരിക്കുകയാണ് .ജിദ്ദ ഉള്‍പ്പടെയുള്ള വിമാനത്താവളങ്ങളില്‍ ജൂണ്‍ ഒമ്പത് മുതല്‍ ഒരു മാസത്തേക്കാണ് വിലക്ക്. ഹജ്ജ് സീസണിന്റെ ഭാഗമായാണ് പുതിയ തീരുമാനം. സൗദിയ വിമാനക്കമ്പനി പുറത്തിറക്കിയ ഒരു വിജ്ഞാപനത്തെ അടിസ്ഥാനമാക്കി പ്രാദേശിക മാധ്യമങ്ങളാണ് ഇക്കാര്യം റിപ്പോര്‍ട്ട് ചെയ്തത്.

ജിദ്ദ, മദീന, യാമ്പു, തായിഫ് എന്നീ വിമാനത്താവളങ്ങളിലൂടെയാണ് സന്ദര്‍ശക വിസകളിലുള്ളവര്‍ക്ക് പ്രവേശനം നിരോധിക്കുന്നത്. ജൂണ്‍ 9 മുതല്‍ ഹജ്ജ് സീസണ്‍ അവസാനിക്കുന്ന ജൂലൈ 9 വരെ ഈ നിരോധനം തുടരുന്നതാണ്. വിദേശത്ത് നിന്നും, സൗദിയില്‍ നിന്നുമെത്തുന്ന ഹജ്ജ് പെര്‍മിറ്റുള്ള യാത്രികര്‍ക്ക് മാത്രമായി നാല് വിമാനത്താവളങ്ങളുടെ പ്രവര്‍ത്തനം പൂര്‍ണ്ണമായും പരിമിതപ്പെടുത്തുന്ന സാഹചര്യത്തിലാണ് വിസിറ്റ് വിസകളിലുള്ളവര്‍ക്ക് ഈ വിമാനത്താവളങ്ങളിലൂടെ പ്രവേശനം വിലക്കുന്നത്.

എന്നാല്‍ ഇവര്‍ക്ക് റിയാദ് അന്താരാഷ്ട്ര വിമാനത്താവളത്തിലൂടെ സൗദി അറേബ്യയിലേക്ക് പ്രവേശിക്കാവുന്നതാണ്. പക്ഷേ വിസിറ്റ് വിസയുള്ളവരുടെ പക്കല്‍ റൗണ്ട് ട്രിപ്പ് ടിക്കറ്റ് ഉണ്ടായിരിക്കണം. ഇതുമായി ബന്ധപ്പെട്ട് സൗദിയ ട്രാവല്‍ ഏജന്‍സികളെയും, ടൂറിസം സ്ഥാപനങ്ങളെയും ഇക്കാര്യം പ്രത്യേക അറിയിപ്പിലൂടെ അറിയിച്ചിട്ടുണ്ടെന്നാണ് മാധ്യമ റിപ്പോര്‍ട്ടുകള്‍.