കഴിഞ്ഞ രണ്ട് ദിവസങ്ങൾ മുമ്പാണ് കുവൈത്തിൽ ശക്തമായ ഭൂചലനം ഉണ്ടായത്. റിക്‌ടര്‍ സ്‌കെയിലില്‍ 4.4 രേഖപ്പെടുത്തിയ ഭൂചലനം ആണ് രേഖപ്പെടുത്തിയത് എന്നായിരുന്നു റിപ്പോർട്ടുകൾ. കുവൈത്തിന് തെക്കുപടിഞ്ഞാറ് അല്‍ അഹ്‌മദിയില്‍ ഭൂകമ്പം അനുഭവപ്പെട്ടത്.

ഭൂചലനത്തെ തുടർന്ന് നാശനഷ്‌ടങ്ങളോ ആള്‍നാശമോ ഒത്തുതന്നെ റിപ്പോര്‍ട്ട് ചെയ്‌തിരുന്നില്ല.എന്നാൽ ഇപ്പോൾ പുറത്തുവരുന്ന റിപ്പോർട്ടുകൾ അൽപ്പം ആശങ്കപ്പെടുത്തുന്നതാണ്. കുവൈത്തില്‍ കഴിഞ്ഞ ദിവസം അനുഭവപ്പെട്ടത് നൂറ്റാണ്ടിലെ ഏറ്റവും ശക്തമായ ഭൂചലനമെന്ന് റിപ്പോര്‍ട്ട്.

കഴിഞ്ഞ 90 വര്‍ഷങ്ങള്‍ക്കിടയില്‍ നിരവധി ചെറുചലനങ്ങള്‍ കുവൈത്തില്‍ അനുഭവപ്പെട്ടതായും റിപ്പോര്‍ട്ടില്‍ പറയുന്നു.കുവൈത്ത് സയന്റിഫിക് റിസര്‍ച് സെന്ററില്‍നിന്നുള്ള കണക്കുകള്‍ അടിസ്ഥാനമാക്കി പ്രാദേശിക മാധ്യമമാണ് ഇക്കാര്യം റിപ്പോര്‍ട്ട് ചെയ്തത്.

ഭൂചലനങ്ങള്‍ നല്‍കുന്ന മുന്നറിയിപ്പ് വളരെ വലുതാണ്. ദുരന്തങ്ങളെയും പ്രതിസന്ധികളെയും നേരിടാന്‍ സംയോജിത നയം അടിയന്തരമായി രൂപവത്കരിക്കണമെന്നും കുവൈത്ത് സയന്റിഫിക് റിസര്‍ച് ഇന്‍സ്റ്റിറ്റ്യൂട്ടിലെ കുവൈത്ത് നാഷനല്‍ സീസ്മിക് മോണിറ്ററിങ് നെറ്റ്‍വര്‍ക്ക് സൂപ്പര്‍വൈസര്‍ ഡോ. അബ്‍ദുല്ല അല്‍ ഇന്‍സി പറഞ്ഞു. ഭൂചലനത്തിന്റെ കാരണങ്ങള്‍ കൃത്യമായി നിര്‍വചിക്കപ്പെട്ടിട്ടില്ലെങ്കിലും എണ്ണ ഖനനവുമായി ഇതിനു ബന്ധമുണ്ടാകാനുള്ള സാധ്യത ഉള്ളതായും അദ്ദേഹം കൂട്ടിച്ചേര്‍ത്തു.

റിപ്പോർട്ടുകൾ പരിശോധിക്കുകയാണെങ്കിൽ  1931ലും 1993ലുമാണ് കഴിഞ്ഞ 90 വര്‍ഷത്തിനിടയിലെ ഏറ്റവും തീവ്രതയുള്ള ഭൂചലനങ്ങള്‍ രാജ്യത്ത്‌ ഉണ്ടായത്‌. 4.8 ഡിഗ്രി തീവ്രതയാണ് ഈ രണ്ട്‌ ചലനങ്ങളിലും രേഖപ്പെടുത്തിയത്.എന്നാൽ കുവൈത്തിൽ കഴിഞ്ഞ ദിവസമുണ്ടായത് യു.എ.ഇയിലെ ദേശീയ കാലാവസ്ഥാ കേന്ദ്രത്തില്‍ രേഖപ്പെടുത്തിയതനുസരിച്ച്‌ 5.5 ആണ് ഭൂകമ്പ തീവ്രത.

2019 ലാണ് പിന്നെ രാജ്യത്ത് ഏറ്റവും കൂടുതല്‍ ചെറുചലനങ്ങള്‍ അനുഭവപ്പെട്ടത്. ഇറാനില്‍ അനുഭവപ്പെട്ട ഭൂകമ്ബത്തിന്റെ പ്രകമ്പനത്തിന്റെ ഫലമായിരുന്നു ഇതെല്ലാം. 2019 ൽ തന്നെ സെപ്റ്റംബര്‍, ഒക്ടോബര്‍, നവംബര്‍ മാസങ്ങളിലായി നാലു തവണയാണ് ഭൂചലനം രേഖപ്പെടുത്തിയത്.1931 മുതല്‍ 2022 വരെയുള്ള കാലയളവില്‍ രാജ്യത്ത്‌ അനുഭവപ്പെട്ട ഭൂചലനങ്ങളില്‍ 25 എണ്ണം 3.8 ഡിഗ്രിയില്‍ കൂടുതല്‍ തീവ്രത രേഖപ്പെടുത്തിയതായാണ് കണക്കുകള്‍. നാലോ അതിന് മുകളിലോ തീവ്രത രേഖപ്പെടുത്തിയ 13 ഭൂചലനങ്ങളും ഇക്കാലയളവില്‍ രേഖപ്പെടുത്തിയിട്ടുണ്ട്.എന്തായാലും ഈ കണക്കുകളെല്ലാം തന്നെ വളരെയേറെ ആശങ്കപ്പെടുത്തുന്നതാണ്.