പുതിയ കുവൈത്ത് പ്രധാനമന്ത്രിയെ ഈ ആഴ്ച്ച തന്നെ പ്രഖ്യാപിക്കുമെന്ന് റിപ്പോര്‍ട്ട്. ജൂലൈ 19 ചൊവ്വാഴ്ച പുതിയ പ്രധാനമന്ത്രിയെ പ്രഖ്യാപിക്കാനാണ് സാധ്യത എന്നാണ് ഉന്നതവൃത്തങ്ങളെ ഉദ്ധരിച്ച്‌ പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നത്. അതിനു ശേഷം ഏതാനും ദിവസത്തിനകം അദ്ദേഹം മന്ത്രിസഭാംഗങ്ങളെ തിരഞ്ഞെടുക്കും.

ഈ മാസം അവസാനമോ അടുത്തമാസം തുടക്കമോ മന്ത്രിമാര്‍ സത്യപ്രതിജ്ഞ ചെയ്യും. ബജറ്റിന് അംഗീകാരം നല്‍കാനായി മന്ത്രിമാര്‍ പാര്‍ലമെന്റില്‍ ഹാജരാകും.മറ്റു നിയമ നിര്‍ദേശങ്ങളിലെ ചര്‍ച്ചകളൊന്നും ഈ സെഷനില്‍ ഉണ്ടാകില്ലെന്നാണ് റിപ്പോര്‍ട്ട്.

പാര്‍ലമെന്റ് സെപ്റ്റംബറിലോ ഒക്ടോബറിലോ പിരിച്ചുവിട്ട് തെരഞ്ഞെടുപ്പ് പ്രഖ്യാപിക്കാന്‍ ഇടയുള്ളതിനാല്‍ പുതിയ മന്ത്രിസഭക്ക് ആയുസ്സ് കുറവായിരിക്കും. പാര്‍ലമെന്റ് പിരിച്ചുവിട്ട് രണ്ട് മാസത്തിനകം തെരഞ്ഞെടുപ്പ് നടത്തും. ഇതോടൊപ്പം വീണ്ടും പുതിയ മന്ത്രിസഭയും നിലവില്‍ വരും.

26 എം.പിമാര്‍ കുറ്റവിചാരണക്ക് നോട്ടീസ് നല്‍കിയതിനെ തുടര്‍ന്ന് കഴിഞ്ഞ ഏപ്രിലിലാണ് പ്രധാനമന്ത്രി ശൈഖ് സബാഹ് ഖാലിദ് അല്‍ ഹമദ് അസ്സബാഹ് രാജിവെച്ചത്. അദ്ദേഹത്തിന്റെ നേതൃത്വത്തിലുള്ള കാവല്‍ മന്ത്രിസഭയാണ് മൂന്നുമാസമായി രാജ്യം നിയന്ത്രിക്കുന്നത്.

അതേസമയം, കോവിഡ് മഹാമാരി നേരിടുന്നതിൽ രാജ്യത്തിന്റെ ആരോഗ്യ സംവിധാനം വലിയ നേട്ടമാണ് കൈവരിച്ചെന്ന് ആരോഗ്യ മന്ത്രി ഡോ. ഖാലിദ് അൽ സയീദ് പറഞ്ഞു. എപ്പിഡെമിയോളജിക്കൽ സാഹചര്യം നിലവിൽ സുസ്ഥിരവും, ആശ്വാസകരവുമാണെന്നും ഉയർന്ന നിലയിലാണെങ്കിലും സംവിധാനം മികച്ചതാണെന്നും അദ്ദേഹം പറഞ്ഞു.

പ്രത്യേകിച്ച് പെരുന്നാൾ ആയതിനാൽ കൂടുതൽ ശ്രദ്ധ വേണമെന്നും അദ്ദേഹം പറഞ്ഞു. അടച്ചതും തിരക്കേറിയതുമായ സ്ഥലങ്ങളിൽ മാസ്ക് ധരിക്കാനും പ്രായമായവരെ ശ്രദ്ധിക്കണമെന്നും അധികൃതർ അറിയിച്ചു.