സൗദിയിൽ ശക്തമായ മഴയ്ക്കും ഇടിമിന്നലിനും സാധ്യത, കിഴക്കന് മേഖലകളില് ശക്തമായ മഴ ലഭിക്കുമെന്ന് പ്രവചനം, ജനങ്ങള് ജാഗ്രത പാലിക്കണമെന്ന് കാലാവസ്ഥാ കേന്ദ്രത്തിന്റെ മുന്നറിയിപ്പ്
സൗദിയിലെ വിവിധ മേഖലകളില് വരും ദിവസങ്ങളിൽ ശക്തമായ മഴയ്ക്ക് സാധ്യതയുണ്ടെന്ന മുന്നറിയിപ്പ് നല്കി കാലാവസ്ഥാ കേന്ദ്രം. ശക്തമായ മഴയ്ക്കൊപ്പം ഇടിമിന്നലും അനുഭവപ്പെടും ആലിപ്പഴം വീഴ്ച്ചയ്ക്കും സാധ്യതയുള്ളതായി മുന്നറിയിപ്പിൽ പറയുന്നു.സൗദിയുടെ വിവിധ ഭാഗങ്ങളില് ജൂലൈ 10 മുതല് ജൂലൈ 14 വരെ ശക്മായ മഴയ്ക്ക് സാധ്യതയുണ്ടെന്നാണ് മുന്നറിയിപ്പ്.
കാറ്റ് മൂലം അന്തരീക്ഷത്തില് പൊടി ഉയരുന്നതിനും, കാഴ്ച മറയുന്നതിനും സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു. സൗദിയുടെ കിഴക്കന് മേഖലകളില് ശക്തമായ മഴ ലഭിക്കുമെന്നാണ് പ്രവചനം. റിയാദിന്റെ തെക്കന് മേഖലകളിലും ശക്തമായ മഴ തുടരാന് സാധ്യതയുണ്ടെന്നും കാലാവസ്ഥാ വിദഗ്ധര് വ്യക്തമാക്കി. ബത്ത പോര്ട്ട്, എംപ്റ്റി ക്വാര്ട്ടര് മരുഭൂ പ്രദേശങ്ങള് തുടങ്ങിയ കിഴക്കന് മേഖലകളില് ശക്തമായ മഴ അനുഭവപ്പെടും. ജനങ്ങള് ജാഗ്രത പാലിക്കണമെന്നും മുന്നറിയിപ്പുണ്ട്.
മാത്രമല്ല, യുഎഇയില് പലയിടങ്ങളിലും കനത്ത മഴയാണ് അനുഭവപ്പെടുന്നത്. മഴയുടെ പശ്ചാത്തലത്തില് വാഹനമോടിക്കുന്നവര് ജാഗ്രത പുലര്ത്തണമെന്ന് അബുദാബി പൊലീസ് മുന്നറിയിപ്പ് നല്കി. വാഹനമോടിക്കുമ്പോള് ഇലക്ട്രോണിക് ഇന്ഫര്മേഷന് ബോര്ഡുകളില് മാറിവരുന്ന വേഗപരിധി പാലിക്കണമെന്ന് അധികൃതര് വ്യക്തമാക്കി.
വാഹനയാത്രികര്ക്ക് ആഭ്യന്തര മന്ത്രാലയവും മുന്നറിയിപ്പ് നല്കിയിട്ടുണ്ട്. അല് ഐന് നഗരത്തിലുള്പ്പെടെ യുഎഇയുടെ വിവിധ ഭാഗങ്ങളില് ശക്തമായ മഴ ലഭിച്ചതോടെ താപനില കുറഞ്ഞു. അബുദാബി, ഷാര്ജ, ദുബൈ തുടങ്ങിയ എമിറേറ്റുകളില് മേഘാവൃതമായ അന്തരീക്ഷമായിരുന്നു. വരും ദിവസങ്ങളിലും വിവിധ മേഖലകളില് മഴ ലഭിക്കാനുള്ള സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
അതേസമയം, ഒമാനില് ശക്തമായ മഴ തുടരുമെന്ന് കാലാവസ്ഥാകേന്ദ്രം അറിയിച്ചു. തിങ്കളാഴ്ചവരെ മിക്ക ഗവര്ണറേറ്റുകളിലും മഴപെയ്യാന് സാധ്യതയുണ്ട്. മസ്കറ്റ്, നോര്ത്ത് അല് ശര്ഖിയ, സൗത്ത് അല് ശര്ഖിയ, അല് ദാഖിലിയ, നോര്ത്ത് അല് ബത്തീന, സൗത്ത് ആള് ബത്തീന, അല് ബുറൈമി, അല് ദഹിരാ, അല് വുസ്ത, ദോഫാര് തുടങ്ങിയ ഗവര്ണറേറ്റുകളില് ഒറ്റപ്പെട്ടരീതിയില് പകല്സമയങ്ങളിലും, വൈകീട്ടും ഇടിയോടുകൂടിയ മഴയ്ക്ക് സാധ്യതയുണ്ട്.
ഇതോടൊപ്പം 30 മുതല് 70 കിലോമീറ്റര് വരെ വേഗതയില് കാറ്റ് അനുഭവപ്പെടാമെന്നും കടലിലിറങ്ങുന്നത് ഒഴിവാക്കണമെന്നും കാലാവസ്ഥാ കേന്ദ്രം മുന്നറിയിപ്പ് നല്കിയിട്ടുണ്ട്. അതേസമയം തിങ്കളാഴ്ചയോടെ മഴയുടെ ശക്തി കുറയാനിടയുണ്ടെന്നും കാലാവസ്ഥാകേന്ദ്രം സൂചിപ്പിച്ചിട്ടുണ്ട്.
https://www.facebook.com/Malayalivartha
