സൗദിയിൽ തീപിടിത്തത്തില്‍ പ്രവാസിക്ക് ദാരുണാന്ത്യം. റിയാദിലെ കാര്‍ സര്‍വീസ് സ്റ്റേഷനിലുണ്ടായ തീപിടുത്തത്തില്‍ തിരുവനന്തപുരം സ്വദേശിയാണ് മരിച്ചത്. മണ്ണാംകോണം സ്വദേശി അമ്പത്തിരണ്ട് വയസുള്ള റോബര്‍ട്ട് ജോണ്‍ ആണ് മരിച്ചത്. ‌ദീര്‍ഘകാലം സൗദിയിൽ ജോലിചെയ്യുകയായിരുന്നു റോബര്‍ട്ട്. എന്നാൽ ഒരു മാസം മുമ്പാണ് പുതിയ വിസയില്‍ റിയാദിലേക്ക് തിരിച്ചെത്തിയത്.

ബുധനാഴ്ച പുലര്‍ച്ചെയാണ് റിയാദിൽ കാര്‍ സര്‍വീസ് സ്റ്റേഷനിൽ തീപിടുത്തമുണ്ടായത്. സുലൈയില്‍ നാഷനല്‍ ഗാര്‍ഡ് ആശുപത്രിക്ക് സമീപ സനായിലെ സര്‍വീസ് സ്റ്റേഷനുകളിൽ ഒന്നിലാണ് തീപിടിത്തമുണ്ടായത്. അഗ്നിബാധയുണ്ടായ സമയത്ത് കാര്‍ സര്‍വീസ് സ്റ്റേഷനില്‍ പതിനെട്ടുപേരായിരുന്നു ഉണ്ടായിരുന്നത്.

എന്നാൽ റോബര്‍ട്ട് ഒഴികെ എല്ലാവരും പുറത്തേക്കോടി രക്ഷപ്പെടുകയായിരുന്നു. തീപിടുത്ത ഉണ്ടായ സമയത്ത് റോബര്‍ട്ട് നല്ല ഉറക്കത്തിലായിരുന്നു. കൂടെയുണ്ടായിരുന്നവര്‍ അദ്ദേഹത്തെ വിളിച്ചുണര്‍ത്തിയിട്ടാണ് പുറത്തേക്കോടി രക്ഷപ്പെട്ടത് എന്നാണ് അറിയാൻ സാധിക്കുന്നത്.

അതേസമയം, കഴിഞ്ഞ ദിവസവും സൗദി തലസ്ഥാന നഗരത്തിൽ ഒരു വ്യാപാര കെട്ടിട സമുച്ചയത്തില്‍ തീപിടിത്തം ഉണ്ടായി അല്‍ഫൈഹാ ഡിസ്ട്രിക്ടില്‍ വ്യാപാര സ്ഥാപനങ്ങള്‍ പ്രവര്‍ത്തിക്കുന്ന ബഹുനില കെട്ടിടത്തിലാണ് തിങ്കളാഴ്ച്ച അഗ്‌നിബാധ ഉണ്ടായത്. കെട്ടിടത്തില്‍ വൈദ്യുതി മീറ്ററുകള്‍ സ്ഥാപിച്ച മുറിയിലാണ് തീ ആദ്യം പടര്‍ന്നുപിടിച്ചത്.

വൈകാതെ കൂടൂതല്‍ സ്ഥലത്തേക്ക് തീ പടര്‍ന്നുപിടിക്കുകയായിരുന്നു. കെട്ടിടത്തില്‍ പ്രവര്‍ത്തിക്കുന്ന റെസ്റ്റോറന്റ് ഏറെക്കുറെ പൂര്‍ണമായും കത്തിനശിക്കുകയുണ്ടായി. കെട്ടിടത്തിന്റെ മറ്റു ഭാഗങ്ങളിലും കേടുപാടുകള്‍ സംഭവിച്ചു. സിവില്‍ ഡിഫന്‍സ് യൂണിറ്റുകള്‍ എത്തിയാണ് തീയണച്ചത്.എന്നാൽ അപകടത്തിൽ ആര്‍ക്കും പരിക്കില്ലെന്ന് സിവില്‍ ഡിഫന്‍സ് അറിയിച്ചത്.