ഒരോ ദിവസം പിന്നിടുമ്പോഴും ഇന്ത്യൻ രൂപയുടെ മൂല്യം കൂപ്പുകുത്തികൊണ്ടിരിക്കുകയാണ്. ഇതോടെ ഗൾഫ് കറൻസികളുടെ വിനിമയമൂല്യം ചരിത്രത്തിലെ ഏറ്റവും ഉയർന്ന നിലയിലെത്തി നിൽക്കുകയാണ്. ആദ്യമായി ഒരു ഡോളറിന് 80 രൂപ എന്ന നിലയിലേക്ക് മൂല്യം ഇടിഞ്ഞതോടെയാണിത്. ഇതോടെ പ്രവാസികൾ എല്ലാവരും രൂപയുടെ മൂല്യം ഇടിഞ്ഞതോടെ നാട്ടിലേക്ക് പണം അയയ്ക്കാനുള്ള നേട്ടോട്ടത്തിലാണ്.

രൂപയുടെ മൂല്യം ഇടിഞ്ഞതോടെ ഒരു യു.എ.ഇ ദിർഹമിന് 21 രൂപ 77 പൈസ എന്ന നിലയിലേക്ക് വിനിമയ നിരക്ക് ഉയർന്നു. സൗദി റിയാൽ 21 രൂപ 28 പൈസ എന്ന നിലയിലേക്കും ഖത്തർ റിയാൽ 21 രൂപ 97 പൈസയിലേക്കും എത്തി. ഒമാനി റിയാലിൻറെ മൂല്യം 207 രൂപ 73 പൈസയായി. ഏറ്റവും ഉയർന്ന മൂല്യമുള്ള കുവൈത്ത് ദീനാർ 259 രൂപ 91 പൈസയിലേക്ക് കുതിച്ചു.

ബഹ്റൈൻ ദീനാറാകട്ടെ 212 രൂപ 17 പൈസയിലേക്കും ഉയർന്നു. ഉയരുന്ന ക്രൂഡ് ഓയിൽ വിലയും ഡോളറിൻറെ മൂല്യവും ഇന്ത്യൻ രൂപയുടെ മൂല്യം കൂടുതൽ തളർത്തുകയാണ്. റഷ്യ- യുക്രെയ്ൻ യുദ്ധം തുടങ്ങിയപ്പോഴുണ്ടായ രൂപയുടെ മൂല്യത്തകർച്ച ആഗോള വിപണിയിലെ പുതിയ സംഭവവികാസങ്ങളിൽ കൂടുതൽ ശോചനീയമാവുകയാണ്.

റിസർവ് ബാങ്കിൻറെ ഇടപെടൽ ശക്തമായില്ലെങ്കിൽ അടുത്തദിവസങ്ങളിൽ വീണ്ടും രൂപയുടെ മൂല്യം താഴേക്ക് പോകുമെന്നാണ് സൂചന.ഉയരുന്ന പണപ്പെരുപ്പം ആഗോള സാമ്പത്തിക മാന്ദ്യത്തിന് കാരണമാകുമെന്ന ആശങ്കകളെ തുടർന്ന് ഡോളറിൽ നിക്ഷേപം എത്തിയതാണ് പതിറ്റാണ്ടിലെ റെക്കോർഡ് മൂല്യത്തിലേക്ക് ഡോളറിനെ എത്തിച്ചത്. ക്രൂഡ് ഓയിൽ വിലയാകട്ടെ അന്താരാഷ്ട്ര വിപണിയിൽ ഉയന്ന് നിൽക്കുകയാണ്.

രൂപയുടെ മൂല്യം കൂപ്പുകുത്തിയതോടെ കടം വാങ്ങിയാണ് പ്രവാസികൾ പലരും നാട്ടിലേക്ക് പണം അയയ്ക്കുന്നത്. ലേബർ ക്യാമ്പുകളിൽ ജോലി ചെയ്യുന്നവരും താഴ്ന്ന വരുമാനക്കാരും ഉൾപ്പെടെ പണം അയയ്ക്കാൻ തിരക്കു കൂട്ടുകയാണ്. എന്നാൽ, കടം വാങ്ങി അയയ്ക്കുന്ന പണം പ്രവാസികൾക്ക് കടുത്ത സാമ്പത്തിക ബാധ്യതയ്ക്ക് കാരണമായേക്കാം എന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നത്. രൂപയുടെ മൂല്യം ഇടിഞ്ഞതു വഴി ലഭിക്കുന്ന സാമ്പത്തിക നേട്ടം പലിശ വഴി നഷ്ടപ്പെടാം. കടമെടുക്കുന്ന പണത്തിന് 5–7 ശതമാനമാണ് പലിശ. ഇത് അടച്ചു കഴിയുമ്പോൾ നാട്ടിൽ പണം അയച്ചതു വഴിയുണ്ടായ സാമ്പത്തിക നേട്ടം ഇല്ലാതാകുമെന്നാണ് വിലയിരിത്തപ്പെടുന്നത്.

രൂപയുടെ മൂല്യം ഇടിയുന്ന സാഹചര്യത്തിൽ തിരിച്ചു കയറാനുള്ള മാർഗം ഇന്ത്യ നോക്കുന്നുണ്ട്. അതിൽ പ്രധാനപ്പെട്ടതാണ് രൂപയിൽ തന്നെ വിദേശ രാജ്യങ്ങളിൽ വിനിമയം നടത്താനുള്ള നീക്ക.വിദേശ വ്യാപാരത്തിൽ രൂപ ഉപയോഗിച്ചാൽ നിലവിലെ പ്രതിസന്ധി ഇന്ത്യയ്ക്ക് മറികടക്കാൻ എളുപ്പമാകുമെന്നാണ് വിദഗ്ധർ പറയുന്നത്.