കാസർ​ഗോഡ് വീടിന്റെ ടെറസില്‍ കഞ്ചാവ് കൃഷി ചെയ്‌ത യുവാവ് പോലീസ് പിടിയിൽ. കുബന്നൂര്‍ ബേക്കൂര്‍ കണ്ണാടിപ്പാറയിലെ കെപി നജീബ് മഹ്‌ഫൂസിനെ (22) ആണ് അറസ്റ്റ് ചെയ്തത്. കുമ്പള കിദൂര്‍ മൈലാളം റോഡിലെ വാടക ക്വാര്‍ട്ടേഴ്‌സിന്റെ ടെറസില്‍ കഞ്ചാവ് കൃഷി ഉണ്ടെന്ന രഹസ്യവിവരത്തിന്റെ അടിസ്ഥാനത്തിലായിരുന്നു പോലീസ് സംഘം പരിശോധന നടത്തിയത്.

3 കഞ്ചാവ് ചെടിയാണ് കണ്ടെത്തിയത്. ഇതിനു 2 മാസം വളര്‍ച്ചയുണ്ടായിരുന്നു. മംഗളൂരുവിലെ സ്വകാര്യ കോളജിലെ വിദ്യാര്‍ഥിയായ നജീബ് മഹ്‌ഫൂസ് കഞ്ചാവ് ഉപയോഗിക്കുന്ന ആളാണെന്നും വില്‍പനക്കും സ്വന്തം ആവശ്യത്തിനുമായി ഉപയോഗിക്കാനാണ് കൃഷി നടത്തിയതെന്നും സംശയിക്കുന്നതായി പോലീസ് പറഞ്ഞു.

എസ്‌ഐ വികെ അനീഷിന്റെ നേതൃത്വത്തിലുള്ള പോലീസ് സംഘം അറസ്‌റ്റ്‌ ചെയ്‌തത്‌. എസ്‌ഐയെ കൂടാതെ സീനിയര്‍ സിവില്‍ പോലീസ് ഓഫിസര്‍ എം സുധീര്‍, സിവില്‍ പോലീസ് ഓഫിസര്‍മാരായ പി അജയന്‍, ടികെ സദന്‍, കൊച്ചുറാണി എന്നിവരും സംഘത്തിലുണ്ടായിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്‌തു.