ഔദ്യോഗിക അംഗീകാരമില്ലാതെ ഇത് ചെയ്ത് പോകരുത്...! കാലാവസ്ഥാ മുന്നറിയിപ്പുകള് ഔദ്യോഗിക അംഗീകാരമില്ലാതെ പുറപ്പെടുവിക്കുന്നവര്ക്കെതിരെ കര്ശന നടപടിയുമായി ഒമാന്
നിയമ ലംഘനങ്ങള് നടത്തുന്നവര്ക്കെതിരെ ഒമാനും ശിക്ഷ കടുപ്പിക്കുകയാണ്. രാജ്യത്ത് ഔദ്യോഗിക അംഗീകാരമില്ലാതെ കാലാവസ്ഥാ മുന്നറിയിപ്പുകള് പുറപ്പെടുവിക്കുന്നവര്ക്ക് കർശന മുന്നറിയിപ്പ് നൽകിയിരിക്കുകയാണ് ഒമാന്. ഇത്തരം നിയമ ലംഘനങ്ങള് നടത്തുന്നവര്ക്ക് മൂന്ന് വര്ഷം വരെ തടവും, അമ്പതിനായിരം റിയാല് പിഴയും ശിക്ഷയായി ലഭിക്കും.
സിവില് ഏവിയേഷന് അതോറിറ്റിയാണ് ഇക്കാര്യം അറിയിച്ചത്. ഒമാന് ദേശീയ കാലാവസ്ഥാ കേന്ദ്രം നല്കുന്ന മുന്നറിയിപ്പുകള്ക്ക് വിരുദ്ധമായുള്ള കാലാവസ്ഥാ പ്രവചനങ്ങള്, കാലാവസ്ഥാ മുന്നറിയിപ്പുകള് എന്നിവ പ്രസിദ്ധീകരിക്കുന്നവര്ക്ക് നിയമ നടപടികള് നേരിടേണ്ടി വരുമെന്ന് അധികൃതര് അറിയിച്ചു.
അതേസമയം ഒമാനിലെ മസ്കറ്റ് ഗവര്ണറേറ്റില് വിവിധ ജൂവലറികളില് നടത്തിയ പരിശോധനയില് നിരവധി നിയമലംഘനങ്ങള് കണ്ടെത്തി. വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയം നടത്തിയ പരിശോധനയിൽ സ്വര്ണം, വെള്ളി ആഭരണങ്ങളുടെ വില്പ്പന സംബന്ധിച്ച് ഇതുവരെ 169 നിയമലംഘനങ്ങള് കണ്ടെത്തിയതെന്ന് അധികൃതര് വ്യക്തമാക്കി.
ഉപഭോക്തൃ സംരക്ഷണ അതോറിറ്റിയാണ് പരിശോധന നടത്തിയത്. നേരത്തെ ദാഹിറ ഗവര്ണറേറ്റില് നടത്തിയ പരിശോധനയില് വിലയില് കൃത്രിമം കാട്ടിയ ജൂവലറി അടച്ചുപൂട്ടാന് ഉത്തരവിട്ടിരുന്നു. പണിക്കൂലി, ഗ്രാം വില, വാറ്റ് എന്നിവ ഉള്പ്പെടെ സ്വര്ണവിലയില് കൃത്രിമം കാണിക്കുന്നെന്ന പരാതിയെ തുടര്ന്നായിരുന്നു പരിശോധന.
https://www.facebook.com/Malayalivartha
