ഇൻഡിഗോ എയർലൈൻസ് റാസൽഖൈമയിൽ നിന്ന് പുതിയ സർവ്വീസ് ആരംഭിക്കുന്നു. അടുത്തമാസം 22 മുതലാണ് ഇൻഡിഗോ മുംബൈക്കും റാസൽഖൈമക്കുമിടയിൽ നേരിട്ടുള്ള സർവീസിന് തുടക്കമിടുന്നത്. ദുബൈ, അബുദബി, ഷാർജ എന്നീ എമിറേറ്റുകളിലേക്ക് ഇൻഡിഗോ നേരത്തേ സർവീസ് നടത്തുന്നുണ്ട്.ഇൻഡിഗോ വിമാനങ്ങൾ സർവീസ് നടത്തുന്ന നൂറാമത്തെ നഗരമാവുകയാണ് റാസൽഖൈമ.

തങ്ങൾ നേരിട്ട് സർവീസ് ആരംഭിക്കുന്ന യു.എ.ഇയിലെ നാലാമത്തെ എമിറേറ്റാണ് റാസൽഖൈമയെന്നും ഇൻഡിഗോ ചീഫ് സ്ട്രാറ്റജി ആൻഡ് റവന്യൂ ഓഫീസർ സഞ്ജയ്കുമാർ പറഞ്ഞു. ഇൻഡിഗോയുടെ അന്താരാഷ്ട്ര സർവീസുകളുടെ കണക്കിൽ ഇരുപത്തിയാറാമത്തെ നഗരമാണ് റാസൽഖൈമ. റാസൽഖൈമയിലേക്ക് വൻ ഡിമാൻഡ് നിലനിൽക്കുന്നുണ്ടെന്നും ഈവർഷം വിമാനയാത്രികരുടെ എണ്ണം കോവിഡിന് മുമ്പുള്ള കണക്കിലേക്ക് എത്തുമെന്നും അധികൃതർ പറഞ്ഞു.

അതുപോലെ യാത്രക്കാർക്ക് വിമാനത്തിൽ നിന്നും വേ​ഗം പുറത്തുകടക്കാൻ പുതിയ സംവിധാനം ഒരുക്കുന്ന തിരക്കിലാണ് കമ്പനി. യാത്രക്കാര്‍ക്ക് വിമാനത്തില്‍ നിന്നിറങ്ങാനായി ത്രീ പോയിന്റ് സൗകര്യം ഏർപ്പെടുത്താൻ ഒരുങ്ങുകയാണ്. സാധാരണ ഗതിയിൽ യാത്രക്കാര്‍ക്ക് ഇറങ്ങാനായി രണ്ട് റാമ്പുകളാണ് വിമാനങ്ങളില്‍ ഉള്ളത്.

ഇനി മുതല്‍ ഇൻഡിഗോയിൽ മൂന്ന് റാമ്പുകൾ ഇത്തരത്തിൽ ഉണ്ടാകും. അതായത് വിമാനയാത്രക്കാർക്ക് അധികം സമയം പാഴാക്കാതെ പുതിയ സംവിധാനമായ ത്രീ പോയിന്റ് സൗകര്യം വരുന്നതോടുകൂടി ഇനിമുതൽ എളുപ്പത്തിൽ പുറത്തെത്താൻ സാധിക്കും. യാത്രക്കാർക്കായി ത്രീ പോയിന്റ് സൗകര്യം ഒരുക്കുന്ന ആദ്യ വിമാനക്കമ്പനിയാണ് ഇന്‍ഡിഗോ എയര്‍ലൈന്‍.