ഒരാഴ്ചയായി യു.എ.ഇയിൽ തുടരുന്ന കടുത്ത വേനൽ ചൂടിന് ആശ്വാസമായി മഴ എത്തുന്നു. രാജ്യത്ത് പല ഭാഗത്തും വരുന്ന മൂന്നു ദിവസം മഴയ്ക്ക് സാധ്യതയെന്ന് കാലാവസ്ഥാ വിഭാഗം അറിയിച്ചു. ദേശീയ കാലാവസ്ഥാ കേന്ദ്ര (എൻ.സി.എം)ത്തിന്റെ പ്രവചനമനുസരിച്ച്, വരുന്ന ശനി, ഞായർ, തിങ്കൾ ദിവസങ്ങളിൽ ചില പ്രദേശങ്ങളിൽ മഴ പെയ്യാൻ സാധ്യതയുണ്ട്.

തിങ്കളാഴ്ച മണിക്കൂറിൽ 55 കിലോമീറ്റർ വേഗതയിൽ പൊടിക്കാറ്റ് വീശാൻ സാധ്യതയുണ്ട്. കഴിഞ്ഞ ദിവസങ്ങളിൽ ചില എമിറേറ്റുകളിലെ ചൂട് 50 ഡിഗ്രി സെൽഷ്യസിനും മുകളിലായിരുന്നു. അൽഐനിലെ സ്വീഹാനിൽ ഇന്നലെ 51 ഡിഗ്രി ചൂട് രേഖപ്പെടുത്തി. ഈ വർഷം ഇത് രണ്ടാം തവണയാണ് ചൂട് 50 കടക്കുന്നത്.

ജൂൺ 23ന് അൽ ദഫ്ര മേഖലയിലാണ് ഇതിനു മുൻപ് 50.5 ഡിഗ്രി ചൂട് രേഖപ്പെടുത്തിയത്. അതിരാവിലെ പോലും കടുത്ത ചൂടാണ് അനുഭവപ്പെടുന്നത്. 26.2 ഡിഗ്രിയാണ് കുറ‍ഞ്ഞ താപനില. ഇതും അൽഐനിൽ തന്നെയാണ് രേഖപ്പെടുത്തിയത്.വരും ദിവസങ്ങളിൽ രാജ്യത്തിന്റെ തെക്ക്-കിഴക്ക് ഭാഗങ്ങളിൽ പെയ്യുന്ന മഴ താപനിലയിൽ ഗണ്യമായ കുറവിന് കാരണമായേക്കുമെന്നാണ് പ്രതീക്ഷ.