യുഎഇയ്ക്ക് പിന്നാലെ സൗദിയിലും കാലാവസ്ഥ മാറ്റം രൂക്ഷമായി തുടരുകയാണ്. അധികൃതർ പുറപ്പെടുവിക്കുന്ന മുന്നറിയിപ്പുകൾ പ്രവാസികൾ കൃത്യമായി പാലിക്കാൻ ശ്രദ്ധിക്കുക. സൗദിയിൽ നാളെ മുതൽ കാലാവസ്ഥാ വ്യതിയാനമുണ്ടാകുമെന്നാണ് മുന്നറിയിപ്പ്. രാജ്യത്തിന്‍റെ മിക്ക ഭാഗങ്ങളിലും മഴയും മഞ്ഞ് വീഴ്ചയും ഉണ്ടാകും. ചില പ്രദേശങ്ങളിൽ താപനില കുറഞ്ഞ് ഒന്നിനും അഞ്ച് ഡിഗ്രി സെൽഷ്യസിനും ഇടയിലെത്തുമെന്നും കാലാവസ്ഥ നിരീക്ഷണ കേന്ദ്രം അറിയിച്ചു.

വെള്ളിയാഴ്ച വരെ ഇത്തരത്തിൽ കാലാവസ്ഥാ വ്യതിയാനമുണ്ടാകുമെന്നാണ് മുന്നറിയിപ്പ്.ബുധനാഴ്ച വൈകുന്നേരം മുതൽ ഇടത്തരം മുതൽ ശക്തമായ മഴക്ക് സാധ്യതയുണ്ട്. വ്യാഴാഴ്ച രാവിലെ മുതൽ മഴ കൂടുതൽ ശക്തിപ്രാപിക്കുമെന്നും വെള്ളിയാഴ്ച വരെ ഇത് തുടരാൻ സാധ്യതയുണ്ടെന്നും കാലാവസ്ഥ നിരീക്ഷണ കേന്ദ്രം വ്യക്തമാക്കി.

മഴ ശക്തമായാൽ മക്ക, ജിദ്ദ, തായിഫ്, റാബിഗ്, ജമൂം, അൽ-കാമിൽ, ഖുലൈസ്, ബഹ്‌റ, അൽ-ലൈത്ത്, കുൻഫുദ, ഉർദിയാത്ത്, അദം മെയ്‌സാൻ എന്നീ പ്രദേശങ്ങളിൽ വെള്ളപ്പൊക്കത്തിന് സാധ്യതയുണ്ട്. തബൂക്കിലെ ഹൈറേഞ്ചുകളില്‍ വ്യാഴം, വെള്ളി ദിവസങ്ങളില്‍ മഞ്ഞുവീഴ്ചയുണ്ടാകും. അല്‍ജൗഫ്, വടക്കന്‍ അതിര്‍ത്തിപ്രദേശങ്ങള്‍, ഹായില്‍, മദീന എന്നിവിടങ്ങളില്‍ മഞ്ഞു കാലാവസ്ഥയായിരിക്കും.

റിയാദ്, മദീന, വടക്കന്‍ അതിര്‍ത്തി പ്രദേശങ്ങള്‍, അല്‍ജൗഫ് എന്നിവിടങ്ങളിലും കിഴക്കന്‍ പ്രവിശ്യകളുടെ ചില ഭാഗങ്ങളിലും മഴക്ക് സാധ്യതയുണ്ട്. പടിഞ്ഞാറൻ മേഖലകളിലെ തീരപ്രദേശങ്ങളിൽ തിരമാലകൾ രണ്ടര മീറ്റർ വരെ ഉയരത്തിലെത്തുമെന്നും മുന്നറിയിപ്പ് നൽകുന്നു. വ്യാഴാഴ്ച വൈകുന്നേരം മുതൽ വടക്കൻ അതിർത്തി പ്രദേശങ്ങൾ, ഹായിൽ, മദീന മേഖലയുടെ വടക്ക് എന്നിവിടങ്ങളിൽ കുറഞ്ഞ താപനില 1 നും 5 ഡിഗ്രി സെൽഷ്യസിനും ഇടയിൽ എത്തുമെന്നാണ് പ്രതീക്ഷിക്കുന്നത്.

വെള്ളിയാഴ്ച വൈകുന്നേരം മുതൽ , റിയാദ്, ഖസിം മേഖല, കിഴക്കൻ മേഖലയുടെ വടക്ക് എന്നിവിടങ്ങളിൽ 6 മുതൽ 8 ഡിഗ്രി സെൽഷ്യസ് വരെ താപനിലയെത്തുെമെന്ന് പ്രതീക്ഷിക്കുന്നതായും കാലാവസ്ഥ നിരീക്ഷണ കേന്ദ്രം അറിയിച്ചു.അതേസമയം, സൗദിയില്‍ കാലാവസ്ഥ മാറ്റത്തെ തുടര്‍ന്ന് പകർച്ചപ്പനി പടർന്ന് പിടിക്കുകയാണ്. ഇത് പ്രവാസികൾക്ക് ഇടയിൽ വലിയ ആശങ്കകൾക്ക് വഴിവെച്ചിരുന്നു. മുഴുവൻ ആളുകളും ഇൻഫ്ലുവൻസ് വാക്സിൻ എടുക്കണമെന്നും ഇതിനാരും വിമുഖത കാണിക്കരുതെന്നും ആരോഗ്യ മന്ത്രാലയം ആവശ്യപ്പെട്ടിരുന്നു.

ഇപ്പോൾ പകര്‍ച്ച പനി തടയാന്‍ പ്രതിരോധ കുത്തിവെപ്പ് ഫലപ്രദമെന്ന് പഠനത്തിൽ വ്യക്തമായി. കാലാവസ്ഥ മാറ്റത്തെ തുടര്‍ന്നുണ്ടാകുന്ന പകര്‍ച്ച പനിക്ക് പ്രതിരോധ കുത്തിവെപ്പ് ഫലപ്രദമായി പ്രവര്‍ത്തിക്കുന്നതായി കിംഗ് സൗദ് മെഡിക്കല്‍ സിറ്റി പുറത്തിറക്കിയ ഗവേഷണം പറയുന്നു. കുത്തിവെപ്പ് സീസണല്‍ പകര്‍ച്ചവ്യാധി രോഗങ്ങളെ 70 മുതല്‍ 90 ശതമാനം വരെ തടയുന്നതായി കിംഗ് സൗദി മെഡിക്കല്‍ സിറ്റി ഗവേഷണ വിഭാഗം പറഞ്ഞു.കുത്തിവെപ്പെടുത്തവരില്‍ 70 മുതല്‍ 90 ശതമാനം വരെ ആളുകള്‍ക്ക് രോഗ വ്യാപനത്തില്‍ നിന്ന് രക്ഷ നല്‍കുന്നുണ്ട്.