യുഎഇയില് മഴ ശക്തമാകും, ജനങ്ങള്ക്ക് സുരക്ഷാ മുന്നറിയിപ്പ് നല്കി അധികൃതർ, വാഹനമോടിക്കുന്നവര് ജാഗ്രത പാലിക്കണം, താപനില കുറയാനും സാധ്യത
യുഎഇയില് മഴയ്ക്ക് സാധ്യതയുണ്ടെന്ന് മുന്നറിയിപ്പ് നല്കി കാലാവസ്ഥാ നിരീക്ഷണ കേന്ദ്രം. മഴ ശക്തമാകുന്ന പശ്ചാത്തലത്തില് അധികൃതര് ജനങ്ങള്ക്ക് സുരക്ഷാ മുന്നറിയിപ്പ് നല്കിയിട്ടുണ്ട്. രാജ്യത്തിന്റെ കിഴക്ക് ഭാഗങ്ങളിലും വടക്കന് മേഖലകളിലും മഴയ്ക്ക് സാധ്യതയുണ്ടെന്നാണ് മുന്നറിയിപ്പ്.
അതിനാൽ വാഹനമോടിക്കുന്നവര് ജാഗ്രത പാലിക്കണമെന്നും ഡ്രൈവര്മാര് ഇന്ഫര്മേഷന് ബോര്ഡുകളില് പ്രദര്ശിപ്പിച്ചിരിക്കുന്ന വേഗപരിധി പാലിക്കണമെന്നും അധികൃതര് നിര്ദ്ദേശം നല്കി. താപനില കുറയാനും സാധ്യതയുണ്ട്. അബുദാബിയില് 28 ഡിഗ്രി സെല്ഷ്യസും ദുബായില് 29 ഡിഗ്രി സെല്ഷ്യസുമാണ് താപനില.
അതേസമയം, ഒമാനിലെ വിവിധ ഗവര്ണറേറ്റുകളില് ന്യൂനമര്ദ്ദത്തിന്റെ ഫലമായി മഴയ്ക്ക് സാധ്യതയുണ്ടെന്ന് മുന്നറിയിപ്പ്. ബുധനാഴ്ച വരെ മഴയ്ക്ക് സാധ്യതയുണ്ടെന്നാണ് നാഷണല് ഏര്ലി വാണിങ് സെന്റര് ഫോര് മള്ട്ടിപ്പിള് ഹസാര്ഡ്സ് മുന്നറിയിപ്പ് നല്കിയിട്ടുള്ളത്. അല് വുസ്ത, ദോഫാര്, തെക്കന് ശര്ഖിയ എന്നീ ഗവര്ണറേറ്റുകളില് ഒറ്റപ്പെട്ട മഴയ്ക്ക് സാധ്യതയുണ്ട്.
തെക്കന് ശര്ഖിയ, അല് വുസ്ത ഗവര്ണറേറ്റുകളുടെ വിവിധ ഭാഗങ്ങളില് രാത്രിയിലും അതിരാവിലെയും മൂടല്മഞ്ഞിനുള്ള സാധ്യതയും പ്രവചിക്കുന്നുണ്ട്. ഒമാനില് ഈ ആഴ്ച രണ്ട് ന്യൂനമര്ദ്ദങ്ങള് ബാധിക്കുമെന്ന് കാലാവസ്ഥാ നിരീക്ഷണ കേന്ദ്രം നേരത്തെ അറിയിച്ചിരുന്നു. വടക്കന് ഗവര്ണറേറ്റുകളിലും തീരപ്രദേശങ്ങളിലുമാണ് ന്യൂനമര്ദ്ദം നേരിട്ട് ബാധിക്കുക.
https://www.facebook.com/Malayalivartha
