കുവൈത്തിൽ ഇന്നലെ പെയ്ത ശക്തമായ മഴയില്‍ പലയിടങ്ങളിലും വെള്ളക്കെട്ടുകള്‍ രൂപപ്പെട്ടു. ഫഹാഹീല്‍ ഭാഗങ്ങളില്‍ ഉണ്ടായ വെള്ളക്കെട്ട് മൂലം പല റോഡുകളും അടച്ചതായി കുവൈത്ത് ആഭ്യന്തര മന്ത്രാലയം അറിയിച്ചു. ഫഹാഹീല്‍ ഉമ്മുല്‍ ഹൈമാന്‍ റോഡ്, അല്‍ കൂത്ത് സൂക്കിലേക്കുള്ള ഫഹാഹീല്‍ തീരദേശ റോഡ്, ശുഐബപോര്‍ട്ട് വെയര്‍ ഹൌസ് റോഡ് എന്നിവയാണ് അടച്ചത്.

അതേസമയം ഒമാന്റെ വിവിധ ഗവർണറേറ്റുകളിൽ കഴിഞ്ഞ ദിവസം ശക്തമായ മഴ ലഭിച്ചു. ന്യൂനമർദത്തിന്റെ ഫലമായി നാളെ വരെ മിക്ക ഗവർണറേറ്റുകളിലും മഴ തുടരുമെന്ന് കലാവസ്ഥ നിരീക്ഷണ കേന്ദ്രം മുന്നറിയിപ്പ് നൽകി. കനത്ത മഴയെ തുടർന്ന് തലസ്ഥാന നഗരിയായ മസ്‌കത്തുൾപ്പെടെയുള്ള വിവിധ സ്ഥലങ്ങളിലെ റോഡുകളിൽ വെള്ളം കയറി.

വിവിധ ഇടങ്ങളിൽ കുടുങ്ങിയ 50ൽ അധികം ആളുകളെ രക്ഷിച്ചു. പലയിടത്തും വാദികൾ നിറഞ്ഞൊഴുകുകയാണ്. വാദികൾ മുറിച്ച് കടക്കരുതെന്നും വേണ്ട മുൻകരുതൽ നടപടികൾ പാലിക്കണമെന്നും സിവിൽ ഡിഫൻസ് ആൻഡ് ആംബുലൻസ് അതോറിറ്റി ആവശ്യപ്പെട്ടിട്ടുണ്ട്. മുൻകരുതൽ നടപടികളുമായി റോയൽ ഒമാൻ പൊലീസും രംഗത്തുണ്ട്.