സാധാരക്കാരായ പ്രവാസികൾക്ക് വലിയ തിരിച്ചടിയെന്നോണം നടപടികൾ കടുപ്പിക്കുകയാണ് സൗദി. രാജ്യത്ത് വിവിധ ജോലികൾക്കായി വരുന്ന  പ്രവാസികൾക്ക് നൈപുണ്യ പരീക്ഷ ഇന്ത്യയിൽ ഏർപ്പെടുത്തുകയാണ്. കുവൈത്തും ഇത്തരത്തിലേക്ക് നീങ്ങുമെന്ന് നേരത്തെ തന്നെ സൂചനകൾ നൽകിയിരുന്നു. എന്നാൽ ഇപ്പോൾ സൗദിയും വിവിധ തൊഴിൽ മേഖലകളിൽ നൈപുണ്യ പരീക്ഷയിലേക്ക് കടന്നിരിക്കുകയാണ്. നൈപുണ്യ പരിശോധന ഇന്ത്യയിൽ വച്ചു തന്നെ നടത്തുന്നതിനുള്ള പദ്ധതിയാണ് സൗദി തയ്യാറാക്കിയിരിക്കുന്നത്.

ഇതുവരെ സൗദിയിൽ വച്ചു തന്നെയായിരുന്നു പരിശോധന നടത്തിയിരുന്നത്. എന്നാൽ സ്‌കിൽ വെരിഫിക്കേഷൻ പ്രോഗ്രാമിന്റെ ഭാഗമായുള്ള പരീക്ഷകൾ ഇന്ത്യയിൽ വച്ച് നടക്കുന്നത് ഇതാദ്യമായാണ്.ഇന്ത്യക്കാർക്കായുള്ള സ്‌കിൽ വെരിഫിക്കേഷൻ പ്രോഗ്രാമിന്റെ ആദ്യ ഘട്ടം അടുത്ത ദിവസം തന്നെ ആരംഭിക്കുമെന്ന് മാനവ വിഭവശേഷി, സാമൂഹിക വികസന മന്ത്രാലയത്തെ ഉദ്ധരിച്ച് സൗദി പ്രസ് ഏജൻസി റിപ്പോർട്ട് ചെയ്തു.

സൗദി തൊഴിൽ വിപണിയിലെ വിദഗ്ധ തൊഴിലാളികളുടെ പ്രൊഫഷണൽ കഴിവ് മെച്ചപ്പെടുത്തുന്നതിനും അവരുടെ ഉൽപ്പാദനക്ഷമത വർദ്ധിപ്പിക്കുന്നതിനും അവർ നൽകുന്ന പ്രൊഫഷണൽ സേവനങ്ങളുടെ ഗുണനിലവാരം മികച്ചതാക്കുന്നതിനുമുള്ള മാനവ വിഭവശേഷി, സാമൂഹിക വികസന മന്ത്രാലയത്തിന്റെ ശ്രമങ്ങളുടെ തുടർച്ചയായാണ് പദ്ധതിയെന്നും അധികൃതർ വ്യക്തമാക്കി.

അഞ്ച് തൊഴിൽ മേഖലകളിലാണ് ആദ്യഘട്ടത്തിൽ പരീക്ഷ നടത്തുക. പ്ലംബർ, ഇലക്ട്രീഷ്യൻ, വെൽഡർ, റഫ്രിജറേഷൻ/എയർ കണ്ടീഷനിംഗ് ടെക്നീഷ്യൻ, ഓട്ടോമൊബൈൽ ഇലക്ട്രീഷ്യൻ തുടങ്ങി അഞ്ച് തൊഴിലുകളാണ് ആദ്യഘട്ടത്തിൽ നൈപുണ്യ പരിശോധനയ്ക്കായി തിരഞ്ഞെടുത്തിരിക്കുന്നതെന്നും മന്ത്രാലയം വൃത്തങ്ങൾ വ്യക്തമാക്കി. സ്‌കിൽ വെരിഫിക്കേഷൻ പ്രോഗ്രാമിന്റെ അടിസ്ഥാനത്തിൽ സൗദിയിൽ നിന്നുള്ള തൊഴിൽ വിസയ്ക്ക് അപേക്ഷ നൽകുന്നതിന് മുമ്പ് ഇന്ത്യക്കാരായ ഉദ്യോഗാർഥികൾക്കായി തൊഴിൽ വൈദഗ്ധ്യവുമായി ബന്ധപ്പെട്ട എഴുത്ത് പരീക്ഷയും പ്രായോഗിക പരീക്ഷയും നടത്തുമെന്നും അധികൃതർ അറിയിച്ചു.

ഈ പരീക്ഷയിൽ കഴിവ് തെളിയിക്കുന്നവർക്ക് മാത്രമേ സൗദി വിസ അനുവദിക്കുകയുള്ളൂ. ആദ്യ ഘട്ടമെന്ന നിലയിൽ ഇന്ത്യയുടെ തലസ്ഥാന നഗരമായ ന്യൂഡൽഹിയിലും രാജ്യത്തെ ഏറ്റവും വലിയ നഗരവും വാണിജ്യ തലസ്ഥാനവുമായ മുംബൈയിലുമാണ് പദ്ധതി നടപ്പിലാക്കുക. തൊഴിലാളികളുടെ പ്രത്യേക തൊഴിൽ മേഖലകളുമായി ബന്ധപ്പെട്ട തിയറി, പ്രാക്ടിക്കൽ പരീക്ഷകൾ ഉൾപ്പെടുന്നതായിരിക്കും ഇത്.

പ്രാദേശിക തൊഴിൽ വിപണിയുടെ ആവശ്യങ്ങൾ നിറവേറ്റുന്നതിനായി അന്താരാഷ്ട്ര മാനദണ്ഡങ്ങൾക്കനുസൃതമായി തൊഴിലാളികളുടെ കഴിവുകൾ വികസിപ്പിക്കുകയെന്ന ലക്ഷ്യത്തോടെ 23 പ്രത്യേക തൊഴിൽ മേഖലകളിൽ സ്‌കിൽ വെരിഫിക്കേഷൻ പ്രോഗ്രാം നടപ്പിലാക്കാനാണ് മന്ത്രാലയം തീരുമാനിച്ചിരിക്കുന്നത്.സൗദി തൊഴിൽ വിപണിയിലേക്ക് യോഗ്യതയില്ലാത്ത തൊഴിലാളികളുടെ ഒഴുക്ക് തടയുകയെന്നതും നൈപുണ്യ പരിശോധനാ പ്രോഗ്രാമിന്റെ ലക്ഷ്യമാണ്. സൗദി തൊഴിൽ വിപണിയിലെ വിദഗ്ധ തൊഴിലാളികളുടെ കഴിവ് ഉറപ്പാക്കുന്നതിനായി വിദേശകാര്യ മന്ത്രാലയത്തിന്റെയും സാങ്കേതിക, തൊഴിലധിഷ്ഠിത പരിശീലന കോർപ്പറേഷന്റെയും സഹകരണത്തോടെ 2021 മാർച്ചിലാണ് മന്ത്രാലയം സ്‌കിൽ വെരിഫിക്കേഷൻ പ്രോഗ്രാമിന് തുടക്കം കുറിച്ചത്.