മറ്റു ഗൾഫ് രാഷ്ട്രങ്ങളെ അപേക്ഷിച്ച് ഏറ്റവും കൂടുതൽ സ്വദേശിവത്കരണം നടക്കുന്ന രാഷ്ട്രമാണ് സൗദി അറേബ്യ. ഇതിനോടകം തന്നെ നിരവധി പ്രവാസികൾ തൊഴിൽ നഷ്ടപ്പെട്ട് നാടുകളിലേക്ക് എത്തിച്ചേരുകയുണ്ടായി. ഇപ്പോഴിതാ സൗദിയിൽ സ്വദേശിവത്ക്കരണം വീണ്ടും വർധിപ്പിക്കാനായി തീരുമാനം കൈകൊണ്ടിരിക്കുകയാണ് അധികൃതർ.

രാജ്യത്തെ കൂടുതല്‍ മേഖലകളില്‍ സ്വദേശിവത്ക്കരണം നടപ്പാക്കാനൊരുങ്ങുതായാണ് റിപ്പോർട്ട്. സ്വകാര്യ മേഖലയിലെ നിശ്ചിത മേഖലകളില്‍ ഘട്ടം ഘട്ടമായി സ്വദേശിവല്‍ക്കരണം നടപ്പിലാക്കുന്നതാണ് പദ്ധതി. ഇതിനുള്ള സമഗ്ര രൂപരേഖ മാനവവിഭവശേഷി മന്ത്രാലയം തയ്യാറാക്കി കഴിഞ്ഞതായി മന്ത്രാലയ വൃത്തങ്ങള്‍ വെളിപ്പെടുത്തി.

സ്വകാര്യ മേഖലയിലെ പതിനൊന്ന് മേഖലകളില്‍ കൂടി സ്വദേശിവല്‍ക്കരണം ഉടന്‍ പ്രഖ്യാപിക്കുമെന്ന് മന്ത്രാലയം വൃത്തങ്ങള്‍ വെളിപ്പെടുത്തി. രാജ്യത്ത് സ്വദേശികള്‍ക്കിടയില്‍ വര്‍ധിച്ചുവരുന്ന തൊഴിലില്ലായ്മ നിരക്ക് കുറക്കുന്നതിനായിട്ടാണ് നിലപാട് കടുപ്പിച്ച് മാനവവിഭവശേഷി മന്ത്രാലയം രംഗത്തുവന്നത്.

സ്വദേശികള്‍ക്ക് അനുയോജ്യമായ തൊഴിലവസരങ്ങള്‍ സൃഷ്ടിക്കുന്നതിന് ഘട്ടം ഘട്ടമായി പദ്ധതി പൂര്‍ത്തിയാക്കാനാണ് മന്ത്രാലയം ലക്ഷ്യമിടുന്നത്. ഇതിനുള്ള സമഗ്ര രൂപരേഖ മന്ത്രാലയം ഇതിനകം തയ്യാറാക്കി കഴിഞ്ഞു. വരും ദിവസങ്ങളില്‍ ഇതിന്‍റെ പ്രഖ്യാപനം ഉണ്ടായേക്കും.

സ്വകാര്യ മേഖലയില്‍ ഒന്നര ലക്ഷത്തിലധികം സ്വദേശികള്‍ക്ക് തൊഴിലവസരം സൃഷ്ടിക്കുന്നതിന് ആവിഷ്കരിച്ച 'തൗതീന്‍ 2' പദ്ധതിക്ക് കീഴിലാണ് പുതിയ സ്വദേശിവല്‍ക്കരണം നടപ്പിലാക്കുക.സ്വദേശികൾക്ക് സ്വകാര്യ മേഖലയിൽ ഒരു ലക്ഷത്തി എഴുപതിനായിരം തൊഴിവസരങ്ങൾ സൃഷ്ടിക്കുന്നതാണ് പുതിയ പദ്ധതി. രാജ്യത്തെ തൊഴിലില്ലായ്മ നിരക്ക് 7 ശതമാനമാക്കി കുറക്കുകയാണ് പദ്ധതിയുടെ ലക്ഷ്യം.

സ്വകാര്യ മേഖലയിൽ 1,70,000 തൊഴിലവസരങ്ങൾ സൃഷ്ടിക്കുന്ന 'തൗതീൻ 2' എന്ന പദ്ധതിയാണ് മാനവശേഷി, സാമൂഹിക വികസന മന്ത്രാലയം പ്രഖ്യാപിച്ചത്. വ്യവസായ മേഖലയില്‍ 25,000 ഉം ആരോഗ്യ മേഖലയില്‍ 20,000 ഉം ഗതാഗത, ലോജിസ്റ്റിക് മേഖലയില്‍ 20,000 ഉം തൊഴിലവസരങ്ങൾ ലഭ്യമാക്കും. കൂടാതെ റിയല്‍ എസ്റ്റേറ്റ്, നിര്‍മാണ മേഖലയില്‍ 20,000 ഉം ടൂറിസം മേഖലയില്‍ 30,000 ഉം വ്യാപാര മേഖലയില്‍ 15,000 ഉം മറ്റു മേഖലകളില്‍ 40,000 ഉം തൊഴിലവസരങ്ങള്‍ ലഭ്യമാക്കാനാണ് പദ്ധതിയിലൂടെ ലക്ഷ്യമിടുന്നത്.

സൂപ്പർവൈസറി കമ്മറ്റികളുടെ മേൽനോട്ടത്തിൽ ഓരോ മേഖലയിലേയും തൊഴിലവസരങ്ങളെ കുറിച്ചും തൊഴിലാളികളുടെ ആവശ്യകതകളെ കുറിച്ചും റിപ്പോർട്ട് തയ്യാറാക്കും. ടൂറിസം, വാണിജ്യം, ഗതാഗതം, ലോജിസ്റ്റിക്‌സ് സേവനങ്ങൾ, ആരോഗ്യം, മുനിസിപ്പൽ, ഗ്രാമകാര്യങ്ങൾ, ഭവനം, വ്യവസായം, ധാതുസമ്പത്ത് എന്നിവയുൾപ്പെടെ 6 മന്ത്രാലയങ്ങൾ ഉൾപ്പെടുന്നതാണ് സൂപ്പർവൈസറി കമ്മിറ്റികൾ. തൊഴിലാളികളുടെ തൊഴിൽ നൈപുണ്യം ഉയർത്തുന്നതിന് 'സ്‌കിൽസ് ആക്‌സിലറേറ്റർ ആൻഡ് ട്രെയിനിംഗ് പ്രോഗ്രാം' എന്ന പദ്ധതിയും ആരംഭിച്ചിട്ടുണ്ട്.