യുഎഇയിൽ വരും ദിവസങ്ങളിലും കനത്ത മഴയ്ക്കുള്ള സാധ്യത നിലനിൽക്കുന്നുണ്ടെന്ന് കാലാവസ്ഥാ നിരീക്ഷണകേന്ദ്രം അറിയിച്ചു. ഇതിന്റെ   ഭാഗമായി രാജ്യത്തിന്റെ വിവിധ ഭാഗങ്ങളിൽ മുന്നറിയിപ്പ് നൽകിയിട്ടുണ്ട്. വരും ദിവസങ്ങളില്‍ കൂടുതല്‍ മഴക്ക് സാധ്യതയുണ്ടെന്നാണ് ദേശീയ കാലാവസ്ഥാ നിരീക്ഷണകേന്ദ്രത്തിന്റെ പ്രവചനം.

മിന്നലിന്റെ അകമ്പടിയോടെ വിവിധ പ്രദേശങ്ങളില്‍ വ്യത്യസ്ത അളവിലാകും മഴ ലഭിക്കുക.രാജ്യത്തിന്‍റെ തീരപ്രദേശങ്ങളിലും വടക്കന്‍, കിഴക്കന്‍ ഭാഗങ്ങളിലും വെള്ളി, ശനി ദിവസങ്ങളില്‍ മിന്നലുണ്ടാകുമെന്നും താപനിലയില്‍ കുറവുണ്ടാകുമെന്നും നിരീക്ഷണകേന്ദ്രം പ്രവചിച്ചിട്ടുണ്ട്.

കാലാവസ്ഥ മേഘാവൃതമായിരിക്കുമെന്നും ഈ ആഴ്‌ച മുഴുവന്‍ മഴ സാധ്യതയുള്ള ദിവസങ്ങളാണെന്നും അറിയിപ്പില്‍ പറയുന്നു. ദ്വീപുകളിലും വടക്കന്‍, കിഴക്കന്‍ പ്രദേശങ്ങളിലും കൂടുതലായി മഴ പ്രതീക്ഷിക്കുന്നുണ്ട്.

ഗള്‍ഫ് രാജ്യങ്ങളില്‍ മിക്കയിടത്തും സമാനമായ കാലാവസ്ഥയാണ് നിലവിലുള്ളത്. ചൊവ്വാഴ്ച രാജ്യത്തിന്‍റെ വിവിധ പ്രദേശങ്ങളില്‍ ചെറുതും വലുതുമായ രീതിയില്‍ മഴ ലഭിച്ചു. അബൂദബി, ദുബൈ, റാസല്‍ഖൈമ എന്നിവിടങ്ങളിലാണ് പ്രധാനമായും മഴ ലഭിച്ചത്. ചൊവ്വാഴ്ച രാവിലെ മുതല്‍ തന്നെ ദുബൈയില്‍ പലഭാഗങ്ങളിലും ചാറ്റല്‍മഴ ആരംഭിച്ചിരുന്നു. പിന്നീട് വൈകുന്നേരത്തോടെ ചില സ്ഥലങ്ങളില്‍ മഴ ശക്തിപ്പെട്ടു.

മാത്രമല്ല, യുഎഇയിലുടനീളം മൂടൽമഞ്ഞിന് സാധ്യതയുള്ളതിനാൽ നാഷണൽ സെന്റർ ഓഫ് മെറ്റീരിയോളജി കഴിഞ്ഞ ദിവസം യെല്ലോ അലേർട്ട് പ്രഖ്യാപിച്ചിരുന്നു. കടലിലും കരയിലും ഭാഗികമായി മേഘാവൃത അന്തരീക്ഷമായിരിക്കും. ദൂരക്കാഴ്ച കുറയുന്നതിനാൽ വാഹനമോടിക്കുന്നവർ ജാഗ്രത പാലിക്കണമെന്നും വിവിധ റോഡുകളുടെ വേഗപരിധികളിൽ വരുന്ന മാറ്റങ്ങൾ ശ്രദ്ധിക്കണമെന്നും അബൂദബി പൊലീസും അഭ്യർത്ഥിക്കുകയുണ്ടായി.

പർവതപ്രദേശങ്ങളിൽ താപനില 8 ഡിഗ്രി സെൽഷ്യസായി കുറയാനും സാധ്യതയുള്ളതായി പ്രവചിക്കപ്പെട്ടിരുന്നു. അബൂദബിയിൽ കൂടിയ താപനില 25 ഡിഗ്രി സെൽഷ്യസും കുറഞ്ഞ താപനില 18 ഡിഗ്രി സെൽഷ്യസുമായിരിക്കും എന്നാണ് പ്രവചിച്ചിരുന്നത്. ദുബൈയിൽ കൂടിയ താപനില 26 ഡിഗ്രി സെൽഷ്യസും കുറഞ്ഞ താപനില 19 ഡിഗ്രി സെൽഷ്യസിലേക്കെത്തും എന്നും മുന്നറിയിപ്പിൽ പറഞ്ഞിരുന്നു.