യുഎഇയിൽ ശൈത്യത്തിന് തുടക്കം കുറിച്ചിരിക്കുകയാണ്. വരും ദിനങ്ങളില്‍ തണുപ്പ് കൂടുതല്‍ കഠിനമാവുമെന്ന് കാലാവസ്ഥാ നിരീക്ഷണ കേന്ദ്രം പ്രവചിച്ചു. എന്നാൽ കാലാവസ്ഥാ മാറ്റത്തെ തുടർന്ന് രാജ്യത്തിന്റെ പല എമിറേറ്റുകളിലും ഇപ്പോൾ അന്തരീക്ഷ താപനിലയിൽ ഏറ്റക്കുറച്ചിലുകളും അനുഭവപ്പെടുന്നുണ്ട്.

അപ്പോഴിത യുഎഇ തീരത്ത് ശക്തമായ കാറ്റിന് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ് നൽകിയിരിക്കുന്നത്. കടൽ പ്രക്ഷുബ്ദമാണ് എന്നതിനാൽ തീരത്ത് ഓറഞ്ച്, യെല്ലോ അലർട്ടുകൾ പ്രഖ്യാപിച്ചു. തീരത്ത് പോകുന്നവർ ജാഗ്രത പാലിക്കണം എന്നാണ് മുന്നറിയിപ്പ് പുറത്തുവന്നിരിക്കുന്നത്.

വരും ദിനങ്ങളില്‍ രാജ്യത്ത് തണുപ്പ് കൂടുതല്‍ കഠിനമാവുമെന്ന് കാലാവസ്ഥാ നിരീക്ഷണ കേന്ദ്രം പ്രവചിച്ചു. പര്‍വതപ്രദേശങ്ങളില്‍ താപനില അഞ്ച് ഡിഗ്രി സെല്‍ഷ്യസില്‍ കുറയാന്‍ സാധ്യതയുണ്ടെന്നും കേന്ദ്രം മുന്നറിയിപ്പ് നല്‍കി. ജനുവരി പകുതിക്ക് ശേഷമുള്ള ദിവസങ്ങള്‍ ഗള്‍ഫ് പൈതൃക കലണ്ടറില്‍ ശൈത്യകാലത്തിന്റെ ഏറ്റവും ഉയര്‍ന്ന സമയമാണെന്ന് അധികൃതര്‍ പറഞ്ഞു.

ഈ ശക്തമായ തണുപ്പ് ഏതാനും ദിവസങ്ങള്‍ നീണ്ടുനില്‍ക്കും. അറേബ്യന്‍ പെനിന്‍സുലയില്‍ ഒന്നാകെ അതിശൈത്യം അനുഭവപ്പെടുന്ന സമയമാണിതെന്ന് എമിറേറ്റ്സ് അസ്ട്രോണമിക്കല്‍ സൊസൈറ്റി ഡയറക്ടര്‍ ബോര്‍ഡ് ചെയര്‍മാന്‍ ഇബ്രാഹിം അല്‍ ജര്‍വാന്‍ പറഞ്ഞു. മരുഭൂമികളില്‍ താപ നില ചിലയിടങ്ങില്‍ അഞ്ച് ഡിഗ്രി സെല്‍ഷ്യസ് വരെയും പര്‍വത പ്രദേശങ്ങളില്‍ പൂജ്യം ഡിഗ്രി വരെയും എത്തുമെന്നും അദ്ദേഹം പറഞ്ഞു.

ഈ കാലയളവില്‍, രാവിലെ സമയങ്ങളില്‍ ശക്തമായ മൂടല്‍മഞ്ഞ് അനുഭവപ്പെടാന്‍ സാധ്യതയുണ്ടെന്നും അദ്ദേഹം പറഞ്ഞു.അതിനിടെ, യുഎഇയിലെ പല പ്രദേശങ്ങളിലും മഴക്ക് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം അറിയിച്ച സാഹചര്യത്തില്‍ ജാഗ്രത പാലിക്കാന്‍ അധികൃതര്‍ ജനങ്ങള്‍ക്ക് നിര്‍ദ്ദേശം നല്‍കി.