യു.എ.ഇയില്‍ വരും ദിവസങ്ങളിൽ മഴയ്ക്ക് സാധ്യതയുണ്ടെന്ന മുന്നറിയിപ്പ്  ദേശീയ കാലാവസ്ഥാ കേന്ദ്രം അറിയിച്ച സാഹചര്യത്തില്‍ ജാഗ്രത പാലിക്കാന്‍ അധികൃതര്‍ ജനങ്ങള്‍ക്ക് നിര്‍ദ്ദേശം നല്‍കിയിരുന്നു. എന്നാൽ ഇന്ന് നേരിയ മഴയ്ക്ക് സാധ്യതയുള്ളതായി ദേശീയ കാലാവസ്ഥാ വിഭാഗം അറിയിച്ചു.

ചില ഭാഗങ്ങളില്‍ ഭാഗികമായി മേഘാവൃതമായിരിക്കുമെന്നും നാഷണല്‍ സെന്റര്‍ ഓഫ് മെറ്റീരിയോളജി അധികൃതര്‍ വ്യക്തമാക്കി.ചില വടക്കന്‍ തീരപ്രദേശങ്ങളിലും കടലിലുമാണ് നേരിയ മഴയ്ക്ക് സാധ്യതയുള്ളത്. രാജ്യത്തെ താപനില 28 ഡിഗ്രി സെല്‍ഷ്യസ് വരെ ഉയര്‍ന്നേക്കാം. അബൂദബിയില്‍ 17 ഡിഗ്രി സെല്‍ഷ്യസും ദുബൈയില്‍ 19 ഡിഗ്രി സെല്‍ഷ്യസ് വരെയും പര്‍വതപ്രദേശങ്ങളില്‍ 5 ഡിഗ്രി സെല്‍ഷ്യസ് വരെയും താപനില കുറയാനും സാധ്യതയുണ്ട്.

നേരിയതോതില്‍ കാറ്റടിക്കാനും സാധ്യതയുണ്ട്. യുഎഇയിൽ ശൈത്യത്തിന് തുടക്കം കുറിച്ചിരിക്കുകയാണ്. വരും ദിനങ്ങളില്‍ തണുപ്പ് കൂടുതല്‍ കഠിനമാവുമെന്ന് കാലാവസ്ഥാ നിരീക്ഷണ കേന്ദ്രം പ്രവചിച്ചിരുന്നു. നാളെ രാവിലെ മിക്ക ഭാഗങ്ങളിലും പൊതുവെ തണുത്ത കാലാവസ്ഥയായിരിക്കും.

പര്‍വതപ്രദേശങ്ങളില്‍ താപനില അഞ്ച് ഡിഗ്രി സെല്‍ഷ്യസില്‍ കുറയാന്‍ സാധ്യതയുണ്ടെന്നും കേന്ദ്രം മുന്നറിയിപ്പ് നല്‍കി. ജനുവരി പകുതിക്ക് ശേഷമുള്ള ദിവസങ്ങള്‍ ഗള്‍ഫ് പൈതൃക കലണ്ടറില്‍ ശൈത്യകാലത്തിന്റെ ഏറ്റവും ഉയര്‍ന്ന സമയമാണെന്ന് അധികൃതര്‍ പറഞ്ഞു. ഈ ശക്തമായ തണുപ്പ് ഏതാനും ദിവസങ്ങള്‍ നീണ്ടുനില്‍ക്കും.

അറേബ്യന്‍ പെനിന്‍സുലയില്‍ ഒന്നാകെ അതിശൈത്യം അനുഭവപ്പെടുന്ന സമയമാണിതെന്ന് എമിറേറ്റ്സ് അസ്ട്രോണമിക്കല്‍ സൊസൈറ്റി ഡയറക്ടര്‍ ബോര്‍ഡ് ചെയര്‍മാന്‍ ഇബ്രാഹിം അല്‍ ജര്‍വാന്‍ പറഞ്ഞു. മരുഭൂമികളില്‍ താപ നില ചിലയിടങ്ങില്‍ അഞ്ച് ഡിഗ്രി സെല്‍ഷ്യസ് വരെയും പര്‍വത പ്രദേശങ്ങളില്‍ പൂജ്യം ഡിഗ്രി വരെയും എത്തുമെന്നും അദ്ദേഹം പറഞ്ഞു. ഈ കാലയളവില്‍, രാവിലെ സമയങ്ങളില്‍ ശക്തമായ മൂടല്‍മഞ്ഞ് അനുഭവപ്പെടാന്‍ സാധ്യതയുണ്ടെന്നും അദ്ദേഹം പറഞ്ഞു.