യുഎഇയിലെ പ്രവാസികൾക്ക് വളരെ ഉപകാരപ്രമായ തീരുമാനം എടുത്തിരിക്കുകയാണ്. അവധി ദിവസങ്ങളിലും ഇനി പാസ്പോർട്ട് സംബന്ധമായ സേവനങ്ങൾ പ്രവാസികൾക്ക് ലഭ്യമാക്കാനുളള നടപടിയാണ് എടുത്തിരിക്കുന്നത്. വർഷത്തിൽ എല്ലാ ദിവസവും പ്രവർത്തിക്കുന്ന ബിഎൽഎസിന്റെ മൂന്ന് കേന്ദ്രങ്ങൾ യുഎഇയിൽ സജ്ജമാക്കിയതായി വിദേശ കാര്യ സഹമന്ത്രി വി. മുരളീധരൻ പറഞ്ഞു.

ദുബായിൽ രണ്ടും ഷാർജയിൽ ഒരു കേന്ദ്രവുമാണ് ഞായറാഴ്ചകളിലും പ്രവർത്തിക്കുക എന്നും അദ്ദേഹം വ്യക്തമാക്കി. ഇന്ത്യൻ കോൺസുലേറ്റിന്റെ സഹകരണത്തോടെ തമിഴ് സംഘം കോൺസുലേറ്റ് ഓഡിറ്റോറിയത്തിൽ സംഘടിപ്പിച്ച പൊങ്കൽ ആഘോഷത്തിൽ മന്ത്രി മുഖ്യാതിഥിയായിരുന്നു. ദുബായ് ഇന്ത്യൻ കോൺസുലേറ്റിൽ സംഘടനാപ്രതിനിധികളുടെ ചോദ്യങ്ങൾക്ക് മറുപടിയായാണ് ഇക്കാര്യം വ്യക്തമാക്കിയത്.

സാധാരണക്കാരായ തൊഴിലാളികളുടെ ക്ഷേമത്തിനുവേണ്ടി വിദേശകാര്യ മന്ത്രാലയത്തിന്റെ പ്രത്യേക താൽപര്യ പ്രകാരമാണ് ഈ സംവിധാനം ഏർപ്പെടുത്തിയതെന്നും മന്ത്രി വിശദീകരിച്ചു. യുഎഇയിലെ പ്രവാസികൾക്ക് വലിയതോതിൽ ഗുണം ലഭിക്കുന്ന നടപടി. ഇന്ത്യക്കാർ കൂടുതലുള്ള രാജ്യം എന്ന നിലയിലാണ് യു.എ.ഇയിൽ ഏഴ് ദിവസവും സേവനം നൽകുന്നത്. മറ്റു എമിറേറ്റുകളിലും ഈ സംവിധാനം ഏർപ്പെടുത്തുന്നത് പിന്നീട് ആലോചിക്കും.

വാരാന്ത്യദിനമായ ഞായറാഴ്ചകളിൽ സേവനം ലഭ്യമാകുന്നതോടെ കോൺസൽ സേവനങ്ങൾക്കായി പ്രവൃത്തി ദിവസം അവധി എടുക്കുന്നത് തൊഴിലാളികൾക്ക് ഒഴിവാക്കാം. അതുപോലെ, വിമാന ടിക്കറ്റ് നിരക്ക് വർധന, പ്രവാസി വോട്ടവകാശം തുടങ്ങി പ്രവാസികൾ നേരിടുന്ന പ്രശ്നങ്ങൾ സംഘടനാ ഭാരവാഹികൾ മന്ത്രിയുടെ ശ്രദ്ധയിൽപ്പെടുത്തി. പ്രശ്നം അനുഭാവപൂർവം പരിഗണിച്ച് ബന്ധപ്പെട്ട വകുപ്പുകളുമായി സംസാരിക്കുമെന്നും മന്ത്രി പറഞ്ഞു.ഷാർജ ഇന്ത്യൻ അസോസിയേഷൻ, ഇന്ത്യൻ പീപ്പിൾസ് ഫോറം, ഫ്രണ്ട്സ് ഓഫ് ഇന്ത്യ, അക്കാഫ്, തമിൾ സംഘം തുടങ്ങിയ സംഘടനാ ഭാരവാഹികൾ ചർച്ചയിൽ പങ്കെടുത്തു. യു.എ.ഇയിലെ വിവിധ പരിപാടികളിലും മുരളീധരൻ പങ്കെടുത്തു. ഇന്ത്യൻ കോൺസുലേറ്റിൽ വിവിധ സംഘടന നേതാക്കളുമായി കൂടിക്കാഴ്ച നടത്തി.