പ്രവാസികൾക്ക് വളരെ ആശ്വാസമായ ഒരു തീരുമാനത്തിലേക്ക് എത്തിയിരിക്കുകയാണ് വിമാന കമ്പനിയായ ഇന്‍ഡിഗോ. വലിയ പ്രശ്നങ്ങളൊന്നും യാത്രക്കാർക്ക് ഉണ്ടാക്കാതെ എന്നാൽ അത്രപെർഫക്റ്റും അല്ലാത്ത രീതിയിലാണ് ഇന്‍ഡിഗോയുടെ പോക്ക്. എന്നാൽ വിമാന കമ്പനി നിർത്തിവെച്ചിരുന്ന സർവ്വീസുകളെല്ലാം പഴയതിലും ഉഷാറായി തന്നെ തുടങ്ങാനുള്ള ഒരുക്കങ്ങൾ തുടങ്ങിക്കഴിഞ്ഞു.

നിർത്തിവെച്ചിരുന്ന ജിദ്ദ - കോഴിക്കോട്, ദമ്മാം - കോഴിക്കോട് നേരിട്ടുള്ള സർവീസുകൾ പുനഃരാരംഭിക്കാനുള്ള നിർണായക തീരുമാനമാണ് ഇന്‍ഡിഗോ എടുത്തിരിക്കുന്ന. ഇത് ഈ റൂട്ടിലെ യാത്രക്കാരായ പ്രവാസികൾക്ക് വലിയ ആശ്വാസമേകുന്ന വാർത്തയാണ്. നേരത്തെ ഈ സെക്ടറുകളിൽ സർവീസ് നടത്തിയിരുന്ന ഇൻഡിഗോ പിന്നീട് സർവീസുകൾ നിർത്തിവെച്ചിരിക്കുകയായിരുന്നു.

ഈ സർവ്വീസുകളാണ് ഇപ്പോൾ ഇന്‍ഡിഗോ പുനരാരംഭിക്കുന്നത്. ഉംറ യാത്രക്കാരുടെ ആധിക്യം കാരണം പ്രവാസികൾക്ക് ജിദ്ദയിൽ നിന്നും കോഴിക്കോട്ടേക്കും തിരിച്ചും യാത്ര ചെയ്യുന്നതിന് നേരിടുന്ന പ്രയാസങ്ങൾക്ക് ഒരു പരിധിവരെ ഇൻഡിഗോയുടെ പുതിയ നേരിട്ടുള്ള സർവീസുകൾ പരിഹാരമാവും.

എന്നാൽ ഇതിന് ഒരൽപ്പം കാത്തിരിക്കണം. ഇതിനായുള്ള ടിക്കറ്റുകൾ കമ്പനിയുടെ വെബ്‍സൈറ്റിലും ട്രാവൽ ഏജൻസികളിലും ഇതിനോടകം ലഭ്യമായിട്ടുണ്ട്. എങ്കിലും മാർച്ച് 26 മുതൽ ആണ് ഇരു വിമാനത്താവളങ്ങളിൽ നിന്നും സർവിസുകൾ ആരംഭിക്കുക. ജിദ്ദയിൽ നിന്നും എല്ലാ ദിവസവും രാത്രി 12.40 ന് പുറപ്പെടുന്ന വിമാനം രാവിലെ ഒമ്പതിന് കോഴിക്കോട്ടെത്തും.

തിരിച്ച് രാത്രി 8.30ന് കോഴിക്കോട്ട് നിന്നും പുറപ്പെടുന്ന വിമാനം രാത്രി 11.30ന് ജിദ്ദയിലിറങ്ങും. ദമ്മാമിൽ നിന്നും രാവിലെ 11.40നാണ് സർവീസ്. വൈകീട്ട് 6.50ന് കോഴിക്കോട്ടെത്തും. കോഴിക്കോട്-ദമ്മാം സർവീസ് രാവിലെ 8.40 നാണ്. രാവിലെ 10.40 ന് ദമ്മാമിലിറങ്ങും.

ജിദ്ദയിലും പരിസര പ്രദേശങ്ങളിലുമുള്ള പ്രവാസികൾക്ക് ഏറെ ഉപകാരപ്പെടുന്ന രീതിയിലാണ് പുതുതായി പ്രഖ്യാപിച്ചിരിക്കുന്ന ഇൻഡിഗോ സർവീസുകളുട സമയക്രമം. ജിദ്ദയിൽ നിന്നും കോഴിക്കോട് നിന്നും സർവീസുകൾ രാത്രി പുറപ്പെടുന്നതായതുകൊണ്ട് അവധിക്ക് പോവുന്ന പ്രവാസികൾക്ക് അവരുടെ അവധി ദിനങ്ങൾ യാത്രക്ക് വേണ്ടി നഷ്ടപ്പെടുകയില്ല എന്നതാണ് ഏറെ ഉപകാരപ്രദം.