നിരവധി പ്രവാസി കുടുംബങ്ങളാണ് യുഎഇയുടെ വിവിധ എമിറേറ്റുകളിലായി താമസിക്കുന്നത്. എന്നാൽ ഇനി താമസത്തിനായി അധിക തുക പ്രവാസികൾക്ക് കണ്ടെത്തേണ്ടി വരുമെന്ന ആശങ്കയുയർത്തുന്ന റിപ്പോർട്ടുകളാണ് പുറത്തുവരുന്നത്. വീട്ടു വാടക ഇനത്തിൽ പ്രവാസികളുടെ പോക്കറ്റ് ചോരാരാണ് സാധ്യത. അതായത് വാടകയിൽ 15 മുതൽ 20 ശതമാനംവരെ വർധനയാണ് പ്രവചിക്കപ്പെടുന്നത്.

കഴിഞ്ഞ വർഷം റിയൽ എസ്റ്റേറ്റ് മേഖലയിലുണ്ടായ ഉണർവ് ഈ വർഷം വാടകയിൽ തിഫലിക്കുമെന്നാണ് ദുബായ് ലാൻഡ് വകുപ്പിന്റെ പ്രവചനം. ഇതോടെ സാധാരണക്കാരായ പ്രവാസി കുടുംബങ്ങളുടെ നിലപരിങ്ങലിലാകും. മാസ ശമ്പളത്തിൽ എല്ലാം കൃത്യമായി കണക്കു കൂട്ടി വയ്ക്കുന്ന പ്രവാസികളുടെ എല്ലാ കണക്കും തെറ്റിയേക്കുമെന്ന തരത്തിലുള്ള നിർണായക പ്രവചനമാണ് ദുബായ് ലാൻഡ് വകുപ്പിന്റേത്.

ഓരോ സ്ഥലത്തും ചതുരശ്ര അടിക്ക് റിയൽ എസ്റ്റേറ്റ് റഗുലേറ്ററി അതോറിറ്റി നിരക്ക് നിശ്ചയിച്ചിട്ടുണ്ട്. ഒരു ചതുരശ്രയടിക്കു നിശ്ചയിച്ച നിരക്കിനെയാണ് വിപണി വിലയായി കണക്കാക്കുന്നത്. ഇപ്പോൾ ഇടാക്കുന്ന വാടക വിപണി വിലയേക്കാൾ 10% മാത്രമാണ് കുറവെങ്കിൽ, ഈ വർഷം വാടക വർധിപ്പിക്കരുതെന്നാണ് റിയൽ എസ്റ്റേറ്റ് റഗുലേറ്ററി അതോറിറ്റിയുടെ (റേറ) നിർദേശം. വിപണി വിലയേക്കാൾ 11 – 20% വാടക കുറവാണെങ്കിൽ 5% വർധിപ്പിക്കാം. 21 – 30% കുറവാണെങ്കിൽ 10% വർധിപ്പിക്കാം, 31 – 40% കുറവാണെങ്കിൽ 15 ശതമാനവും 40 ശതമാനത്തിൽ താഴെയാണെങ്കിൽ 20 ശതമാനവും വാടക വർധിപ്പിക്കമെന്നാണ് റേറയുടെ നിർദേശം.

വാടക വർധിച്ചാൽ ആദ്യ ബാധിക്കുന്നത് മലയാളികളെയാണെന്നുള്ള കാര്യത്തിൽ സംശയം വേണ്ട. കാരണം അത്രയധികം പ്രവാസി കുടുംബങ്ങളാണ് യുഎഇയിൽ താമസിക്കുന്നത്. കുടുംബത്തിൽ രണ്ടു പേർക്കും ജോലിയുള്ളവർ പോലും കുട്ടികളുടെ പഠന ചെലവും വാടകയും നൽകി തട്ടിമുട്ടിയാണ് ഓരോ മാസവും തികയ്ക്കുന്നത്. ഇപ്പോഴുള്ളതിനേക്കാൾ വാടകയിനത്തിൽ 10 ശതമാനമെങ്കിലും വർധിച്ചാൽ ദുബായിയുടെ ഹൃദയ ഭൂമിയിൽ നിന്നു മലയാളികൾ നഗരത്തിനു പുറത്തുള്ള സ്ഥലങ്ങൾ തേടേണ്ടി വരും.

ഓഫീസ്, സ്കൂൾ തുടങ്ങിയവയിലേക്കുള്ള ദൂരം കണക്കാക്കിയാണ് പലരും താമസ സ്ഥലങ്ങൾ തിരഞ്ഞെടുത്തിരിക്കുന്നത്. എന്നാൽ വാടകയിനത്തിൽ വർദ്ധനവ് വന്നാൽ പിടിച്ചുനിൽക്കാനാവില്ല. നഗരത്തിനു പുറത്തുള്ള സ്ഥലങ്ങളിലേക്ക് മാറിത്താമസിക്കാൻ ഇവരെ നിർബന്ധിതരാക്കും. പഴയ കെട്ടിടം തിരഞ്ഞെടുത്താലും വാടകയിൽ അൽപം ലാഭം പ്രതീക്ഷിക്കാം.

കൃത്യമായി വാടക നിലവാരം മനസ്സിലാക്കി വില പേശിയാൽ ചിലപ്പോൾ വാടകയിൽ കുറവു ലഭിക്കാം. 4 ചെക്കിൽ പെയ്മെന്റ് നടത്തിയിരുന്നത് ഒരു ചെക്കിലോ രണ്ട് ചെക്കിലോ നൽകാൻ കഴിയുമെങ്കിൽ ഇതുവച്ച് വിലപേശൽ നടത്താവുന്നതാണ്. ട്രോ സൗകര്യം, ബസ് സൗകര്യം എന്നിവ കണക്കിലെടുത്താണ് നഗരത്തിനുള്ളിൽ വാടക നിശ്ചയിച്ചിരിക്കുന്നത്. മെട്രോ, ബസ് സൗകര്യങ്ങളില്ലാത്ത ടൗൺ ഷിപ്പുകളിൽ വാടക കുറയും. അപ്പോൾ, യാത്രയ്ക്കു ടാക്സികളോ സ്വന്തം വാഹനങ്ങളെയോ ആശ്രയിക്കേണ്ടി വരും.