യുഎഇയിൽ നിന്ന് നിരവധി പ്രവാസികൾ അവധിക്കായി നാട്ടിലേക്കും മറ്റ് ആവശ്യങ്ങൾക്കായും യാത്ര ചെയ്യുന്നവരാണ്. ഇനി ലേഗേജ് ഒരുക്കുമ്പോൾ പ്രത്യേകം ശ്രദ്ധിക്കേണ്ടതുണ്ട്. ഇല്ലെങ്കിൽ ചിലർക്കെങ്കിലും പണിയാകും. പ്രത്യേകിച്ച് കൈവശം സൂക്ഷിക്കാവുന്ന കറൻസിയുടെ കാര്യത്തിൽ ശ്രദ്ധിച്ചില്ലെങ്കിൽ. അതായത് യു.എ.ഇയിൽ വിമാന യാത്രക്കാർക്ക് കൈവശം വെക്കാവുന്ന കറൻസിയുടെ അളവിൽ വ്യക്തത വരുത്തി കസ്റ്റംസ് അധികൃതർ.

വലിയ തുക കൈവശം വെക്കുന്നത് സുരക്ഷക്ക് ഭീഷണിയാകുമെന്ന് കസ്റ്റംസ് വിഭാഗം വ്യക്തമാക്കി. അതിനാൽ 60,000 ദിർഹമിൽ കൂടുതൽ തുകയുടെ കറൻസിയോ അമൂല്യ വസ്തുക്കളോ കൈവശമുള്ള യാത്രക്കാർ വിവരം അറിയിക്കണമെന്നാണ് കസ്റ്റംസ് അധികൃതർ വ്യക്തമാക്കുന്നത്. 18 വയസിന് മുകളിലുള്ള വിദേശത്ത് നിന്ന് യു.എ.ഇയിൽ എത്തുന്നവർക്കും തിരിച്ച് പോകുന്നവർക്കുമാണ് ഈ നിർദേശം.

കറൻസി, വിലപിടിപ്പുള്ള കല്ലുകൾ, ലോഹം തുടങ്ങിയവ കൈവശം വെക്കുന്നവർക്കാണ് മുന്നറിയിപ്പ്. യാത്രക്കാരുടെ സുരക്ഷ ഉറപ്പുവരുത്താനാണിതെന്ന് ഫെഡറൽ അതോറിറ്റി ഫോർ ഐഡന്‍റിറ്റി, സിറ്റിസൺഷിപ്പ്, കസ്റ്റംസ്, പോർട്സ് സെക്യൂരിറ്റി അധികൃതർ പറഞ്ഞു.

അതേസമയം, യു.എ.ഇയിലെ താമസക്കാർ തങ്ങളുടെ യാത്രാ വിശദാംശങ്ങളും ഫോട്ടോകളും സോഷ്യൽ മീഡിയയിൽ പോസ്റ്റ് ചെയ്യരുതെന്ന് മുന്നറിയിപ്പ് എത്തിയിരിക്കുകയാണ്. രാജ്യത്തെ പല സ്‌കീമുകളിലുള്ള സ്‌കൂളുകളിലും നീണ്ട അവധി പ്രഖ്യാപിച്ചിട്ടുണ്ട്. ഈ പശ്ചാത്തലത്തിലാണ് യു.എ.ഇ പബ്ലിക് പ്രോസിക്യൂഷൻ ജനങ്ങൾക്ക് മുന്നറിയിപ്പ് നൽകിയിരിക്കുന്നത്.

ഈ അവധി വേളയിലെ വിദ്യാർത്ഥികളുടേയും കുടുംബങ്ങളുടെയും നീണ്ട യാത്രയും സന്ദർശന ഇടങ്ങളും സംബന്ധിച്ച വിവരങ്ങളും പൊതു പ്ലാറ്റ്‌ഫോമുകളിൽ പങ്കു വയ്ക്കുന്നതോടെ അവരുടെ വ്യക്തിഗത വിവരങ്ങളും യാത്രാ പ്ലാനുകളും തങ്ങളുടെ കൂട്ടുകാർക്കും ബന്ധുക്കൾക്കും മാത്രമല്ല, മറിച്ച് അവ എല്ലാ ജനങ്ങൾക്കും ലഭ്യമാകും. ഇത് സാമൂഹ്യവിരുദ്ധർ മുതലെടുക്കാനുള്ള അമിത സാധ്യത മുന്നിൽ കണ്ടാണ് ഇത്തരമൊരു മുന്നറിയിപ്പ് നൽകിയിരിക്കുന്നത്.